Samuel Mokwongo 17:1-58
17 Jo-Filistia+ ne ochoko jolwenjgi mondo gidhi e lweny. Ne gichokore kama iluongo ni Soko+ e piny Juda mi ne gigoyo kambi Efes-damim+ manie kind Soko gi Azeka.+
2 To Saulo gi jolwenj Israel ne ochokore mi gigoyo kambi e Paw Ela+ kendo ne giikore kedo gi Jo-Filistia.
3 Jo-Filistia ne nie got moro to Jo-Israel ne nie got machielo, to hoho ne nie kindgi.
4 Eka ng’at moro ma thuon ma Ja-Gath+ miluongo ni Goliath+ ne owuok e kind jolweny mag Jo-Filistia. Borne ne en mita adek kama.*
5 Ne orwako ogudu mar mula kod akor mar mula.* Pek mar akorno+ ne en shekel 5,000.*
6 Bende, ne orwako mula ma geng’o ogwendene kendo noliero tong’+ mar mula e goke.
7 Ludh tong’no ne rom gi ludh jotweng’o+ kendo chuma ma ne olosgo wi tong’ ne en shekel 600.* Jating’ okumba ne otelo e nyime.
8 Ne ochung’ mi okok matek ne jolwenj Israel+ niya: “Ang’o momiyo uchanuru mondo uked kodwa? Ero an ka kaka thuon Jo-Filistia, un to un jotij Saulo. Yieruru ng’ato achiel mondo obi oked koda.
9 Ka okedo koda mi onega, to wabiro bedo wasumbniu. To ka akedo kode mi anege, to ubiro bedo wasumbniwa kendo ubiro tiyonwa.”
10 Ja-Filistiano ne owacho kama: “Ero athiano ne jolweny mag Israel+ kawuono. Keluru ng’ato mondo akedgo!”
11 Ka ne Saulo gi Jo-Israel duto owinjo weche Ja-Filistiano, ne gibwok ma gibedo maluor ahinya.
12 Koro Daudi ne en wuod Jesse+ ma Ja-Efratha+ ma ne odak Bethlehem+ man Juda. Jesse ne nigi yawuoyi aboro+ kendo ne en jaduong’ moti e kinde Saulo.
13 Yawuot Jesse adek madongo ne odhi gi Saulo e lweny.+ Wuoyi makayo ne iluongo ni Eliab,+ mar ariyo ne iluongo ni Abinadab,+ to mar adek ne en Shama.+
14 Daudi ne en chogo,+ to yawuoyi madongo adekgo e ma ne odhi gi Saulo.
15 Ka ne Daudi tiyo ne Saulo, ne ojadhiga kwayo rombe+ mag wuon mare Bethlehem kae to oduogo.
16 Gie kindeno, Ja-Filistiano ne thiano ne Jo-Israel okinyi godhiambo. Notimo kamano kuom ndalo 40.
17 Jesse ne onyiso Daudi wuode niya: “Kaw cham mobul efa* achiel kod makate apargi mondo itergi piyo ne oweteni e kambi.
18 To jotelo moket e wi jolweny aluf-aluf imi mor dhiang’* mong’in apargi. Bende, dhi inon ka be oweteni dhi maber, kae to iduogna gi gima nyiso ni gingima.”
19 Owetenego ne nigi Saulo kod jolweny mamoko duto mag Israel e Paw Ela+ ka gikedo gi Jo-Filistia.+
20 Omiyo, Daudi ne ochiewo gokinyi moweyo ng’ato mondo oritne rombe. Ne oting’o gik moko mi odhi mana kaka wuon-gi ne ochike. Ka ne ochopo e kambi, ne oyudo ka jolweny wuok ka goyo koko mar lweny.
21 Jo-Israel gi Jo-Filistia ne ochanore ne lweny ka jomoko ochung’ koni to moko ochung’ kocha.
22 Gikanyono, Daudi ne oweyo ne jarit osike gik ma noting’o mi oringo odhi ir jolweny. Ka ne ochopo, ne openjo kaka owetene dhi.+
23 Ka ne pod owuoyo, Goliath+ Ja-Gath, thuon Jo-Filistiacha nowuok e kind jolweny mochako yenyo kendo,+ mi Daudi ne owinje.
