Barua Mokwongo mar Petro 1:1-25
1 An Petro, jaote+ mar Yesu Kristo, andikonu un jodak ma oke kuonde mopogore opogore e Ponto, gi Galatia, gi Kapadokia,+ gi Asia kod Bithunia, un jo moseyier
2 kaluwore gi kaka Nyasaye Wuoro noseyango motelo,+ kendo ma nopwodh gi roho+ mondo uluw kaka ichokou, kendo mondo remb Yesu Kristo okir kuomu:+
Ng’wono mogundho kod kuwe mondo omedrenu.
3 Opak Nyasaye ma Wuon Ruodhwa Yesu Kristo, nimar kuom kechne maduong’, nomiyowa nyuol manyien+ mondo wabed gi geno mangima+ kokalo kuom chiero Yesu Kristo oa kuom jo motho,+
4 mondo wabed gi pok ma ok tow, ma onge chilo, kendo ma ok lokre.+ En gima osekannu e polo,+
5 un ma teko mar Nyasaye oritou maber nikech yie maru, mondo ubi uyud warruok ma ibiro el e ndalo mag giko.
6 Nikech mano, un gi mor maduong’ kata obedo ni gie sani nyaka usandru kuom kinde manok e tembe mopogore opogore,+
7 mondo yieu mosetem,+ ma en yie ma nengone duong’ moloyo dhahabu ma kethore kata obedo ni oseteme gi mach, okel pak gi duong’ kod luor e kinde ma Yesu Kristo biro fwenyoree.+
8 Kata obedo ni ne ok unene, to uhere. Kata obedo ni wang’u ok nene gie sani, pod uyie kuome kendo un gi ilo maduong’ mokadho awacha kod mor miwuoro
9 sa ma utemo chopo e rang’iny mogik mar yieu, ma en warruok maru.+
10 Kuom wach warruogno, jonabi ma nokoro wach ng’wono mogundho mar Nyasaye ma nonego obi kuomu, ne onono gi kinda ahinya kendo manye matut.+
11 Ne gisiko ka ginono ni en kinde mane sie, kata ni en ndalo mane ma roho ma ne ni kuomgi ne dhi fwenyonegi wach Kristo,+ mana kaka rohono ne ochiwonegi neno motelo e wi masiche ma Kristo ne dhi yudo,+ kod duong’ ma ne dhi biro bang’e.
12 Nyasaye nofwenyonegi ni ne gitiyo, ok ne gin giwegi, to ne un, kuom nyisou gik ma oselandnu kokalo kuom jo ma ne landonu wach maber. Gisetimo kamano kuom teko mar roho maler ma noor koa e polo.+ Gigo bende e ma malaike gombo ng’eyo tiendgi.
13 Omiyo, ikuru pachu maber ne tich;+ rituru pachu chuth;+ keturu genou kuom ng’wono mogundho ma ibiro nyisu e kinde ma Yesu Kristo biro fwenyoree.
14 Kaka nyithindo ma winjo wach, weuru luwo gombo maricho ma ne uluwo ka ne pod ukia,*
15 to beduru jo maler e timbeu duto mana kaka Jal Maler ma noluongou,+
16 nimar ondik niya: “Nyaka ubed jo maler, nikech an aler.”+
17 To ka uluongo Wuoro ma ng’ado bura kaluwore gi tim ng’ato, ma ok odewo wang’,+ daguru e ngima ma nyiso luoro Nyasaye+ kuom kinde duto ma udakgo kaka jodak.
18 Nimar ung’eyo ni ne ogonyu+ e yor ngima manono ma kwereu noweyonu, to ne ok en kokalo kuom gik ma tow kaka fedha kata dhahabu.
19 Kar mano, ne en kokalo kuom remo+ ma nengone tek kaka remb nyarombo ma onge mbala kendo maler chuth,+ tiende ni mar Kristo.+
20 En adier ni noseyang wachne motelo ka piny pok nochakore,+ kata kamano ne oel wachne e giko mar ndalo nikech un.+
21 Kokalo kuome, usebedo jo moyie kuom Nyasaye,+ ma e jal ma ne ochiere oa kuom jo motho+ kendo miye duong’;+ mondo uket yieu kod genou kuom Nyasaye.
22 Nikech koro usepwodhoru kuom luwo adiera mondo uherru gadiera kaka owete, herreuru gi hera matut,+ kendo utim kamano gi chunyu duto.+
23 Nimar osemiu nyuol manyien,+ ok kokalo kuom kodhi ma tow, to kuom kodhi* ma ok tow,+ ma en wach Nyasaye mangima kendo ma siko.+
24 Nikech “dhano duto chalo gi lum, kendo duong’gi duto chalo gi gik ma loth e pap; lum biro two, maua bende ner,
25 to wach Jehova* siko nyaka chieng’.”+ To ‘wachno’ e wach maber ma ne olandnu.+
Weche Moler Piny
^ Kata, “weuru bedo joma inywaso ka lowo ka luwore gi gombo ma ne un-go ka ne pod ukia.”
^ Tiende ni, kodhi ma nigi nyalo mar nyago olemo.
^ Som Apendiks A5.
