Weche mag Ndalo Mokwongo 11:1-47
11 Bang’ kinde, dhoudi duto mag Israel nodhi Hebron+ ir Daudi mi ginyise kama: “Wan mana oweteni.*+
2 Kinde mokalo ka ne Saulo en ruoth, in e ma niteloga ne Jo-Israel e lweny+ kendo Jehova Nyasachi ne onyisi niya: ‘Ibiro tayo Jo-Israel kendo ibiro bedo jatendgi.’”+
3 Omiyo, jodong Israel duto ne odhi Hebron ir Ruoth Daudi mi notimo kodgi singruok kuno e nyim Jehova. Kae to ne giwiro Daudi mondo obed ruodh Israel+ kaluwore gi wach ma Jehova nowacho kotiyo gi Samuel.+
4 Bang’e, Daudi gi Jo-Israel duto nodhi Jerusalem, tiende ni Jebus+ ka ma Jo-Jebus+ nodakie.
5 Jo-Jebus nojaro Daudi niya: “Ok inyal donjo kae!”+ Kata kamano, Daudi ne okawo Sayun,+ ma tinde iluongo ni Dala Daudi.+
6 Omiyo, Daudi nowacho niya: “Ng’at mokwongo dhi monjo Jo-Jebus biro bedo jatend lweny.” Joab+ wuod Zeruya nokwongo dhi mi nobedo jatend jolweny.
7 Daudi nochako dak ka mochiel motegno. Mano e momiyo ne giluongo kanyo ni Dala Daudi.
8 Nochako gedo e dalano duto chakre e Pith* nyaka kuonde molwore duto, kendo Joab noloso kuonde ma ne okethore e dalano duto.
9 Kamano Daudi nomedo bedo gi teko+ kendo Jehova Nyasach oganda lweny ne ni kode.
10 Koro magi e jotelo mag jolweny mathuondi mag Daudi ma ne osiro lochne motegno. Gin kaachiel gi Jo-Israel duto ne giriwore mondo giket Daudi obed ruoth kaluwore gi wach ma Jehova nowacho e wi Israel.+
11 Magi e jolweny mathuondi mag Daudi: Jashobeam+ wuod Ja-Hakmoni, ne en jatend jolweny adek mathuondi.+ Chieng’ moro ne onego ji mokalo 300 gi tong’.+
12 Ng’at ma ne luwe ne en Eleazar+ wuod Dodo Ja-Ahohi.+ Ne en achiel kuom jolweny adek mathuondi.
13 Ne en gi Daudi ka ma iluongo ni Pasdamim,+ ka ma Jo-Filistia ne ochokoree ne lweny. Ne nitie puodho mopidhie shairi mang’eny kendo jolweny noringo nikech Jo-Filistia.
14 En to ne ochung’ e dier pap mokedo mondo kik gikawe kendo ne onego Jo-Filistia mi Jehova nomiyogi loch maduong’.+
15 Ji adek kuom jotelo 30 ne odhi ir Daudi e rogo mar Adulam,+ to noyudo jolweny mag Jo-Filistia ogoyo kambi e Paw Refaim.+
16 Gie kindeno, Daudi nopondo kamoro, to jolweny mag Jo-Filistia nogoyo kambi Bethlehem.
17 Daudi ne owacho kama: “Mad ne ayudie pi soko man but ranga Bethlehem mondo amodhi!”+
18 Mi ji adekgo ne omuomo modonjo e kambi mar Jo-Filistia mi gitwomo pi soko man e ranga Bethlehem kae to gikelo ne Daudi. Kata kamano, notamore modho pigno mopuke ne Jehova.
19 Daudi nowacho kama: “Ok anyal timo gima kama e nyim Nyasacha! Ere kaka damodh remb jo ma ne oyie kata mana wito ngimagi?+ Nimar ne giketo ngimagi kama rach mondo gikelna pigni.” Omiyo, ne otamore modho pigno. Mago e gik mathuondi adekgo ne otimo.
