Weche mag Ndalo Mokwongo 14:1-17
14 Hiram+ ruodh Turo ne ooro joote ir Daudi. Bende, nokowone yiend sida, gi jogedo ma gero ohinga gi kite, gi funde bao mondo ogerne ot.+
2 Omiyo, Daudi nong’eyo ni Jehova noseguro pinyruodhe motegno,+ nimar ne omiyo obedo ruoth maduong’ nikech joge Israel.+
3 Daudi ne okendo mon mamoko+ Jerusalem mi nonyuolo nyithindo mamoko ma yawuoyi gi ma nyiri.+
4 Magi e nyinge nyithinde ma ne onyuolo ka en Jerusalem:+ Shamua, Shobab, Nathan,+ Solomon,+
5 Ibhar, Elishua, Elpelet,
6 Noga, Nefeg, Jafia,
7 Elishama, Beeliada, kod Elifelet.
8 Ka ne Jo-Filistia owinjo ni oseket Daudi mondo obed ruodh Israel duto,+ giduto ne gidhi manye.+ Ka ne Daudi owinjo wachno, ne odhi mondo oked kodgi.
9 Eka Jo-Filistia nobiro mochako monjo jo ma ne odak e Paw Refaim.+
10 Daudi nopenjo Nyasaye niya: “Be anyalo dhi kedo gi Jo-Filistiagi? To be ibiro chiwogi e lweta?” Jehova nonyiso Daudi kama: “Dhiyo, nikech abiro chiwo Jo-Filistiago e lweti.”+
11 Omiyo, Daudi ne odhi Baal-perazim+ monego Jo-Filistia kuno. Eka nowacho niya: “Nyasaye madier osekonya tieko jowasika mana ka pi momwomo ohinga.” Mano e momiyo ne giluongo kanyo ni Baal-perazim.*
12 Jo-Filistia nojwang’o nyisechegi kanyo kendo Daudi nogolo chik mowang’gi.+
13 Bang’ kinde, Jo-Filistia noduogo mi gimonjo pawno kendo.+
14 Daudi nopenjo Nyasaye wach kendo, mi nodwoke kama: “Kik ichomri kodgi tir to lwor ka tokgi kae to imonjgi e nyim bungu.*+
15 To ka iwinjo tiend jo ma wuotho e wi bunguno, to ikaw okang’ mapiyo, nimar mano biro nyiso ni Nyasaye madier osetelo e nyimi mondo okonyi loyo jolweny mag Jo-Filistia.”+
16 Omiyo, Daudi notimo mana kaka Nyasaye madier nochike+ kendo ne ginego jolweny mag Jo-Filistia chakre Geba nyaka Gezer.+
17 Humb Daudi ne olandore e pinje duto kendo Jehova nomiyo ogendni obedo maluor nikech en.+
