Barua Mokwongo mar Petro 4:1-19
4 Nikech Kristo noneno masira e ringruok,+ un bende ikreuru gi paro ma kamano; nikech ng’at moseyudo masira e ringruok koro oseweyo richo+
2 mondo otim dwaro mar Nyasaye+ to ok gombo mag dhano,+ kuom ndalo modong’go e ringruok.
3 Nimar ndalo mosekadho ne oromou timo dwaro mar ogendni,+ ka ne udonjo e timbe mag wang’-teko,* owruok gi gombo, metho mokalo tong’, nyasi mopong’ gi koko, metho ma ji piemie, kod lamo sanambe makwero.+
4 Giwuoro gimomiyo ok udhi nyime wuotho kodgi e timbegi mag anjawo, omiyo, giwuoyo kuomu e yor achaya.+
5 To jogo biro dwoko wach e nyim jal moseikore ng’ado bura ne jo mangima kod jo motho.+
6 Kuom adier, mano e momiyo ne oyal wach maber bende ne jo motho,+ mondo kata obedo ni ing’adonegi bura e ringruok kaluwore gi kaka dhano neno, to e wang’ Nyasaye gibed mangima kaluwore gi kaka roho maler chiko.
7 To giko mar weche duto osekayo machiegni. Kuom mano, beduru jo ma pachgi long’o,+ kendo uritru kulemo.*+
8 To moloyo duto, beduru gi hera matut e kindu,+ nikech hera umo richo mogundho.+
9 Rwakuru joweteu ma ok ung’ur.+
10 Ng’ato ka ng’ato mondo oti gi mich moro amora mosemiye e konyo jomoko, nikech un jorit mabeyo mar ng’wono mogundho mar Nyasaye monyiso e yore mopogore opogore.+
11 Ka po ni ng’ato wuoyo, otim kamano kaka ng’at ma hulo weche moa kuom Nyasaye; ka ng’ato tiyo ne jomamoko, otim kamano kaluwore gi teko ma Nyasaye chiwo;+ mondo e gik moko duto Nyasaye oyud duong’+ kokalo kuom Yesu Kristo. Duong’ kod teko gin mage nyaka chieng’. Amin.
12 Un jo ma ahero, kik ubwogi nikech sand mager ka mach ma sani uyudo,+ ka gima gik ma kamago ne pok otimorenu.
13 Kar mano, dhiuru nyime bedo mamor+ nikech usebedo jo ma isando mana kaka Kristo,+ mondo ubi ubed gi mor kendo gi ilo e kinde ma ibiro elie duong’ mare.+
14 Ka ichayou* nikech nying Kristo, un jo mamor,+ nikech roho mar duong’, ee, roho mar Nyasaye, ni kuomu.
15 Kata kamano, kik ng’ato kuomu yud sand nikech en janek, kata nikech en jakuo, kata nikech en jaketho, kata nikech odonjore e weche mag jomamoko.+
16 To ka ng’ato yudo sand nikech en Jakristo, kik obed gi wich-kuot,+ kar mano to odhi nyime miyo Nyasaye duong’ kuom ting’o nyingno.
17 Nimar ma e kinde moket monego ochak ng’adie bura ne od Nyasaye.+ Koro ka wan e ma ichako kodwa,+ nobed nade ne jo ma ok luw wach maber mar Nyasaye?+
18 “To ka ireso ng’at makare e yo matek kamano, nobed nade ne ng’at ma ok oluoro Nyasaye kod jaricho?”+
19 Kuom mano, jo ma yudo sand nikech giluwo dwaro mar Nyasaye, gidhi nyime chiwore giwegi e lwet Jachuech migeno sa ma gitimo gik mabeyo.+
Weche Moler Piny
^ E dho Grik en aselgeia. Som Tiend Weche.
^ Kata, “ritreuru mondo ulam.”
^ Kata, “iyanyou.”
