Weche mag Ndalo Mokwongo 29:1-30
29 Ruoth Daudi nowacho ne oganda Israel ma ne osechokore kama: “Solomon wuoda ma Nyasaye oseyiero+ pod en wuoyi matin+ kendo okiya gik mang’eny to tich duong’, nimar hekalu midwaro ger ok en mar dhano, to en mar Jehova Nyasaye.+
2 Asetiyo matek ahinya mondo aik gik ma dwarore ne od Nyasaye, asechiwo dhahabu ne gik miloso gi dhahabu, fedha ne gik miloso gi fedha, mula ne gik miloso gi mula, nyinyo ne gik miloso gi nyinyo,+ bepe+ ne gik miloso gi bao, kite mag oniks, kite mipango gi simiti moseruw, gi kite* mabeyo, kod kite mamoko duto ma nengogi tek, kaachiel gi kite mag alabasta mang’eny ahinya.
3 Nikech ahero od Nyasacha,+ achiwo bende dhahabu kod fedha ma agolo kar kenona awuon+ mondo otigo e gero ot maler.
4 Gigo oriwo talanta* 3,000 mag dhahabu mowuok Ofir+ kod talanta 7,000 mag fedha maler mondo omwon e kor odno,
5 gi dhahabu ne gik miloso gi dhahabu, fedha ne gik miloso gi fedha, kod ne tije duto ma funde onego otim. Koro ere ng’at ma dwaro chiwore mondo okel mich ne Jehova kawuono?”+
6 Kuom mano, jotelo mag anyuola gi jotelo mag dhout Israel, gi jotelo e wi ji aluf achiel-achiel gi ji mia-mia,+ kod jotelo ma nochung’ ne tije ruoth,+ nochiwore.
7 Ne gichiwogi mondo olosgo od Nyasaye madier. Ne gichiwo talanta 5,000 mag dhahabu, darik* 10,000, talanta 10,000 mag fedha, talanta 18,000 mag mula, kod talanta 100,000 mag nyinyo.
8 Ng’ato ang’ata ma ne nigi kite mabeyo ne okelo mondo okan-gi e kar keno mar od Jehova ma Jehiel+ Ja-Gershon ne rito.+
9 Ji ne mor ahinya gi golo chiwogo, nimar ne gigolo chiwogo ne Jehova kuom herogi kendo gi chunygi duto.+ Ruoth Daudi bende ne mor sidang’.
10 Eka Daudi nopako Jehova e nyim oganda duto. Nowacho niya: “Opak Jehova, Nyasach Israel wuonwa nyaka chieng’.
11 A Jehova, duong’+ gi teko+ gi ber gi pak gi loch+ gin magi. Nimar gik moko duto manie polo gi piny gin magi.+ Pinyruoth en mari, A Jehova.+ In e ma iting’ori malo e wi gik moko duto.
12 Mwandu gi duong’ wuok kuomi,+ ilocho e wi gik moko duto,+ kendo loch+ gi teko+ nie lweti. Lweti e ma nyalo miyo ng’ato duong’+ kendo in e ma imiyo ji duto teko.+
13 Omiyo, A Nyasachwa, wagoyoni erokamano kendo wapako nyingi maduong’.
14 “Kata kamano, an to an ng’a, kendo joga gin ng’a, momiyo wanyalo goloni chiwo ma kama? Nimar gik moko duto owuok kuomi, kendo wasemiyi mana gik mowuok e lweti.
15 E wang’i wan mana welo kendo jodak mana kaka kwerewa duto.+ Nimar ndalowa e piny chalo mana gi tipo,+ ok wanyal siko.*
16 A Jehova Nyasachwa, mwandugi duto ma wasechoko mondo wager ot ne nyingi maler, owuok e lweti kendo gin magi.
17 A Nyasacha, ang’eyo maler ni inono chuny dhano,+ kendo imor gi tim matir.+ Asegolo chiwogi duto gi chuny maler, kendo amor ahinya neno jogi man kaegi ka goloni chiwo gi chuny mamor.
18 A Jehova Nyasach kwerewa ma Ibrahim, Isaka, kod Israel, yie imi jogi osik gi chuny ma ginyisoni nyaka chieng’, kendo gitini gi chunygi duto.+
19 Kony Solomon wuoda otini gi chunye duto,+ mondo orit chikeni,+ gi weche miparone, kod bucheni, kendo otim wechegi duto, kendo oger hekalu ma aseikone gik moko.”+
20 Eka Daudi nowacho ne oganda duto niya: “Koro, pakuru Jehova Nyasachwa.” Omiyo, oganda duto nopako Jehova Nyasach kweregi, mi gikulore piny e nyim Jehova kendo e nyim ruoth.
21 Kinyne, ne gidhi nyime golo misengni ne Jehova kod chiwo miwang’o+ ne Jehova. Ne gigolo nyiruedhi 1000, yimbe 1000, nyiyimbe 1000, kaachiel gi chiwo miolo migolo gi jamnigo.+ Ne gichiwo misengni modhuro ne Israel duto.+
22 E odiechieng’no, ne gichiemo kendo ne gimetho e nyim Jehova ka gimor ahinya.+ Ne gichako giwalo Solomon wuod Daudi mondo obed ruoth, kendo ne giwire gi mo e nyim Jehova mondo obed jatendgi,+ bende, ne giwalo Zadok mondo obed jadolo.+
23 Solomon nobet e kom-loch mar Jehova,+ mokawo kar Daudi wuon mare. Wechene nodhi maber kendo Jo-Israel duto ne winje.
24 Jotelo duto,+ gi jolweny mathuondi,+ kod yawuot Ruoth Daudi+ duto ne obolore e bwo Ruoth Solomon.
25 Kendo Jehova ne omiyo Solomon duong’ matamre gi nono e wang’ Jo-Israel duto. Ne omiye loch ma nigi huma moloyo ruodhi duto ma noselocho e wi Israel.+
26 Kuom mano, Daudi wuod Jesse nolocho e wi Israel duto.
27 Nolocho e wi Israel kuom higni 40. Ne olocho kuom higni 7 ka en Hebron,+ to higni 33 ka en Jerusalem.+
28 Ne otho koti,+ kendo ka hike oniang’ maber, ka en gi mwandu kod duong’. Kendo wuode ma Solomon nobedo ruoth kare.+
29 Weche duto e wi ngima Ruoth Daudi a chakruokgi nyaka gikogi, yudore e weche Samuel janen, janabi Nathan,+ kod Gad+ janen,
30 kaachiel gi lochne duto, gi duong’ne, kod gik moko duto ma notimore e kindene, ma ne mulo ngimane, ngima Jo-Israel, kod pinjeruodhi duto ma nokiewo kodgi.
Weche Moler Piny
^ Kite mokiko-okiko.
^ Talanta achiel ne romre gi kilo 34.2. Som Apendiks B14.
^ Darik ne en pes Jo-Persia molos gi dhahabu. Som Apendiks B14.
^ Kata, “waonge geno.”
