Mar Ariyo ne Jo-Korintho 13:1-14
13 Mae koro e kinde mar adek ma adwaro biro iru. “Wach joneno* ariyo kata adek onyis adiera mar wach.”+
2 Kata obedo ni aonge sani, chal mana ka gima antiere kodu e limbena mar ariyo, kendo achiwo siem motelo ne jo ma nosetimo richo kod jomamoko, mondo ka po ni aduogo kendo, ok anawe ma ok akawonegi okang’,
3 nikech umanyo mondo ung’e ratiro ka be adier Kristo wuoyo kokalo kuoma. En ok oyom yom kuom gik ma otimonu, to otimonugi gi teko.
4 Nimar adier ne onege e yath nikech ne onyap kaka dhano, to ongima nikech teko mar Nyasaye.+ En adier ni wanyap kaka en bende ne onyap, to wanabed mangima kode+ kokalo kuom teko ma Nyasaye nyiso kuomu.+
5 Sikuru ka unonoru mondo une ka be un e yie; sikuru ka unyiso gadier gima un uwegi.+ Koso ok ung’eyo ni Yesu Kristo ni e winjruok achiel kodu? Mak mana ka Nyasaye ok oyie kodu.
6 Adier, ageno ni ubiro fwenyo ni wan jo ma Nyasaye oyiego.
7 Koro walamo Nyasaye, ni kik utim gima ok kare, ok ni mondo wanenre kaka jo ma Nyasaye oyiego, to mondo utim gik mabeyo, kata ka di po ni wanenore kaka jo ma Nyasaye ok oyiego.
8 Nimar ok wanyal timo gimoro amora ma kwedo adiera, to mana ma siro adiera.
9 Kuom adier, wamor sa moro amora ma wanyap, to un, un gi teko. Kendo gima walamonu e ma, ni udhi nyime rieyo pachu.
10 Mano e momiyo andiko wechegi sa ma aonge, mondo sa ma antiere, kik abed mager ka atiyo gi teko ma Ruoth+ nomiya mar gerou to ok mukou.
11 Mogik, owetena, dhiuru nyime bedo moil, ka uyie mondo orieu, ohou,+ ka ubedo gi winjruok e paro,+ ka udak gi kuwe;+ mondo Nyasach hera kod kuwe+ obed kodu.
12 Mosreuru ng’ato gi ng’ato gi nyoth maler.
13 Jo maler duto ooronu mos.
14 Ng’wono mogundho mar Ruoth Yesu Kristo, kod hera mar Nyasaye kaachiel gi ber ma wayudo koa kuom roho maler, obed kodu uduto.
Weche Moler Piny
^ Grik, “Dho joneno.”
