Ayub 13:1-28
13 “Ee, aseneno wechegi duto gi wang’a,Asewinjogi gi ita mi gidonjona.
2 Gik mung’eyo, an bende ang’eyo;Omiyo, onge gima uloyago.
3 An to Ng’at Manyalo Duto e ma daher wuoyogo, to ok un;Daher ni ayal gi Nyasaye.+
4 Un to uketho nyinga gi miriambo;Uduto un jothieth manono.+
5 Mad a uling’ aling’a thi,Mano domiyo unenoru ka jo mariek.+
6 Yie uwinj weche ma an-go,Kendo chikuru itu mondo uwinj kwayona.
7 Be owinjore uwach weche ma ok kare kutiyo gi nying Nyasaye,Koso ubiro dok ne Nyasaye e bura kutiyo gi miriambo?
8 Udwaro dok ne Nyasaye madier e bura koso,Be unyalo temo riwe lwedo sa miyale?
9 Ka Nyasaye ononou, be uparo ni ubiro tony?+
Uparo ni unyalo wuondo Nyasaye kaka uwuondo dhano?
10 Ka utemo dok ne jomoko apiny piny+Ok obi chweyo ma ok okwerou.
11 Donge duong’ mare biro miyo ukirni gi luoroKendo kihondko biro goyou nikech tekone?
12 Wecheu mag rieko gin ngeche manono mana ka buch kendo;Kendo giyom yom mana ka ohinga moger gi lowo.
13 Omiyo, koro ling’uru mondo awuo.
To ka gimoro dhi tima, to we otimrena atima!
14 Uparo ni ang’o momiyo ayie keto ngimana ka marach,Kendo timo gima nyalo miyo awit ngimana?
15 Kata ka Nyasaye dwaro nega, to anarit arita;+Kendo nawach e nyime ni an kare.
16 Bang’ mano, noresa,+Nimar onge ng’at ma ng’anyo ne Nyasaye ma didhi e nyime.+
17 Chikuru itu maber ne wechena,Winjuru weche ma adwaro leronu.
18 Koro neuru, aseiko weche ma adhigo e bura;Ang’eyo ni achung’ e adiera.
19 Ere ng’a ma dichung’ koda e bura?
Nimar ka aling’, abiro tho!
20 A Nyasaye, timna mana gik moko ariyoMondo kik apondni:
21 Gol lweti kuoma chuth iwe sanda,Kendo tekoni kik miya kihondko.+
22 Inyalo kwongo wuoyo, eka awuo,Ka ok kamano, inyalo weyo mondo awuo mokwongo kae to eka iwuo.
23 Kethona kod richona gin mage?Nyisagi mondo ang’egi.
24 Ere gimomiyo ipandona wang’i+Kendo ikwana kaka jasiki?+
25 Ibwogo oboke ma yamo kwadho nang’o?To ang’o momiyo ilawo yugi motuo?
26 Isiko indiko piny weche malit ma idonjonago,Imiyo asandora nikech richo ma ne atimo ka an rawera.
27 Itueyo tiendena e lodi,Inono yorena duto,Iluwo kuonde duto ma tienda onyono.
28 Omiyo, dhano* rumo aruma ka gima otop,Ochalo law ma kudni ochamo.
Weche Moler Piny
^ Samoro iwuoyo kuom Ayub.
