Ayub 2:1-13
2 Chieng’ moro ka yawuot Nyasaye madier*+ nobiro e nyim Jehova,+ Satan bende ne ochopo e nyim Jehova kanyo.+
2 Eka Jehova nopenjo Satan niya: “Ia kanye?” Satan nodwoko Jehova kama: “Aa dundora e piny ka alworora koni gi koni.”+
3 Eka Jehova nochako openjo Satan niya: “Be iseneno Ayub jatichna, koso? Onge ng’at ma chal kode e piny. En ng’at ma onge ketho kendo ma timne tir,+ oluoro Nyasaye kendo otang’ gi richo. Pod omakore motegno gi timne matir+ kata obedo ni idwaro thuwa kode+ mondo anege kayiem nono.”
4 To Satan nodwoko Jehova niya: “Del kar del. Dhano nyalo chiwo gimoro amora ma en-go mondo ores ngimane.
5 To koro, rie lweti imul ringrene gi chokene mondo ine ka ok obi yanyi e wang’i.”+
6 Eka Jehova nowacho ne Satan niya: “Ne! En e lweti, mak mana ni kik inege.”
7 Bang’ mano, Satan nowuok e nyim Jehova mi odhi goyo Ayub gi buche* malit+ chakre opap tiende nyaka pat wiye.
8 Ayub nodhi mobet e buch kendo+ koguonyore gi balatago.
9 Gikone chiege nopenje niya: “Pod imakori gi tim matir? Yany Nyasaye mondo itho!”
10 To Ayub nodwoke niya: “Iwuoyo mana kaka mon mofuwo wuoyoga. Ka Nyasaye madier otimonwa maber to wayie, to koro nang’o watamre ka otimonwa marach?”+ E mago duto, Ayub ne ok oketho gi dhoge.+
11 Osiepe Ayub adek ma gin Elifaz+ Ja-Teman, Bildad+ Ja-Shua,+ kod Zofar+ Ja-Naamath nowinjo masiche duto ma ne oyude. Omiyo, ne giwinjore ni girom mondo gidhi gigo ne Ayub mos kendo giho chunye.
12 Ka ne ginene ka pod gin mabor, ne orwenyogi. To ka ne gichopo machiegni mi gifwenye, ne gichako ywak matek mi giyiecho lepgi ka gikiro buru e yamo to o e wigi.+
13 Bang’e ne gibet kode e lowo kanyo kuom ndalo abiriyo odiechieng’ gotieno. Onge kata achiel kuomgi ma ne owachone gimoro amora, nikech ne gineno ni ne en gi rem mang’eny.+
