Samuel Mokwongo 3:1-21
-
Oket Samuel obed janabi (1-21)
3 Samuel ne odhi nyime tiyo+ ne Jehova e nyim Eli ka pod en nyathi. Kata kamano, kindeno wach ma a kuom Jehova ne nok, kendo fweny+ bende ne tin.
2 Gie kindeno, wang’ Eli ne osechako imore kendo koro ne ok onyal neno.+ Chieng’ moro, Eli ne nindo ka ma ne onindega,
3 to taya mar Nyasaye+ ne pod liel. Samuel to ne nindo e hekalu*+ mar Jehova ka ma Sandug Singruok mar Nyasaye ne nitie.
4 Eka Jehova ne oluongo Samuel, mi Samuel ne odwoko niya: “Antie.”
5 Ne oringo mi odhi ir Eli, monyise niya: “Asebiro, nikech awinjo ka iluonga.” Eli nodwoke ni, “Ok aluongi, dog adoga inindi.” Omiyo, ne odok nindo.
6 Jehova ne oluonge kendo niya: “Samuel!” Omiyo, Samuel nochung’ modhi ir Eli monyise kama: “Asebiro, nikech awinjo ka iluonga.” Eli nodwoke ni, “Wuoda, ok aluongi, dog adoga inindi.”
7 (Samuel ne pok ong’eyo Jehova maber, kendo Jehova ne pok ofwenyone wachne.)+
8 Jehova ne oluonge mar adek niya: “Samuel!” Nochung’ kendo modhi ir Eli monyise kama: “Asebiro, nikech awinjo ka iluonga.”
Eka Eli ne ofwenyo ni kare Jehova e ma ne luongo nyathino.
9 Omiyo, Eli ne onyiso Samuel niya: “Dog adoga inindi, to ka oluongi kendo, nyise niya, ‘Wuo awuoya Jehova, nikech jatichni winji.’” Omiyo, Samuel nodok nindo.
10 Jehova nobiro mochung’ kanyo mi oluonge mana kaka nosebedo koluonge. Ne oluonge ni, “Samuel, Samuel!” Samuel ne odwoke niya: “Wuo awuoya, nikech jatichni winji.”
11 Jehova ne onyiso Samuel kama: “Ne! Abiro timo gimoro e piny Israel ma ng’ato ang’ata mowinjo, nobuogi.*+
12 Chieng’no, abiro timo ne Eli gik moko duto ma ne asewacho ni abiro timo ne joode, a chakne nyaka giko.+
13 Dhi inyise ni akelo kum mosiko ne ode nikech ong’eyo ni yawuote ochayo+ Nyasaye to ok okwergi.+
14 Mano e momiyo asesingora ni onge misango kata chiwo moro amora ma nopwodh jood Eli kuom richogi.”+
15 Samuel ne onindo nyaka okinyi eka nochiewo moyawo dhout od Jehova. Ne oluor nyiso Eli fweny ma ne omiyeno.
16 Eli noluongo Samuel, to ka ne osebiro, nowachone niya: “Samuel, wuoda!” Samuel ne odwoke kama: “Antie.”
17 Ne openje niya: “En wach mane ma ne Nyasaye onyisi? Kik ipanda wachno. Nyasaye mondo omiyi kum mager kipandona kata mana wach achiel kuom weche duto mane onyisi.”
18 Omiyo, Samuel ne onyise gik moko duto ma ne onyise e fweny, ne ok opandone wach moro amora. Eka Eli nowacho niya: “Jehova e ma owacho. We mondo otim kaka oneno ni ber.”
19 Samuel ne odhi nyime dongo ka Jehova ni kode+ kendo Nyasaye ne omiyo weche duto ma ne Samuel owacho otimore.
20 Israel duto, chakre Dan nyaka Beer-sheba koro ne ong’eyo ni Samuel oseket mondo obed janabi mar Jehova.
21 Jehova ne odhi nyime fwenyore Shilo. Noyudo Jehova osefwenyore ne Samuel ka en Shilo kendo mano notimore kokalo kuom wach Jehova.+
