Barua Mokwongo ne Jo-Thesalonika 1:1-10
1 An Paulo, gi Silvano,*+ kod Timotheo,+ wandikonu un kanyakla mar Jo-Thesalonika, manie winjruok achiel gi Nyasaye Wuoro kod Ruoth Yesu Kristo:
Ng’wono mogundho kod kuwe mondo obed kodu.
2 Kinde duto wagoyo ne Nyasaye erokamano sa ma wahulou uduto e lamowa,+
3 nimar wiwa ok wil gi tich musetimo nikech yieu kod herau, kendo kuom sinani maru nikech geno ma un-go+ kuom Ruodhwa Yesu Kristo e nyim Nyasachwa kendo Wuonwa.
4 Nimar un owete ma Nyasaye ohero, wang’eyo ni ne oyierou,
5 nikech wach maber ma wayalo ok nochoponu gi wach kende, to bende gi teko kod roho maler kendo gi adiera chuth, mana kaka ung’eyo gik ma ne watimo ka ne wan kodu mondo okonyu.
6 Kendo ne uluwo timwa+ kod mar Ruoth bende,+ nimar ne urwako wach Nyasaye ka un e masiche mang’eny+ kendo ka un gi mor ma roho maler chiwo,
7 mi ne uketo ranyisi maber ne ji duto manie yie e piny Makedonia kod Akaya.
8 Adiera en ni ok wach Jehova* kende e ma oselandore koa kuomu e Makedonia kod Akaya, to bende yieu kuom Nyasaye oselandore kuonde duto,+ ma koro ok ochuno ni wawach gimoro.
9 Nimar gisiko ka giwacho kaka ne wakwongo romo kodu kendo kaka ne ulokoru mi uyie kuom Nyasaye ka uweyo sanamu magu+ mondo ubed wasumbni mag Nyasaye mangima kendo madier,
10 bende mondo urit Wuode koa e polo,+ ma nochiero koa kuom jo motho, ma en Yesu, jal ma resowa kuom mirima ma biro.+
