Samuel Mokwongo 12:1-25
12 Samuel ne onyiso Jo-Israel duto niya: “Ero asetimo gik moko duto ma ne ukwaya kendo aseketonu ruoth mondo oloch e wiu.+
2 Neuru, ma e ruoth ma biro telonu!+ An to aseti kendo an gi lwar, yawuota bende ni kodu kae.+ Asetelonu a tinna nyaka kawuononi.+
3 Eri an ka, wachuru e nyim Jehova kendo e nyim ng’ate mowal+ ni en dher ng’a kata punda ng’a masekawo?+ Koso, en ng’ano ma asethiro kata mayo gire? Be nitie ng’at ma asekawo asoya kuome mondo bura odogne?+ Ka nitie ng’ato ang’ata ma asetimone kamano, abiro chule.”+
4 Ne gidwoke kama: “Pok imayowa gimoro amora kendo pok ithiro ng’ato ang’ata kuomwa, bende pok ikawo asoya kuom ng’ato.”
5 Ne odwokogi niya: “Jehova e janenona, ng’ate mowalo bende en janenona kawuononi, ni ok uyudo gimoro amora munyalo donjonago.”* Ne gidwoke kama: “Ee, en janeno.”
6 Omiyo, Samuel nowacho ne ogandano niya: “Jehova ma ne otiyo gi Musa kod Harun kendo ma ne ogolo kwereu Misri+ en janenona.
7 Koro chung’uru mos mondo ang’adnu bura e nyim Jehova ka aparonu gik makare duto ma Jehova osetimonu gi kwereu.
8 “Ka ne Jakobo odhi Misri+ mi kwereu ochako ywak ne Jehova mondo okonygi,+ Jehova ne ooro Musa+ gi Harun mondo otelnegi ka giwuok Misri mondo gibi gidag e pinyni.+
9 Kata kamano, wigi ne owil gi Jehova Nyasachgi mi oketogi+ e lwet Sisera+ jatend jolweny mag Hazor kendo e lwet Jo-Filistia,+ kod e lwet ruodh Jo-Moab,+ mi jogo ne okedo kodgi.
10 Ne giywak ne Jehova mondo okonygi+ ka giwacho ni, ‘Wasetimo richo+ nimar waweyo Jehova mi wachako lamo nyiseche mag Baal+ kod sanamu mag Ashtoreth.+ Omiyo, reswa e lwet wasikwa mondo watini.’
11 Kendo Jehova ne ooronu Jerubaal,+ gi Bedan, gi Jeftha,+ kod Samuel+ mi oresou e lwet wasigu ma ne olworou koni gi koni mondo udag gi kuwe.+
12 Ka ne uneno ka Nahash+ ruodh Jo-Amon obiro kedo kodu, ne usiko uwachona ni, ‘Wan waseramo ni nyaka wabed gi ruoth!’+ Ne utimo kamano kata obedo ni Jehova Nyasachu e Ruodhu.+
13 Koro ma e ruoth ma ne udwaro, ee, en e ruoth ma ne ukwayo. Neuru! Jehova osemiyou ruoth mondo oloch e wiu.+
14 Ka uluoro Jehova+ mi utiyone,+ uwinjo dwonde,+ kendo ok utamoru luwo chik Jehova, mi un kaachiel gi ruoth ma locho e wiu uluwo Jehova Nyasachu, ubiro dhi maber.
15 To ka utamoru winjo dwond Jehova kendo utamoru luwo chike Jehova, Jehova biro kumou kaachiel gi wuoneu.+
16 Koro chung’uru mos mondo une gi wang’u hono maduong’ ma Jehova dwaro timo.
17 Donge magi kinde mag kayo ngano? Abiro kwayo Jehova mondo omi polo omor kendo koth ochue, eka ubiro ng’eyo ni utimo marach ahinya e nyim Jehova kuom kwayo ruoth mondo oloch e wiu.”+
18 Gie sano, Samuel ne olamo Jehova mi Jehova omiyo polo omor kendo koth ochue chieng’no mi oganda duto ne oluoro Jehova gi Samuel ahinya.
19 Ji duto ne owacho ne Samuel niya: “Kwanwa Jehova Nyasachi+ mondo kik watho, nimar wasetimo richo machielo e wi richowa mamoko duto kuom kwayo mondo omiwa ruoth.”
20 Omiyo, Samuel ne owacho ne ogandano niya: “Kik uluor. En adier ni usetimo richogo duto. Kata kamano, kik uwe luwo Jehova+ kendo tiuru ne Jehova gi chunyu duto.+
21 Kik uluw nyiseche manono+ ma ok nyal konyo+ kendo ok nyal reso ng’ato, nimar gin gik manono.
22 Jehova oseyierou mondo ubed joge+ kendo Jehova ok bi jwang’ou+ nikech nyinge maduong’.+
23 An to ok anyal timo richo e nyim Jehova kuom weyo ma ok alemonu kendo abiro dhi nyime puonjou yo mowinjore kendo makare.
24 To un, luoruru Jehova,+ tineuru gi adiera kendo gi chunyu duto nikech gik madongo mosetimonu.+
25 To ka utimo gik maricho gi wang’-teko, ibiro tieku+ un kaachiel gi ruodhu.”+
Weche Moler Piny
^ Hibrania, “pok uyudo gimoro e lweta.”
