Mokwongo ne Jo-Korintho 7:1-40
7 Koro kuom weche ma nundikona, ber mondo dichwo kik mul* dhako;
2 to nikech tim terruok* onya, ber mondo dichwo ka dichwo obed gi chiege owuon+ kendo dhako ka dhako obed gi chwore owuon.+
3 Dichwo mondo omi chiege gima owinjore oyud, to dhako bende mondo otim kamano ne chwore.+
4 Dhako onge gi teko kuom ringrene owuon, to chwore e ma nigo; kamano bende, dichwo onge gi teko kuom ringrene owuon, to chiege e ma nigo.
5 Kik utuonru, mak mana ka uwinjoru timo kamano kuom kinde, mondo ubed gi thuolo mar lamo eka bang’e uriwru kendo, mondo Satan kik dhi nyime temou nikech uonge ritruok.
6 Kata kamano, gima asewachono en gima unyalo timo, to ok en chik.
7 To daher ni ji duto obed kaka an. Kata kamano, ng’ato ka ng’ato nigi mich+ ma Nyasaye osemiye, ng’at moro nigi michni, to machielo nigi mich mopogore.
8 Koro awacho ne jo ma ok ni e kend kod mond liete ni ber mondo gisik kaka an.+
9 To ka po ni gionge gi ritruok, gidonj e kend nimar ber donjo e kend kar owruok gi gombo.+
10 Ruoth chiko jo ma ni e kend, to ok an, ni dhako kik we chwore.+
11 To ka oweyo chwore, osik ma ok okende, ka ok kamano to odog olos winjruok gi chwore; bende, dichwo ok onego owe chiege.+
12 To awacho ne jomamoko, ee, an, to ok Ruoth,+ niya: Ka nitie owadwa moro ma chiege ok ni e yie, to chiegeno oyie dak kode, kik oweye;
13 to ka nitie dhako moro ma chwore ok ni e yie, to chworeno oyie dak kode, kik oweye.
14 Nimar dichwo ma ok ni e yie ikwano ni ler nikech chiege, kendo dhako ma ok ni e yie ikwano ni ler nikech owadwano; ka da ok kamano, to nyithindu dine obedo ma ok ler, to koro giler e wang’ Nyasaye.
15 To ka jal ma ok ni e yie oyiero mar pogo dak gi jaode manie yie, we otim kamano; owadwa kata nyaminwa ok otue sa ma gima kamano otimore, to Nyasaye oseluongou mondo uyud kuwe.+
16 Nimar in dhako, ing’eyo nade kata inyalo reso chwori?+ To in dichwo, ing’eyo nade kata inyalo reso chiegi?
17 Kata kamano, mana kaka Jehova* osemiyo ng’ato ka ng’ato pok, ng’ato ka ng’ato mondo owuoth kaluwore gi kaka Nyasaye oseluonge.+ Mano e momiyo achiko kamano e kanyakla duto.
18 Be nitie ng’at ma ne oluong kosetere nyangu?+ Osik kamano. Be nitie ng’at ma ne oluong ka pok otere nyangu? Kik tere nyangu.+
19 Bedo ni ng’ato oter nyangu kata ok oter nyangu ok en gimoro;+ gima duong’ en rito chike Nyasaye.+
20 Ng’ato ka ng’ato osik kaka nochal ka ne oluonge.+
21 Be ne in misumba ka noluongi? Kik iwe mano ochandi;+ to ka inyalo yudo yor bedo thuolo, to ber itim kamano.
22 Nikech ng’at ma Ruoth noluongo ka en misumba, koro en ng’at moseket thuolo;+ kamano bende, ng’at ma noluong ka en thuolo, koro en misumba Kristo.
23 Ne ong’iewu gi nengo,+ omiyo weuru bedo wasumbni mag dhano.
24 Owetena, ng’ato ka ng’ato osik kaka noluonge e nyim Nyasaye.
25 Koro kuom wach jo ma silili,* aonge chik moro amora moa kuom Ruoth, to achiwo pacha+ kaka ng’at ma Ruoth nokecho kokwana kaka ng’at minyalo gen.
26 Kuom mano, aneno ni ber mondo ng’at ma dichwo odhi nyime bedo kaka en nikech piny tinde tek.
27 Be in ng’at ma chik otueyo kuom chiege? Kik imany kaka diweye.+ Be in ng’at ma chik ogonyo kuom chiege? Kik imany dhako mondo ikend.
28 To kata ka po ni ikendo, ok itimo richo. Kendo ka ng’at ma silili odonjo e kend, ok otimo richo. To jo ma odonjo e kend nobed gi masira e ringregi. An atemo mana geng’onu mano.
29 E wi mano, owetena, awacho mano nikech ndalo modong’ nok.+ Chakre sani ka dhi nyime, jo ma nigi mon mondo obed ka jo ma ongego,
30 kendo jo ma ywak mondo obed ka jo ma ok ywagi; bende, jo ma nigi mor obed ka jo ma onge gi mor; kendo jo ma ng’iepo obed ka jo ma onge gimoro.
31 Bende, jo ma tiyo gi piny kik gibed ka jo ma tiyo kode ahinya; nimar kit pinyni lokore.
32 Kuom adier, daher mondo kik ubed gi parruok. Dichwo ma ok okendo nigi parruok kuom weche mag Ruoth, kaka onyalo bedo malong’o e wang’ Ruoth.
33 To dichwo mokendo nigi parruok kuom weche mag piny,+ kaka onyalo bedo malong’o e wang’ chiege,
34 kendo pache opogore diriyo. Bende, dhako ma ok okend kata nyako ma silili nigi parruok kuom weche mag Ruoth,+ mondo obed maler e ringrene kod pache. To dhako ma okend nigi parruok kuom weche mag piny, kaka onyalo bedo malong’o e wang’ chwore.
35 Awacho mae mondo un uwegi uyud ber, ok ni mondo atueu, to mondo ajiwu utim gima owinjore, kendo mondo usik ka uchiworu ne tij Ruoth ma onge gima galo pachu.
36 To ka ng’ato neno ni ok owuoth mowinjore nikech pok odonjo e kend, kendo ka osekalo higni ma rowere thiewoe, koro ma e gima onego otim: Otim gima odwaro; ok otimo richo. Odonj e kend.+
37 To ka ng’ato oseng’ado e chunye ni mano ok ochuno, to en gi teko mar chiko dwache owuon, kendo oseng’ado e chunye mar siko ma ok odonjo e kend,* otimo maber.+
38 Kamano bende, ng’at ma donjo e kend timo maber, to ng’at ma ok odonjo e kend timo maber moloyo.+
39 Chik otueyo dhako ka pod chwore ngima.+ To ka chwore otho, ng’at mohero nyalo kende, to mana kuom Ruoth.+
40 Kaluwore gi pacha, dhakono biro bedo mamor moloyo kosiko ma ok okende; to aparo ni an bende an gi roho mar Nyasaye.
Weche Moler Piny
^ Tiende ni, kik onind gi dhako.
^ E dho Grik en porneia. Som Tiend Weche.
^ Som Apendiks A5.
^ Kata, “jo ma pok odonjo e kend ngang’.”
^ Kata, “siko ka en silili.”
