Samuel Mokwongo 22:1-23
22 Eka Daudi nowuok kanyo+ modhi e rogo man Adulam.+ Ka ne owetene gi joodgi duto owinjo wachno, ne gidhi ire kuno.
2 Bende, ji duto ma ne nigi chandruok, gi ma ne nigi gope, kod ma chunygi ne lit ne odhi ire mi nobedo jatendgi. Ji duto ma ne ni kode ne gin ji 400 kama.
3 Bang’e, Daudi nowuok kanyo mi odhi Mizpe e piny Moab. Ne okwayo ruodh Moab+ niya: “Yie mondo wuonwa gi minwa odag kodi kae nyaka chop ang’e gima Nyasaye biro timona.”
4 Omiyo, Daudi noweyogi gi ruodh Moab kendo ne gidak kuno kuom ndalo duto ma Daudi ne odhi pondo.+
5 Bang’ kinde, Gad+ janabi ne odhi monyiso Daudi kama: “Wuog ka mipondoeno mondo idhi e piny Juda.”+ Omiyo, Daudi nowuok mi odhi e bungu man Hereth.
6 Saulo nowinjo ni nitie jo ma noneno Daudi kaachiel gi joge. Noyudo Saulo obet e tiend yadh tamarisk* motwi e got moro e piny Gibea+ koting’o tong’ e lwete kendo jotije duto ne olwore.
7 Eka Saulo nowacho ne jotije ma ne olwore niya: “Winjuru, un Jo-Benjamin. Be wuod Jesse+ nyalo miyou uduto lope kod puothe mag mzabibu? Be onyalo ketou jotelo e wi ji aluf-aluf kendo e wi ji mia-mia?+
8 Uduto useriwona. Onge kata ng’ato achiel kuomu mosenyisa ni wuoda notimo singruok gi wuod Jesse.+ Onge ng’ato ang’ata kuomu ma dewa kendo onge ng’at mosenyisa ni wuoda ma anyuolo osethuwa gi jatichna konyise ni mondo obutna mana kaka otimo kawuononi.”
9 Eka Doeg+ Ja-Edom ma jatend jokwadh Saulo ma noyudo ochung’ kanyo ne onyise kama:+ “Ne aneno wuod Jesse ka obiro Nob ir Ahimelek wuod Ahitub.+
10 Kendo Ahimelek nopenjone wach kuom Jehova kae to omiye chiemo kod ligangla mar Goliath Ja-Filistia.”+
11 Gikanyono, ruoth nooro wach mondo oluongne Ahimelek wuod Ahitub kaachiel gi joodgi duto ma ne gin jodolo e piny Nob. Omiyo, giduto ne gibiro ir ruoth.
12 Saulo nowacho ne Ahimelek niya: “Winji, in wuod Ahitub,” to ne odwoke kama: “Awinji ruodha.”
13 Saulo nopenje niya: “Ang’o momiyo iseriwori gi wuod Jesse kendo isemiye makate kod ligangla mipenjone wach kuom Nyasaye? Okweda kendo koro obutona mana kaka otimo kawuononi.”
14 Ahimelek nodwoko ruoth niya: “Kuom jotiji duto, ere ng’at ma jaratiro moloyo Daudi?+ En or ruoth+ kendo en jatend jorit magi duto. Bende, en e ng’at ma omi luor ahinya e odi.+
15 Be ma e chieng’ ma ahango penjoe ne Daudi wach kuom Nyasaye?+ Ooyo, ok anyal timo ne ruoth gima rach. Kik itimna gima rach kaachiel gi jood wuora nikech ne ok ang’eyo gimoro amora ma dhi nyime.”+
16 Kata kamano, ruoth nodwoke niya: “Ahimelek, in gi jood wuoru duto+ nyaka utho.”+
17 Eka ruoth Saulo ne owacho ne jorit ma nolwore niya: “Neguru jodolo mag Jehova nikech giseriwore gi Daudi! Ne ging’eyo ni opondo to ne ok ginyisa!” Kata kamano, jotij ruoth ne ok dwar ting’o lwetgi mondo gineg jodolo mag Jehova.
18 Omiyo, ruoth nonyiso Doeg+ niya: “Neg jodolo!” Gikanyono, Doeg Ja-Edom+ nodhi monego jodologo en owuon. Ne onego jodolo 85.*+
19 Bende, nodhi mi omonjo Nob+ dala jodolo gi ligangla. Ne onego chwo gi mon, rowere gi nyithindo ma dhoth, ruedhi, punde, kod rombe.
20 Kata kamano, achiel kuom yawuot Ahimelek wuod Ahitub miluongo ni Abiathar+ ne otony mi oringo odhi ir Daudi.
21 Abiathar nonyiso Daudi kama: “Saulo onego jodolo mag Jehova.”
22 Eka Daudi nowacho ne Abiathar niya: “Ka ne aneno Doeg Ja-Edom chieng’cha, ne ang’eyo+ ni nyaka onyis Saulo. An e ma asemiyo oneg jood wuoru duto.
23 Omiyo, bed koda kae kendo kik iluor, nimar ng’at ma dwaro negi, dwaro nega an bende. Abiro konyi.”+
Weche Moler Piny
^ En yath ma siko ka ng’ich ma obokene tindo tindo, en gi maupe makwar kwar kod ma rochere.
^ Hibrania, “Chwo ma rwako efod mar kitani.”
