Mokwongo ne Jo-Korintho 2:1-16
2 Omiyo, owetena, ka ne abiro iru, ne ok abiro iru gi weche madongo mag nyisruok+ kata mag rieko sa ma nalandonu wach maler moum+ mar Nyasaye.
2 Nimar ka ne an kodu, ne aketo chunya, ok kuom wach moro machielo, to mana kuom Yesu Kristo, kendo kuom jalno ma ne ogur e yath.+
3 Bende, ne abiro iru ka anyap, ka aluor, kendo ka akirni ahinya;
4 wechena kod gik ma ne ayalo ne ok gin weche mariek ma ywayo ji, to ne gin ma nyiso roho kod teko mar Nyasaye,+
5 mondo yieu kik tenre kuom rieko mar dhano, to otenre kuom teko mar Nyasaye.
6 Koro wayalo wach rieko e kind jo motegno e yie,+ to ok rieko mar pinyni,* bende ok rieko mar jotelo mag pinyni, ma kargi biro lal nono.+
7 To wayalo wach maler moum+ ma en rieko mar Nyasaye, en rieko mopandi, ma Nyasaye nochano motelo ka ndaloni ne pok ochopo, mondo wayud duong’.
8 Onge kata mana achiel kuom jotelo mag pinyni* moseng’eyo riekono nimar dine bed ni ging’eyo,+ dine ok ginego Ruoth ma nigi duong’.*
9 To mana kaka ondik niya: “Wang’ pok oneno kendo it pok owinjo. Bende, gik ma Nyasaye oseiko ne jo ma ohere pok odonjo e chuny dhano.”+
10 Nimar wan e ma Nyasaye oseelonwagi+ kokalo kuom rohone,+ nikech roho nono gik moko duto, nyaka gik matut mag Nyasaye.+
11 Nikech ng’a mong’eyo paro man kuom ng’at machielo mak mana chuny ng’atno owuon? Kamano bende, onge ng’at moseng’eyo pach Nyasaye, mak mana roho mar Nyasaye.
12 Koro ne warwako roho mar Nyasaye, to ok chuny mar pinyni,+ mondo wang’e gik ma Nyasaye osemiyowa e yo mang’won.
13 Gigo bende wapuonjo, ok gi weche mag rieko dhano,+ to gi weche ma roho maler puonjo,+ ka watiyo gi weche mag roho e lero weche mag chuny.
14 To dhand ringruok ok rwak gik moa kuom roho mar Nyasaye, nimar gigo gin fuwo e wang’e; kendo ok onyal ng’eyo gigo nikech inonogi kokalo kuom roho mar Nyasaye.
15 Kata kamano, dhano ma roho tayo nono gik moko duto,+ to en owuon onge dhano moro amora ma none.
16 Nikech “en ng’a moseng’eyo pach Jehova* ma dopuonje?”+ Pach Kristo to wan-go.+
Weche Moler Piny
^ Kata, “chenro mar ndaloni.” Som Tiend Weche.
^ Kata, “dine ok ginego Ruoth ma nigi duong’ e yath.”
^ Kata, “chenro mar ndaloni.” Som Tiend Weche.
^ Som Apendiks A5.
