Weche mag Ndalo Mokwongo 12:1-40
-
Jo ma oriwo lwedo loch mar Daudi (1-40)
12 Magi e jolweny ma ne odhi Ziklag+ ir Daudi e kinde ma Daudi ne ok nyal wuotho e lela nikech Saulo+ wuod Kish. Gin e moko kuom jolweny mathuondi ma ne osiro Daudi e lweny.+
2 Ne gimanore gi atung’ kendo ne ginyalo tiyo gi lwetegi ma korachwich kata ma koracham+ e bayo asere kata bayo kite gi orujre.+ Ne gin owete Saulo, jodhood Benjamin.+
3 Jatelo ne en Ahiezer, kaachiel gi Joash. Ne gin yawuot Shemaa Ja-Gibea.+ Ne nitie bende Jeziel kod Pelet ma yawuot Azmaveth,*+ Beraka, Jehu Ja-Anathoth,
4 gi Ishmaya Ja-Gibeon,+ ma ne en achiel kuom jolweny mathuondi 30+ kendo en e ma notelonegi. Bende, Jeremia, Jahaziel, Johanan, Jozabad Ja-Gedera,
5 Eluzai, Jerimoth, Bealia, Shemaria, Shefatia Ja-Harif,
6 Elkana, Ishia, Azarel, Joezer, gi Jashobeam Ja-Kora,+
7 kod Joela gi Zebadia ma yawuot Jeroham Ja-Gedor.
8 Moko kuom Jo-Gad ne odhi ir Daudi e thim ka ma nopondoe.+ Ne gin jolweny mathuondi kendo motieg ne lweny, ne giting’o okumbni madongo kod tonge. Wengegi ne chalo gi wenge sibuor kendo tiendegi ne yot ka tiende mwanda manie gode.
9 Ezer ne en jatelo, Obadia ne en mar ariyo, Eliab ne en mar adek,
10 Mishmana ne en mar ang’wen, Jeremia ne en mar abich,
11 Atai ne en mar auchiel, Eliel ne en mar abiriyo,
12 Johanan ne en mar aboro, Elzabad ne en mar ochiko,
13 Jeremia ne en mar apar, to Makbanai ne en mar 11.
14 Ne gin Jo-Gad+ kendo ne gin jotend lweny. Ng’at ma tekone ne tinie mogik ne nyalo rakore gi ji 100, to ma tekone ne ng’enyie mogik ne nyalo rakore g ji 1,000.+
15 Gin e jo ma nong’ado Jordan e dwe mokwongo ka ne opong’ mi oo, kendo ne giriembo ji duto ma ne odak e pewe man yo wuok chieng’ kod man yo podho chieng’.
16 Moko kuom Jo-Benjamin kod Jo-Juda bende ne odhi ir Daudi ka ma nopondoe.+
17 Eka Daudi nodhi irgi mowachonegi kama: “Ka ubiro ira gi kuwe mondo ukonya, to arwakou. To ka ubiro mondo undhoga ne wasika to onge gima rach ma asetimo, we mondo Nyasach kwerewa one wachno kendo ong’ad bura.”+
18 Roho nobiro kuom Amasai+ jatend thuondi 30 mi owacho niya:
“Wan magi, A Daudi, kendo wariwi lwedo, A wuod Jesse.+
Kuwe, kuwe mondo obed kodi, kendo kuwe mondo obed gi jo ma konyi,
Nimar Nyasachi e ma konyi.”+
Omiyo, Daudi norwakogi kendo noketogi gibed jotend jolweny kaachiel gi jotelo mamoko.
19 Moko kuom Jo-Manase bende ne odok ne Daudi kinde ma Daudi nobiro gi Jo-Filistia mondo giked gi Saulo. Kata kamano, ne ok okonyo Jo-Filistia, nikech bang’ ka ne Jo-Filistia osewuoyo gi ruodhigi+ e wi wachno, ne giriembo Daudi ka giwacho niya: “Obiro dok ne Saulo ruodhe kendo mano biro miyo onegwa.”+
20 Ka ne odhi Ziklag,+ Jo-Manase ma ne odokne e magi: Adna, Jozabad, Jediael, Mikael, Jozabad, Elihu, kod Zilethai. Ne gin jotelo mag ji aluf-aluf e dhood Manase.+
21 Ne gikonyo Daudi kedo gi jomecho, nimar giduto ne gin thuondi ma jochir+ kendo ne gibedo jotend lweny.
22 Ji ne medo biro ir Daudi+ odiechieng’ kodiechieng’ nyaka kambi nobedo maduong’ kaka kambi mar Nyasaye.+
23 Magi e kwan jotend jolweny ma ne odhi Hebron+ ir Daudi mondo gilokne loch mar Saulo kaka Jehova nosechiko.+
24 Jolweny mag Juda ma ne ting’o okumbni gi tonge kendo ma ne oikore ne lweny ne gin 6,800.
25 To jolweny mag dhood Simeon mathuondi kendo ma jochir ne gin ji 7,100.
26 Kuom Jo-Lawi ne nitie jolweny 4,600.
27 Jehoyada+ e ma notelo ne yawuot Harun,+ kendo ne en gi ji 3,700,
28 kaachiel gi Zadok+ wuoyi mathuon kendo ma jachir. Ne en gi jotelo 22 ma nowuok e anyuolagi.
29 Jolweny mag dhood Benjamin owete Saulo+ ne gin 3,000. Ng’enygi ne osebedo ka omakore gi od Saulo.
30 Jolweny mag Efraim ne gin ji 20,800 mathuondi kendo ma jochir. Ne gin jo ma nigi huma e anyuolagi.
31 Jolweny mag nus dhood Manase ma ne oyier mondo odhi oket Daudi obed ruoth ne gin ji 18,000.
32 Jolweny mag dhood Isakar ma ne ong’eyo gima Jo-Israel onego otim kod sa monego otimee, ne gin jotelo 200 kendo gin e ma ne gichiko owetegi duto.
33 Jo dhood Zebulun ma ne nyalo tiyo e lweny ne gin ji 50,000 kendo ne ginyalo chanore ne lweny gi gik kedo duto. Ne giriwo Daudi lwedo gi chunygi duto.
34 E dhood Naftali ne nitie jotelo 1,000 kendo ne gin gi ji 37,000 moting’o okumbni madongo kod tonge.
35 Jo ma ne nyalo chanore ne lweny ma nowuok e dhood Dan ne gin ji 28,600.
36 To jo ma nowuok Asher ma ne nyalo chanore ne lweny ne gin ji 40,000.
37 To jo ma nowuok loka Jordan,+ e dhood Reuben, dhood Gad, kod nus mar dhood Manase ne gin jolweny 120,000 momanore gi kit gige lweny duto.
38 Jogi duto ne gin jolweny ma ne oriwore mondo gikedi. Ne gibiro Hebron ir Daudi gi chunygi duto mondo gikete ruoth e wi Israel duto. Jo-Israel duto bende ne oyie mondo Daudi obed ruoth.+
39 Ne gibet gi Daudi kuno kuom ndalo adek ka gichiemo kendo gimetho nikech owetegi ne oseikonegi gik moko.
40 Bende, jo ma ne odak machiegni kanyo kod jo ma ne wuok mabor e dhout Isakar, Zebulun, kod Naftali ne kelonegi chiemo gi punde, ngamia, nyumbu,* kod dhok. Ne gikelo mogo, olembe mag ng’owo mong’in, mzabibu motuo, divai, mo, dhok, kod rombe mang’eny. Ne gitimo kamano nikech mor ne nitie e Israel.
