Ruodhi mar Ariyo 19:1-37
19 Ka Ruoth Hezekia nowinjo wechego, ne oyiecho lepe, mi orwako lep gunia, kae to odhi e od Jehova.+
2 Eka ne ooro Eliakim wuod Hilkia ma nochung’ ne od ruoth, gi Shebna jagoro, kaachiel gi jodong jodolo ir janabi Isaya+ wuod Amoz. Ne gidhi ire ka girwako lep gunia.
3 Ne giwachone niya: “Ma e gima Hezekia owacho, ‘Kawuono en chieng’ chandruok, ayany, kod wich-kuot; muoch kayo mine, to gionge gi teko mar nyuol.+
4 Koro, wakwayi ni ilem ne jo ma pod odong’, nimar samoro Jehova Nyasachi+ biro winjo weche duto ma ruodh Asuria oseorogo Rabshake mondo oyany Nyasaye mangima, kendo Jehova Nyasachi+ biro kume nikech weche ma osewachogo.’”
5 Omiyo, jotich Hezekia ne odhi ir Isaya.+
6 Eka Isaya ne owachonegi niya: “Dhiuru uwach ne ruodhu ni Jehova owacho kama: ‘Kik iluor+ nikech weche ma isewinjo ka joote mag ruodh Asuria yanyago.+
7 Abiro loko pache, kendo obiro winjo wach moro mi nodog e pinye. Abiro miyo onege gi ligangla e pinye owuon.’”+
8 Ka ne Rabshake owinjo ni ruodh Asuria osewuok Lakish,+ ne odok ire mi oyude ka okedo gi Libna.+
9 Ruodh Asuria nowinjo ni Tirhaka ruodh Ethiopia osebiro kedo kode. Omiyo, ne ooro joote+ kendo ir Hezekia kowacho niya:
10 “Dhiuru unyis Hezekia ruodh Juda niya: ‘Kik iwe mondo Nyasachi ma igeno kuomeno owuondi ni Jerusalem ok bi podho e lwet ruodh Asuria.’+
11 Isewinjo kaka ruodhi mag Asuria oseketho pinje duto ma ne gikedogo.+ Koro iparo ni in e ma ibiro kwo?
12 Ere Gozan, Haran,+ Rezef, kod jo Eden ma nodak Eden Tel-asar? Be nyiseche ma ogendnigo ne lamo noresogi adier e lwet kwerena?
13 Bende, ere ruodh Hamath, gi ruodh Arpad, gi ruodh mier mag Sefarvaim, gi Hena, kod Iva?”+
14 Hezekia ne okawo barupe ma jootego nokelone, mi nosomogi. Eka nodhi e od Jehova mi oyaro barupego e nyim Jehova.+
15 Kendo Hezekia ne ochako kwayo+ Jehova kowacho niya: “A Jehova Nyasach Israel mobet e kom-lochne e wi* jokerubi.+ In kendi e Nyasaye madier e wi pinjeruodhi duto manie piny.+ In e ma ne ichueyo polo gi piny.
16 Yaye Jehova, chik iti mondo iwinji!+ A Jehova, yaw wang’i+ mondo ine! Winjie weche ma Senakerib oseoro mondo oyanygo Nyasaye mangima.
17 A Jehova, en adier ni ruodhi mag Asuria oseketho ogendni mamoko kaachiel gi pinjegi.+
18 Kendo gisewito nyisechegi e mach, nikech ne ok gin nyiseche,+ to ne gin mana gik ma dhano oloso gi lwetegi+ ka gitiyo gi bao kod kite. Mano e momiyo ne gikethogi.
19 To koro, A Jehova Nyasachwa, wakwayi ni ireswa e lwete mondo pinjeruodhi duto mag piny ong’e ni in kendi e Nyasaye, yaye Jehova.”+
20 Eka Isaya wuod Amoz ne ooro wach ne Hezekia kama: “Jehova Nyasach Israel owacho ni, ‘Asewinjo kaka ikwaya+ e wach Senakerib ruodh Asuria.+
21 Ma e gima Jehova osewacho kuome:
“Nyar Sayun ma silili osechayi, kendo ojari.
