Ayub 15:1-35
15 Elifaz+ Ja-Teman nodwoko niya:
2 “Be ng’at mariek biro chiwo dwoko gi weche ma onge tich,Kata pong’o kore gi weche mager?*
3 Rieyo ng’ato gi weche manono ok kony,Kendo wacho weche ma onge korgi onge ohala.
4 Nimar inyoso chuny ji kik giluor Nyasaye,Kendo imiyo ji kik dew Nyasaye.
5 Richoni chiko kaka iwuoyo,Kendo riekni ma in-go obam.
6 Dhogi iwuon e ma ng’adoni bura, to ok an;Weche ma wuok e dhogi nyiso ni irach.+
7 Iparo ni in e dhano ma ne okwong nyuol,Koso ni ne onyuoli ka gode podi?
8 In e ma iwinjoga weche maling’ ling’ mag Nyasaye,Koso iparo ni in kendi e ma iriek?
9 En ang’o ming’eyo ma wan to ok wang’eyo?+Gin weche mage miwinjo tiendgi ma wan to ok wawinj?
10 Jo ma nigi lwar kaachiel gi jo moti wan-go,+Jo ma oyombo wuonu mabor gi higni.
11 Ang’o momiyo ichayo hoch ma Nyasaye hoyigo,Kendo ichayo weche mamuol minyisi?
12 Ang’o momiyo chunyi wuondi,Kendo ang’o momiyo wang’i kwiny?
13 Nimar mirima osemaki gi Nyasaye owuon,E momiyo weche ma kamago wuok e dhogi.
14 Dhano adhana en ang’o ma dowuondre ni oler,Kata ere kaka dhano ma dhako onyuolo dibed makare?+
15 Ne! Nyasaye ok ogeno kata mana malaikene,Kata mana polo bende ok ler e wang’e.+
16 Koro ere kaka dogen ng’at ma timbene richo kendo ma onjawore,+Ng’at ma gado richo mana ka pi!
17 Abiro puonji; omiyo, chikna iti.
Abiro nyisi gik ma aseneno,
18 Abiro puonji gik ma jo mariek osepuonjore kuom kweregi,+Abiro puonji weche ma ne ok gipando.
19 Kwerewago e ma ne omi pinyno,Kendo onge wendo ma ne okikore kodgi.
20 Ng’at marach chandore ndalone duto,Ee, ng’at ma thiro jowadgi, nochandre kuom higni duto mag ngimane.
21 Nduru mag masiche siko mor e ite;+E kinde mag kuwe, jomecho monje mi yake.
22 Ok opar ni onyalo tony mi owuog e mudho;+Ong’eyo ni ligangla e ma orite.
23 Owuotho koni gi koni komanyo chiemo—openjore ni chiemo ni kanye?
Ong’eyo ni chieng’ mudho chiegni.
24 Chandruok malit gi parruok malich miye luoro;Kendo giloye mana kaka ruoth moikore monjo jasigu.
25 Mano en nikech oserieyo lwete kong’ang’ gi Nyasaye,Kendo otemo piem gi Ng’at Manyalo Duto;
26 Omwomore kuom Nyasaye gi wich teko,Koting’o okumbane mapek kendo motegno.
27 En ng’at machwe,Wang’e leny, kendo iye duong’.
28 Odak e mier mibiro kethi,Odak e ute ma onge ng’at ma biro dakie,Ute ma nolokre pidhe mag kite.
29 Ok nobed jamoko, kendo mwandune ok nomedre,Bende, mwandune ok nolandre e piny.
30 Ok nowuog e mudho;Obiro chalo ka yath ma mach owang’o bedene,*Kendo much Nyasaye nokudhe molal nono.+
31 Kik oba yo mochak geno gik manono,Nikech onge gima obiro yudo;
32 Mano notimre ka ndalone podi,Kendo bede yadhno ok nolodh.+
33 Obiro chalo mana gi yadh mzabibu ma olembene lwar ka pok ochiek,Kendo obiro chalo gi yadh zeituni ma maupene lwar alwara kendgi.
34 Kanyakla mag jo ma ok oluoro Nyasaye ok nobed gi nyak,+Bende mach biro tieko hembe jo ma kawo asoya.
35 Chunygi siko paro gik maricho, kendo mano miyo gitimo gik ma ok kare,Chunygi siko paro mana kaka ginyalo wuondo ji.”
