Jong’ad Bura 14:1-20
14 Samson nolor modhi Timna mi oneno nya Jo-Filistia kuno.
2 Ka ne oduogo, ne owacho ne min-gi gi wuon-gi niya: “Ka ne an Timna, ne aneno nya Jo-Filistia moro momako wang’a, omiyo adwaro ni udhi unyuomnago.”
3 Jonyuolne to ne openje niya: “Ok diyud nyako e kind wedewa kata kuom jowa?+ Nyaka ikend mana nyar jo ma ok oter nyangu?” Kata kamano, Samson ne odwoko wuon mare ni: “Nyuomnagouru anyuoma, nikech oberna.”*
4 Jonyuolne ne ok ong’eyo ni Jehova e ma ne tayo wachno, nimar Nyasaye ne manyo thuolo mar kedo gi Jo-Filistia ma kindeno ne nigi teko e wi Jo-Israel.+
5 Samson ne odhi gi jonyuolne Timna, to ka ne ochopo e puothe mag mzabibu mag Timna, nopo ka sibuor* ruto kochome tir.
6 Gikanyono, roho mar Jehova nomiyo obedo gi teko+ moyiecho sibuorno diriyo gi lwete nono mana kaka ng’ato diyiech nyadiel. Kata kamano, ne ok onyiso jonyuolne gima ne otimono.
7 Ka ne Samson ochopo Timna, ne owuoyo gi nyakono kendo nyakono pod ne berne abera.+
8 Bang’e, ka ne odok thurgi nyakono mondo okawe,+ ne obaro mondo ong’i sibuor ma ne onegocha, to ne oyudo ka kich gi more opong’o sibuorno.
9 Nochodho mor kich gi lwete mi ochako chamo ka odhi. To ka ne ojuko jonyuolne, ne opogonegi mor kichno mondo gicham, to ne ok onyisogi ni ogole kuom sibuor ma ne onegocha.
10 Ka ne gichopo dalagi nyakono, Samson ne obago nyasi kuno, nimar kamano e kaka yawuoyi ne timoga.
11 Ka ne jodalano onene, ne gikelo yawuoyi 30 mondo obudh kode.
12 Samson ne onyiso yawuoyigo niya: “Daher goyonu ngero moro, to ka unyisa tiende ka ndalo abiriyo mag nyasini pok orumo, abiro miyou lewni* ma iye 30 kod lewni ma oko 30.
13 To ka lero tiend ngerono otamou, un e ma ubiro miya lewni ma iye 30 gi lewni ma oko 30. Ne gidwoke niya: “Kare nyiswa ngerono mondo wawinji.”
14 Ne ogoyonegi ngerono kama:
“Gima ichamo ne owuok kuom jacham ji,To gima mit ne owuok kuom ratego.”+
Kata kamano, ndalo adek ne okalo ka lero tiend ngerono pod otamogi.
15 E odiechieng’ mar ang’wen ne giwacho ne chi* Samson niya: “Wuond chwori*+ mondo onyiswa tiend ngerono, to ka ok itimo kamano, wabiro wang’i kaachiel gi od wuonu te. Uparo ni ne uluongowa kae mondo umawa gikwa?”
16 Bang’ mano, chi Samson ne odhi ywak ne Samson kowachone niya: “Ok ihera, ang’eyo ni isin koda,+ nikech isegoyo ne jowa ngero to an to pok inyisa tiende.” Samson nodwoke niya: “Kata mana wuonwa gi minwa e ma pok anyiso tiend ngerono, ere kaka danyisi?”
17 Kuom odiechienge duto modong’ mag nyasino, nyakono ne siko ywakne. Gikone, e odiechieng’ mar abiriyo, Samson ne ool gi ywakne monyise tiend ngerono. En to ne odhi monyiso yawuoyika.+
18 E odiechieng’ mar abiriyo ka chieng’ pok opodho,* jo dalano ne onyiso Samson niya:
“Ang’o mamit maloyo kich,To ang’o ma ratego maloyo sibuor?”+
Nodwokogi niya:
“Ka dine ok upuro gi nyarocha,+Dine ok uyudo tiend ngerono.”
19 Bang’ mano, roho mar Jehova ne omiye teko+ molor nyaka Ashkelon+ kendo ne onego chwo 30 kuno mokawo lepgi. Ne otero lepgigo ne jo ma ne onyise tiend ngerone.+ Ne odok e od wuon-gi ka en gi mirima mager.
20 Ne ochiw chi Samson+ ne achiel kuom yawuoyi 30 ma ne okel mondo obudh gi Samson e nyasi.+
Weche Moler Piny
^ Hibrania, “nikech en e ma olong’o e wang’a.”
^ Kata, “sibuor matin.”
^ Tiende ni, lewni mag kitani.
^ “Jo-Hibrania kwano nyako midhi kend kaka chi ng’at ma dwaro kendeno.”
^ “Jo-Hibrania kwano wuoyi ma dwaro kendo nyako kaka chwor nyakono.”
^ Kata nyalo bedo, “ka pok odhi e ot ma iye.”
