Ayub 34:1-37
34 Eka Elihu nodhi nyime ka wacho niya:
2 “Winjuru wechena, un jo mariek;Un jo ma ong’eyo weche mang’eny, chikuru itu uwinja.
3 Nimar it pimo weche mowinjoMana kaka lep pogo ndhath chiemo.
4 We mondo wan wawegi wang’ad gima kare;We mondo wang’ad e kindwa gima ber.
5 Nimar Ayub osewacho ni, ‘An ng’at makare,+To Nyasaye otamore ng’adona bura makare.+
6 Be dawach miriambo e wi bura mowinjore ong’adna?
Adhonda ok nyal chango kata obedo ni aonge ketho.’+
7 Be nitie ng’at ma chal gi Ayub,Ma modho ayany mana ka pi?
8 Oriwore gi jo ma timbegi richoKendo owuotho gi joricho.+
9 Nikech osewacho ni, ‘Onge ohala ma dhano yudoKuom temo moro Nyasaye.’+
10 Omiyo, koro winjauru un jo ma weche donjonu:
Nyasaye madier ok ditim gima ok kare ngang’,+Ng’at Manyalo Duto ok nyal timo marach.+
11 Nimar enomi ng’ato pok kaluwore gi timbene+Kendo nomi ng’ato oka mana gima ochuoyo.
12 Kuom adier, Nyasaye ok nyal timo gima rach;+Kendo Ng’at Manyalo Duto ok nyal ng’ado bura e yo ma ok owinjore.+
13 En ng’a ma noketo piny duto e lwet Nyasaye,Kendo en ng’a ma ne omiye loch e wi piny duto?
14 Ka Nyasaye oramo ne dhano,Mi omayogi muya ma ne osemiyogi,+
15 Ji duto nyalo tho riat,Mi dhano dog e buru.+
16 Omiyo, Ayub, ka weche donjoni, koro winj;Chik iti adimba iwinj gima adwaro wacho.
17 Be ng’at ma ok ohero tim makare onego obed jatelo,Koso itemo wacho ni Ng’at Manyalo Duto ok tim makare?
18 Be diwach ne ruoth ni, ‘In ng’at manono,’Kata ne jotelo ni, ‘Un jo maricho’?+
19 Nitie Ng’at ma ok dew wang’ jotelo,Kendo ok otim maber ne jomwandu moloyo jodhier,+Nimar giduto gin tich mag lwete.+
20 Ginyalo tho apoya+ e chuny otieno;+Giyiengni matek kae to githo;Kendo jo ma roteke igolo, mak mana ni ok golgi gi lwet dhano.+
21 Nimar wang’ Nyasaye ng’iyo yore mag dhano,+Onono wuodhene duto.
22 Onge mudho kata obed mudho mandiwa manadeMa joricho nyalo pondonee.+
23 Nyasaye ok ket bura mondo oyal dhano moro amora;Ok oket ne dhano kinde mar biro e nyime mondo ong’adne bura.
24 Ong’injo joteko ma ok ochuno ni oketnegi buraKendo oketo jomoko kargi.+
25 Nimar ong’eyo gik ma gitimo;+Ogologi gotieno motiekgi.+
26 Ochwadogi nikech timbegi maricho,Kendo otimo kamano e lela ku ma ji duto nenogie,+
27 Nimar gisebaro mi giweyo luwe+Kendo gisejwang’o chikene duto;+
28 Gimiyo jochan ywak ne Nyasaye,Kendo owinjo ywak mar jo ma onge jokony.+
29 Ka Nyasaye oling’, ng’ano ma diwach ni otimo marach?
Kopando wang’e, ng’ano ma dinene?
Bed ni otimo kamano ne oganda kata ne ng’ato achiel, duto chalre achala.
30 Ok oyie ne ng’at marach* mondo oloch+Nikech mano nyalo miyo ji ohinyre.
31 Be nitie ng’at ma nyalo wacho ne Nyasaye ni,‘Achandora to onge gima rach ma asetimo?+
32 Nyisa anyisa gima rach ma asetimo,Ka po ni nitie, nyisago to ok abi nwoye kendo.’
33 Kisetamori winjo wachne kama, be domiyi pok kaka iparo?
Dwok penjono iwuon, an to ok abi dwoki.
Koro nyisa kuom adier gima ing’eyo.
34 Jo ma weche donjonegi biro wachona niya;Ee, jo mariek mosewinja biro wacho ni,
35 ‘Ayub wuoyo awuoya to okia gik mowacho,+Kendo wechene ok nyis rieko.’
36 We mondo otem* Ayub nyaka tung’Nimar weche mowacho chalo mag jo maricho!
37 Otimo richo kendo e wi mano, ochako ong’anyo;+Opamo lwetene kojero e nyimwaKendo omedo wacho weche mang’eny maricho kuom Nyasaye madier!”+
Weche Moler Piny
^ Kata, “ng’at mong’anyo ne Nyasaye.”
^ Kata nyalo bedo, “Wuonwa, we mondo otem Ayub.”