24 To ka jolweny duto mag Israel ne oneno ng’atno, luoro ne omakogi mi giwuok ng’wech.+
25 Jo-Israel ne wacho e kindgi niya: “Be uneno ng’at ma birocha? Obiroga thiano ne Jo-Israel.+ To ruoth osingo ni obiro miyo ng’ato ang’ata monege mwandu mang’eny, mi ochak omiye nyare mondo okendi,+ kendo joodgi ng’atno ok bi golo osuru kendo ok giniti tij achune e Israel.”
26 Daudi ne openjo jo ma ne ochung’ bute niya: “En ang’o mibiro mi ng’at monego Ja-Filistiacha mi ogolo ne Jo-Israel wich-kuot? Ja-Filistia ma ok oter nyanguni paro ni en ng’a ma dothian ne jolweny mag Nyasaye mangima?”+
27 Kendo jolweny ne onwoyone mana wecheka ka giwacho niya: “Ma e gima ibiro tim ne ng’at ma onege.”
28 Ka ne Eliab+ owadgi maduong’ owinje ka owuoyo gi jolweny, iye ne owang’ matek mi onyise niya: “Ang’o mokeli ka? To rombe matinka iweyo gi ng’a e thim?+ Ang’eyo kaka in ng’ama jahedhre kendo ang’eyo richo manie chunyi. Ibiro ka mana mondo ine lweny.”
29 Daudi ne odwoke niya: “Koro ang’o masetimo? Donge ne apenjo mana penjo!”
30 Ne oweyo owadgino mi odhi penjo ng’at machielo wachno,+ to ne omiye mana dwoko achielcha.+
31 Jomoko ne owinjo weche ma Daudi ne owacho mi ginyiso Saulo. Omiyo, Saulo ne ooro wach mondo oluongne Daudi.
32 Daudi ne owacho ne Saulo kama: “Kik luoro mak ng’ato nikech Ja-Filistiano. Abiro dhi kedo kode.”+
33 To Saulo ne odwoko Daudi niya: “In ok inyal kedo gi Ja-Filistiano nimar pod in mana wuoyi matin,+ to en osebedo jalweny a tinne.”
34 Eka Daudi ne onyiso Saulo kama: “Asebedo ka akwayo rombe wuora kendo chieng’ moro sibuor+ ne obiro mokawo rombo, to chieng’ machielo ondieg dubu bende ne obiro motimo kamano.
35 Ne alawo ondiegno mi agoye piny kendo areso rombo e dhoge. Ka ne otemo chung’ mondo oked koda, ne amako dinge magoye piny motho.
36 Ne anego sibuor kod dubu bende. Omiyo, abiro timo ne Ja-Filistia ma ok oter nyanguni mana kaka ne atimo ne ondiegigo, nimar osethiano ne jolweny mag Nyasaye mangima.”+
37 Daudi nomedo wacho kama: “Jehova ma ne oresa e kok sibuor kendo e kok dubu e ma biro resa e lwet Ja-Filistiani.”+ Kamano Saulo ne odwoko Daudi niya: “Dhi iked kode kendo Jehova obed kodi.”
38 Saulo ne okawo lepe mag lweny mi orwako ne Daudi. Ne orwakone ogudu mar mula kae to orwakone akor mar mula.
39 Eka Daudi notueyo ligangla kuom gik ma ne orwakogo, to ka ne otemo wuotho, wuoth notame nikech ne pok orwakogiga. Daudi ne owacho ne Saulo niya: “Ok anyal wuotho gi gigi nimar ok ang’iyo kodgi.” Omiyo, ne olonyogi.
40 Ne okawo ludhe kod kite abich mapoth ma ne okwanyo e aora mi oketogi e ofuko ma ne oting’o, to orujre+ ne oliero e lwete. Kae to ne ochako sudo machiegni gi Ja-Filistiano.