Nyar Jerusalem kinoni wiye.*
22 Ng’ano ma isejaro kendo yanyo kamano?+
Ng’ano ma isekokne gi dwol maduong’ kamano?+Ng’ano ma isejowone wengeni kamano?Isetimo kamano ne Ng’at Maler mar Israel!+
23 Iseoro jooteni+ mondo ojar Jehova,+ kiwacho niya:‘Abiro idho wi gode madongoGi gechena mag lweny mokalo akwana,Anachop nyaka kuonde maboyo mag Lebanon.
Abiro tong’o yiendene madongo mag sida kod yiendene mabeyo mag junipa.Abiro chopo nyaka tung’, e bungene motwere.
24 Abiro kunyo sokni, mi anamodh pi pinje mamoko;Ananyon aoche matindo mag Misri gi tiendena mi giduon.’
25 Dibed ni pok uwinjo? Noseng’ad wachno chon.+
Asebedo ka aike+ chakre ndalo mokalo.
Wang’ni to adhi kele.+
Ibiro muk mier mochiel motegno mi ginidong’ pidhe pidhe.+
26 Jo modak kuondego biro dhier nono;Gibiro luor kendo wigi biro kuot.
Gibiro chalo gi yiende kod lum mang’ich manie pap,+Kaka lum motwi e wi tado ma ner ka yamb ugwe ogoyo.
27 To ang’eyo sa ma ibet, sa ma iwuok, sa ma iduogo,+Kendo sa ma in gi mirima koda,+
28 Nikech mirima ma in-go koda+ kod koko migoyo osechopo e ita.+
Omiyo, abiro keto ramaki+ mara e umi kod ragayi e dhogi,
Kendo anaduoki gi yo ma ne ibirogo.”+
29 “‘To in Hezekia, ma e ranyisi ma amiyi: Higani ubiro chamo gik motwi kendgi. Higa ma biro ubiro chamo orowe.*+ To e higa mar adek, ubiro komo mi unuka cham. Bende, ubiro pidho mzabibu mi unucham olembgi.+
30 Jo-Juda ma biro tony, tiende ni jo modong’,+ biro chalo gi yath ma tero tiendene piny kendo nyago olembe e bedene.
31 Nimar jo manok modong’ biro wuok Jerusalem, kendo jo motony biro wuok e Got Sayun. Jehova Nyasach oganda lweny biro timo mano gi kinda.+
32 “‘Kuom mano, ma e gima Jehova owacho e wi ruodh Asuria:+
“Ok obi donjo e dalani+Ok obi baye gi asereOk obi monje gi okumbaKata loso pith mondo oidhgo ohingane.+
33 Obiro dok gi yo ma nobirogo;Ok nodonj e dalani,” Jehova owacho.
34 “Abiro kedo ne dalani+ kendo rese nikech nyinga+Abiro rese nikech Daudi jatichna.”’”+
35 E otienono, malaika mar Jehova nodhi monego jolweny mag Jo-Asuria 185,000 ka ma ne gigoyoe kambi.+ Ka ne ji ochiewo gokinyi, ne gineno mana ringre jo motho kopie.+
36 Omiyo, Senakerib ruodh Asuria noa kanyo modok thurgi+ Nineve.+
37 To ka noyudo olemo e od Nisrok nyasache, yawuote ma Adramelek gi Sharezer nobiro monege gi ligangla.+ Bang’e, ne giringo mi gidhi e piny Ararat.+ Eka wuode ma Esarhadon+ nochako locho kare.
Weche Moler Piny
^ Kata nyalo bedo, “e kind.”
^ Kata, “twenyoni ume.”
^ Orowe gin cham ma twi kendgi bang’ keyo.
