Weche mag Ndalo Mokwongo 22:1-19
22 Daudi nowacho niya: “Ma en od Jehova Nyasaye madier, kendo ma en kendo mar wang’o misango ne Jo-Israel.”+
2 Daudi nochiko ni ochok jodak+ ma ne ni e piny Israel, kae to ne omiyogi tich mar kunyo kite kendo payogi mondo ogergo od Nyasaye madier.+
3 E wi mano, Daudi noiko musmende modhuro mondo olosgo dhoudi mag rangeye kod gik miripogo. Noiko bende mula mang’eny mokalo apima,+
4 kod bepe mag yiend sida+ ma ok nyal kwan nikech Jo-Sidon+ kod Jo-Turo+ nokelone bepe sida modhuro.
5 Daudi nowacho niya: “Solomon wuoda pod tin kendo pok ong’eyo weche mang’eny,+ to ot monego oger ne Jehova onego obed ot malich miwuoro+ mondo humb odno kod berne+ olandre e piny duto.+ Kuom mano, abiro ikone gik mobiro tiyogo.” Omiyo, Daudi noikone gik mang’eny ahinya ka pok otho.
6 E wi mano, noluongo Solomon wuode mochike mondo oger ot ne Jehova Nyasach Israel.
7 Daudi nowacho ne Solomon wuode niya: “Ne agombo ahinya gero ot ne nying Jehova Nyasacha.+
8 Kata kamano, Jehova noorona wach niya: ‘Isechuero remo mang’eny ahinya kendo isekedo lwenje madongo ahinya. Ok ibi gero ot ne nyinga+ nikech isechuero remo mang’eny e nyima.
9 Ibiro nyuolo wuoyi+ ma nobed ng’at kuwe. Abiro miye kuwe e kind wasigu duto molwore.+ Ibiro luonge ni Solomon*+ kendo nakel ne Jo-Israel kuwe ka amiyogi yueyo e ndalone.+
10 En e ma obiro gero ot ne nyinga.+ Nobed wuoda to an nabed wuon mare,+ kendo abiro guro lochne e wi Israel nyaka chieng’.’+
11 “Koro wuoda, Jehova mondo obed kodi kendo gik moko duto mitimo odhi maber. Ger od Jehova Nyasachi mana kaka osewacho ni ibiro timo.+
12 To Jehova mondo omiyi rieko gi ng’eyo+ ka osemiyi teko e wi Israel duto mondo idhi nyime luwo chik Jehova Nyasachi.+
13 Kiluwo adimba chike+ kod buche ma Jehova nomiyo Musa mondo omi Jo-Israel,+ to gik moko duto mitimo biro dhi maber. Bed gi chir kendo gi teko. Kik iluor kendo kibaji kik goyi.+
14 Asetiyo matek ahinya mondo aik ne od Jehova dhahabu talanta* 100,000, gi fedha talanta 1,000,000, kod mula gi nyinyo+ modhuro mokalo apima. Kendo aseiko bepe kod kite,+ to pod ibiro medo moko.
15 In kod jotich mang’eny ahinya; jopa kite, jogedo gi kite,+ funde bao, kod kit jotich mamoko duto.+
16 To dhahabu, fedha, mula, kod nyinyo bende ng’eny mokalo apima.+ A malo mondo ichak tich kendo Jehova obed kodi.”+
17 Daudi nochiko jodong Israel duto mondo okony Solomon wuode. Nowachonegi niya:
18 “Donge Jehova Nyasachu ni kodu, kendo osemiyou kuwe kuonde duto? Nimar oseketo weg pinyni e lweta kendo Jehova gi ogandane oseloyogi.
19 Omiyo, ng’aduru gi chunyu duto mondo umany Jehova Nyasachu+ kendo uchak gero od Jehova Nyasaye madier,+ mondo ukel sandug singruok mar Jehova kod gik maler mitiyogo e od Nyasaye+ madier e ot moger ne nying Jehova.”+
Weche Moler Piny
^ Tiend nyingno en “Kuwe” e dho Hibrania.
^ Talanta achiel ne romre gi kilo 34.2. Som Apendiks B14.