41 Ja-Filistiano ne ochako sudo machiegni gi Daudi ka jating’ne okumba otelo e nyime.
42 Ka ne Ja-Filistiano oneno Daudi, ne ochaye nimar Daudi ne en mana wuoyi matin kendo ma jachia.+
43 Omiyo, Ja-Filistia ne onyiso Daudi niya: “Iparo ni an guok+ ma dibina mana gi kete?” Kendo Ja-Filistiano ne okuong’o Daudi gi nying nyisechene.
44 Eka Ja-Filistiano nowacho ne Daudi kama: “Bi abiya. Abiro miyo winy mag polo gi le mag bungu ringreni mondo ocham.”
45 Daudi ne odwoko Ja-Filistia kama: “In ibiro ira gi ligangla kod tong’,+ to an abiro iri gi nying Jehova Nyasach ogendni mag lweny,+ Nyasach jolwenj Israel misethianone.+
46 Kawuononi Jehova dhi keti e lweta+ kendo abiro negi mi achod ng’uti. Abiro miyo winy mag polo kod le mag bungu ringre jolweny mag Jo-Filistia mondo gicham. Kendo ji duto e piny mangima biro ng’eyo ni nitie Nyasaye e piny Israel.+
47 Ji duto ma ochokore kae biro ng’eyo ni Jehova ok res ji gi ligangla kata gi tong’,+ nimar lweny en mar Jehova+ kendo obiro ketou uduto e lwetwa.”+
48 Ja-Filistia ne ochako sudo mondo orad gi Daudi, to Daudi ne oringo matek kochomo jolwenj Jo-Filistia mondo orad kode.
49 Daudi ne osoyo lwete e ofuko ma ne oting’o mi okawo kidi achiel moketo e orujre kae to obayo. Kidino ne ogoyo pat wi Ja-Filistia modonjo iye mi Ja-Filistiano opodho piny auma.+
50 Kamano, Daudi ne onego Ja-Filistia gi orujre kod kidi achiel. Ne onego Ja-Filistiano kata obedo ni ne oonge gi ligangla e lwete.+
51 Eka Daudi ne oringo mochung’ kuome, ne owuodho ligangla+ e nungo Ja-Filistiano mi ochodogo ng’ute mondo one ni onege chuth. Ka ne Jo-Filistia oneno ni ng’atgi ma thuon osetho, ne giwuok ng’wech.+
52 Gikanyono, Jolwenj Israel gi mag Juda ne omuoch gi koko matek ka gilawo Jo-Filistiago chakre hoho+ nyaka dho rangeye mag Ekron+ mi ginego Jo-Filistia mang’eny chakre yo ma wuok Shaaraim+ nyaka Gath kod Ekron.
53 Bang’ lawogi matek, Jo-Israel ne oduogo e kambi mar Jo-Filistia ma giyako mwandugi.
54 Daudi ne oting’o wi Ja-Filistiano motero Jerusalem, to gige lweny mag Ja-Filistiano ne otero e hemane.+
55 Ka ne Saulo oneno Daudi ka dhi rado gi Goliath Ja-Filistia, ne openjo Abner+ jatend jolweny niya: “Abner, wuoyini to en wuod ng’a?”+ Abner ne odwoke niya: “Ruodha, kuom adier, ok ang’eyo!”
56 Ruoth ne owacho niya: “Penjna ni wuon-gi en ng’a.”
57 Omiyo, ka ne Daudi oduogo bang’ nego Ja-Filistia, Abner ne okawe mapiyo mi otere e nyim Saulo koting’o wi Ja-Filistiano+ e lwete.
58 Saulo ne openjo Daudi niya: “Wuoyi matin, in wuod ng’a?” Daudi ne odwoke niya: “An wuod Jesse+ jatichni ma Ja-Bethlehem.”+
Weche Moler Piny
^ Bede auchiel gi lith lwedo moyar nyaka tung’. Som Apendiks B14.
^ Akorno ne en pien kata law mirwako e kor. Ne iriedo mula kuome ma miyo ochalo ogakla mag rech.
^ En kilo 57 kama. Som Apendiks B14.
^ En kilo 7 kama. Som Apendiks B14.
^ Efa achiel en lita 22. Som Apendiks B14.
^ Kata, “mo mabwo.”