20 Abishai+ owadgi Joab+ ne en jatend thuondi mamoko adek; ne onego ji 300 gi tong’ kendo ne en gi huma kaka thuondi adekgo.+
21 Kata obedo ni ne en gi huma moloyogi kendo notelonegi, ne ok ochopo e rang’iny mar thuondi adek mokwongoka.
22 Benaya+ wuod Jehoyada ne en jachir ma nokedo e lwenje mang’eny Kabzeel.+ Ne onego yawuoyi ariyo ma ne gin nyithind Ariel Ja-Moab. Chieng’ moro ka piny ng’ich,* ne odonjo e bur ka ma nitie pi monego sibuor kuno.+
23 Bende, ne onego Ja-Misri moro ma rabet ma borne ne romo bede abich.*+ Kata obedo ni Ja-Misri ne nigi tong’ ma rom gi ludh jotweng’o e lwete,+ ne odhine gi luth momaye tongeno monegego.+
24 Benaya wuod Jehoyada notimo magi duto kendo ne en gi huma mana ka thuondi adekgo.
25 Kata obedo ni ne en gi huma moloyo thuondi piero adekgo, ne ok ochopo e rang’iny mar thuondi adek mokwongoka.+ Kata kamano, Daudi ne okete e wi jolweny ma ne rite owuon.
26 Asahel+ owadgi Joab bende ne en achiel kuom thuondi piero adekgo. Jomoko ne gin: Elhanan wuod Dodo Ja-Bethlehem,+
27 Shamoth Ja-Haror, Helez Ja-Pelon,
28 Ira+ wuod Ikesh Ja-Tekoa, Abiezer+ Ja-Anathoth,
29 Sibekai+ Ja-Husha, Ilai Ja-Ahohi,
30 Maharai+ Ja-Netofa, Heled+ wuod Baana Ja-Netofa.
31 Ithai wuod Ribai Ja-Gibea mar Jo-Benjamin,+ Benaya Ja-Pirathon,
32 Hurai Ja-Gaash+ piny aoche, Abiel Ja-Arba,*
33 Azmaveth* Ja-Bahurim, Eliaba Ja-Shaalbon,
34 yawuot Hashem Ja-Gizon, Jonathan wuod Shagee Ja-Harar,
35 Ahiam wuod Sakar Ja-Harar, Elifal wuod Ur,
36 Hefer Ja-Mekera, Ahija Ja-Pelon,
37 Hezro Ja-Karmel, Naarai wuod Ezbai,
38 Joel owadgi Nathan, Mibhar wuod Hagri,
39 Zelek Ja-Amon, Naharai Ja-Beroth ma jating’ ne Joab wuod Zeruya gige lweny,
40 Ira Ja-Ithri, Gareb Ja-Ithri,
41 Uria+ Ja-Hiti, Zabad wuod Alai,
42 Adina wuod Shiza Ja-Reuben ma jatend joka Reuben kod ji 30 ma ne ni kode;
43 Hanan wuod Maaka, Joshafat Ja-Mithni,
44 Uzia Ja-Ashterath, Shama kod Jeiel, yawuot Hotham Ja-Aroer;
45 Jediael wuod Shimri, gi Joha owadgi ma Ja-Tizi;
46 Eliel Ja-Mahav, Jeribai kod Joshavia ma yawuot Elnaam, kod Ithma Ja-Moab;
47 Eliel, Obed, kod Jaasiel Ja-Mezoba.
Weche Moler Piny
^ Kata, “Wan ringreni kendo chokeni.”
^ Kata, “Milo,” ma en wach mitiyogo e dho Hibrania kiwuoyo kuom ka ma obiwie lowo.
^ Kata, “ka theluji ne ng’eny.”
^ Borne ne romo mita 2.23 kama (fut 7.3). Som Apendiks B14.
^ Kata, “Ja-Beth-araba.”
^ Kata, “Azmoth.”
