Ayub 4:1-21
4 Eka Elifaz+ Ja-Teman nodwoko Ayub niya:
2 “Ka ng’ato otemo wuoyo kodi, be ibiro jok kode?
An to ok anyal ling’, nyaka awuo awuoya.
3 En adier ni iserieyo ji mang’eny,Kendo isetego lwet jo ma yom yom.
4 Wecheni osesiro ng’at ma ochwanyore ma chiegni podho,Kendo ne itego jo ma chongegi onyosore.
5 To wang’ni in e ma chandruok omaki, kendo piny ochami;Chandruok oyudi, kendo piny obagi.
6 Luor matut miluorogo Nyasaye donge onego omiyi chir koso?
Donge timni matir+ onego omiyi geno?
7 Par ane: Be nitie ng’at makare mosegatieki?
Karang’o ma ne okethie ng’at ma timbene tir?
8 An gima aseneno en ni jo ma chuoyo gik maricho Kayoga mana gik maricho.
9 Nyasaye kokudho muche to gilal nono,Kendo ka mirimbe omuoch, girumo.
10 Sibuor ruto, kendo sibuor matin ng’ur,To e ma kata leke sibuoche ma roteke pod tur.
11 Sibuor tho nikech onge gima ocham,Kendo nyithi sibuor ke akeya.
12 To nitie wach moro ma ne okelna ling’ ling’,Kendo nokuodhna wachno e ita,
13 Sa ma nindo matut notero ji gotieno.Ne en fweny ma ne ochando chunya.
14 Ne abuok kendo kibaji ne ogoya,Mi denda duto ne otetni.
15 Tipo moro nokadho e wang’a;Kendo yie denda ne ochung’.
16 Gino ne ochung’ ma ok okithni,Kata kamano, ne ok afwenyo ni ne en ang’o.
Ne ochalna mana ka tipo moro e nyima;Piny noling’ thi, kae to nawinjo dwol moro ka wacho niya:
17 ‘Be dhano adhana nyalo bedo makare moloyo Nyasaye?
Be dhano nyalo bedo maler moloyo Jachuechne?’
18 Ne! Nyasaye ok ogeno kata mana jotichne,Kendo okwano malaikene kaka joketho.
19 To koro iparo ni oneno nade jo modak e ute molos gi lowo,Ma misegi en mana buru,+Ma gin jo ma ing’injo mayot mana ka kudni?
20 Ing’injogi chuth chakre okinyi nyaka odhiambo;Gilal nyaka chieng’ ma onge ng’at ma fwenyo.
21 Donge gichalo mana ka hema mochod tondene?
Githo ka gionge gi rieko.
