Weche mag Ndalo Mokwongo 5:1-26
5 Magi e yawuot Reuben+ wuod Israel makayo. Ne en wuoyi makayo, to nikech nodwanyo otanda wuon mare,+ ne omaye ratiro mar bedo wuoyi makayo momi yawuot Josef+ wuod Israel. Kuom mano, ne ok okwane kaka wuoyi maduong’ e kind owetene.
2 Kata obedo ni Juda+ noloyo owetene gi duong’ kendo en e ma jatelo nowuok kuome,+ ratiro mar wuoyi makayo to ne obedo mar Josef.
3 Yawuot Reuben, wuod Israel makayo, ne gin Hanok, Palu, Hezron, kod Karmi.+
4 Joel nonyuolo Shemaya, Shemaya nonyuolo Gog, Gog nonyuolo Shimei,
5 Shimei nonyuolo Mika, Mika nonyuolo Reaya, Reaya nonyuolo Baal,
6 to Baal nonyuolo Beera, ma Tilgath-pilneser+ ruodh Asuria notero e tuech. Ne en jatelo e dhood Reuben.
7 Ma e kaka ochan owetene duto kaluwore gi tiengegi kod anyuolagi; Jeiel ma ne en jatendgi, Zekaria,
8 gi Bela wuod Azaz, ma wuod Shema wuod Joel. Ne gidak chakre Aroer+ nyaka Nebo kod Baal-meon.+
9 Bende, ne gidak yo wuok chieng’ nyaka ka ma thim manie Aora Yufrate+ ochakoree, nimar jambgi nosemedore mobedo mang’eny e piny Gilead.+
10 E ndalo Saulo, ne gikedo gi Jo-Hagri mi giloyogi kendo ne gidak e hembegi e alwora duto man yo wuok chieng’ mar Gilead.
11 Nyikwa Gad nogoyo tong’ kodgi, chakre piny Bashan nyaka Saleka.+
12 E piny Bashan, Joel ne en jatelo, Shafam ne jalupne. Bende, ne nitie Janai kod Shafat.
13 Kendo owetegi moa e dhoutgi ne gin Mikael, Meshulam, Sheba, Jorai, Jakan, Zia, kod Eber, duto ji abiriyo.
14 Magi ne gin yawuot Abihail ma wuod Huri wuod Jaroa wuod Gilead wuod Mikael wuod Jeshishai wuod Jado wuod Buz.
15 Ahi wuod Abdiel ma wuod Guni, ne en jatelo e dhoodgi.
16 Ne gidak Gilead,+ gi Bashan+ kod mier matindo molwore, kaachiel gi pewe duto mag Sharon nyaka ka ma ne gichopoe.
17 Nondik nyingegi kaluwore gi tiengegi kod anyuolagi e ndalo Jotham+ ruodh Juda kod e ndalo Jeroboam*+ ruodh Israel.
18 Dhood Reuben, gi dhood Gad, kod nus mar dhood Manase ne nigi jolweny ma roteke 44,760 ma ne ting’o okumba gi ligangla kendo ma ne omanore gi atung’. Ne gin jo ma otieg ne lweny.
19 Ne gikedo gi Jo-Hagri,+ Jetur, Nafish,+ kod Nodab.
20 Nyasaye ne okonyogi loyogi mi ne oketo Jo-Hagri gi ji duto ma ne ni kodgi e lwetgi nikech ne gikwayo Nyasaye mondo okonygi e lwenyno, kendo Nyasaye nowinjo ywakgi nikech ne gigene.+
21 Ne gikawo ngamia 50,000, rombe 250,000 kod punde 2,000 kaachiel gi ji 100,000.
22 Ji mang’eny ne otho nimar Nyasaye madier e ma nokedo e lwenyno.+ Kae to ne gidak e pinyno nyaka e kinde ma notergi e tuech.+
23 Nyikwayo ma wuok e nus mar dhood Manase+ nodak chakre piny Bashan nyaka Baal-hermon gi Senir kod Got Hermon.+ Ne ging’eny ahinya.
24 Magi e jotelo mag dhoutgi: Efer, Ishi, Eliel, Azriel, Jeremia, Hodavia, kod Jadiel. Ne gin jolweny ma roteke, mong’ere, kendo ne gin jotelo e dhoutgi.
25 Kata kamano, ne ok gimakore gi Nyasach kweregi kendo ne giterore gi nyiseche mag ogendni ma ne gidak e pinygi,+ ogendni ma Nyasaye notieko e nyimgi.
26 Kuom mano, Nyasaye nomiyo Pul ruodh Asuria+ (ma en Tilgath-pilneser+ ruodh Asuria) otero Jo-Reuben, Jo-Gad, gi nus mar dhood Manase e tuech e piny Hala, Habor, Hara, kod e aora Gozan,+ ka ma pod gidakie nyaka kawuononi.
Weche Moler Piny
^ Tiende ni, Jeroboam mar Ariyo.
