Mokwongo ne Jo-Korintho 16:1-24
16 Koro kuom wach chiwo michoko ne jo maler,+ unyalo luwo weche ma ne achiko kanyakla mag Galatia.
2 E odiechieng’ mokwongo mar juma ka juma, ng’ato ka ng’ato onego oket gimoro tenge kaluwore gi nyalone, mondo kik uchok chiwo sa ma achopo.
3 To ka achopo kanyo, abiro oro jomoko ma upwodho e barupeu,+ mondo giter mich magu Jerusalem.
4 Kata kamano, ka po ni owinjore mondo an bende adhi Jerusalem, abiro dhi kodgi kuno.
5 To anabi iru ka asekalo Makedonia, nimar abiro kadho Makedonia;+
6 kendo samoro abiro bet kodu kata dak kodu e kinde koyo, eka ukowa matin ka ma nyalo bedo ni adhiyoe.
7 Nimar gie sani ok adwar nenou mana machuok sa ma akalo nikech ageno mar bedo kodu kuom kinde mogwaro+ ka Jehova* oyie.
8 To gie sani, pod an Efeso+ nyaka chop Sawo mar Pentekost,
9 nimar oseyawna dhoot malach mar tich,+ to nitie jo akwede mang’eny.
10 Koro ka Timotheo+ ochopo iru, neuru ni onge gimoro moluoro ka en e kindu, nimar otiyo tij Jehova*+ mana kaka an bende.
11 Kuom mano, kik ng’ato ochaye. Koweuru gi kuwe mondo obi ira nikech warite an kaachiel gi owete.
12 Koro kuom wach owadwa Apolo,+ ne asaye ahinya mondo obi iru gi owete. Ne ok ochano biro sani, kata kamano, enobi ka oyudo thuolo.
13 Sikuru ka uneno,+ chung’uru matek e yie,+ beduru jochir,+ kendo ubed motegno.+
14 Gik moko duto mutimo, timgiuru gi hera.+
15 Owetena, koro asayou kama: Ung’eyo ni jood Stefana e nyak mokwongo e Akaya kendo ne gichiwore tiyo ka gikonyo jo maler.
16 Un bende yie ubolru e bwo jo ma kamago kod jogo duto ma gin jotich wetewa kendo ma tiyo matek.+
17 To amor nimar an gi Stefana,+ gi Fortunato, kod Akaiko, nikech bedo ni gin kae osepong’o karu nimar uonge kae.
18 Nikech giseduogo chunya kod maru bende. Kuom mano, nyisuru chuny mar erokamano nikech jo ma kamago.
19 Kanyakla mag Asia ooronu mos maggi. Akula gi Priska kaachiel gi kanyakla manie odgi+ omosou gi ilo kuom Ruoth.
20 Owete duto omosou. Mosreuru ng’ato gi ng’ato gi nyoth maler.
21 An Paulo, kendo mae en mos ma andikonu gi lweta awuon.
22 Ka ng’ato ok ohero Ruoth, to mondo okuong’e. A Ruodhwa, bi!
23 Ng’wono mogundho mar Ruoth Yesu mondo obed kodu.
24 Herana mondo obed kodu uduto e winjruok achiel gi Kristo Yesu.
