Amos 7:1-17
7 Ma e gima Jehova Wuon Loch Duto nonyisa: Neuru! Ne okelo det-bonyo ka ne cham mogik* chako twi. Gin cham ma notwi bang’ ka noseng’ad lum mag ruoth.
2 Ka ne det-bonyogo otieko chamo gik ma notwi e piny, nawacho niya: “A Jehova Wuon Loch Duto, asayi wenegi richogi!+ Jakobo koro ool!+ Be dochung’ adier?”
3 Omiyo, Jehova noparo wachno kendo.*+ “Wachno ok bi timore,” Jehova owacho.
4 Ma e gima Jehova Wuon Loch Duto nonyisa: Neuru! Jehova Wuon Loch Duto nooro mach mondo okelgo kum. Majno nowang’o nembe matut kod bath piny.
5 Eka nawacho niya: “A Jehova Wuon Loch Duto, asayi ni kik itim kamano!+ Jakobo koro ool!+ Be dochung’ adier?”
6 Omiyo, Jehova noparo wachno kendo.*+ “Wachno bende ok bi timore,” Jehova Wuon Loch Duto owacho.
7 Ma e gima nonyisa: Neuru! Jehova ne ochung’ e kor ot moro moger gi kabiro, kendo noting’o kabiro e lwete.
8 Eka Jehova nopenja niya: “Amos ineno ang’o?” Ne adwoke kama: “Aneno kabiro.” Kendo Jehova nowacho niya: “Eri aketo kabiro e dier Jo-Israel. Ok anachak awenegi richogi kendo.+
9 Kuonde moting’ore malo mag Isaka+ biro dong’ nono, kendo kuonde maler mag Israel ibiro jwang’.+ Anamonj od Jeroboam gi ligangla.”+
10 Amazia jadolo ma Bethel+ nooro wachni ne Jeroboam+ ruodh Israel: “Amos piem kodi e dier Israel+ kendo wechene biro ketho piny.+
11 Nimar Amos wacho ni, ‘Jeroboam biro tho gi ligangla kendo Jo-Israel ibiro dar e pinygi mi tergi e tuech.’”+
12 Eka Amazia nowacho ne Amos niya: “Yaye, in jane fweny, wuog kae iring nyaka e piny Juda, ikor wach kuno mondo iyud chiembi.+
13 To kik ichak ikor wach e Bethel kae,+ nimar en ka maler mar ruoth+ kendo en od ruoth.”
14 To Amos nodwoko Amazia niya: “Ne ok an janabi kata wuod janabi, to ne an jakwath+ kendo ne arito yiend ng’ope.
15 To Jehova e ma nogola e tij kwath, mi Jehova owuon nonyisa ni, ‘Dhi ikor wach ne joga Israel.’+
16 To koro winj ane gima Jehova owacho: ‘Isewachona ni, “Kik ikor wach e wi Israel+ kendo kik iland wach moro amora+ e wi joka Isaka.”
17 Omiyo, ma e gima Jehova owacho: “Chiegi nobed ochot e dala maduong’, kendo ibiro neg yawuoti gi nyigi gi ligangla. Ibiro pog pinyi gi tol mipimogo, to in iwuon ibiro tho e piny ma ok ler; kendo Israel nyaka ter e tuech.”’”+
Weche Moler Piny
^ Tiende ni, cham ma twi e kind Januar kod Februar.
^ Kata, “ywago ang’e; loko pache.”
^ Kata, “ywago ang’e; loko pache.”
