Ezekiel 4:1-17
4 “To in wuod dhano, dhi ikaw matafari mondo iket e nyimi, kae to igorie dala mar Jerusalem.
2 Bang’e, iger ohinga molwore,+ ilosne pidhe mag lowo,+ iIwore gi kambi mag jolweny ma dwaro monje, kendo iketne gik mimukogo ohinga koni gi koni.+
3 Bende, inikaw tawo mar nyinyo, kendo inikete obed kaka ohinga e kindi kod dalano. Eka inichom wang’i e matafarino tir, mondo ochal gi dala mimonjo; in e ma ibiro monje. Mano nobed ranyisi ne od Israel.+
4 “Eka ibiro nindo gi bathi koracham mondo iket richo mag Jo-Israel kuomi.*+ Ibiro ting’o richo mag Jo-Israel kuom ndalo duto ma ibiro nindo kanyo.
5 Abiro miyo itim kamano kuom odiechienge 390, ma romre gi higni ma gisetimogo richo,+ kendo ibiro ting’o ketho mar Jo-Israel.
6 Nyaka itiek ndalogo duto.
“Ininind kendo gi bathi korachwich mondo iting’ richo mag Jo-Juda+ kuom odiechienge 40. Inikwan higa achiel kar odiechieng’ achiel, ee, higa achiel kar odiechieng’ achiel, nikech mano e gima aseketoni.
7 lninind king’iyo wasigu molworo Jerusalem,+ ka in gi badi nono, kendo inikor masira ma biro yudo dalano.
8 “Ne! Abiro tueyi gi tonde mondo kik ilokri koni gi koni nyaka odiechienge mibiro geng’o ne dalano orum.
9 “Inikaw ngano, shairi, oganda, dengu, bel, gi kusemeth,* kae to iniolgi giduto e agulu achiel mondo itedgo makate. Inicham makateno kuom odiechienge 390 ma ibiro nindogo gi bathi.+
10 Ibiro chamo chiemo ma romo shekel* 20 odiechieng’ kodiechieng’. Nyaka ichame mana e sa moketi.
11 “Ibiro modho pi mopim ma romo hin* achiel kuom auchiel. Nyaka imodhe mana e sa moketi.
12 “Ibiro chame mana kaka dicham makate molworore molos gi shairi. Ibiro tede gi mach michwako gi chieth motwo mar dhano ka ma ji duto nyalo nenie.”
13 Jehova ne odhi nyime wacho niya: “Kamano e kaka Jo-Israel biro chamo chiemo ma ok ler e kind ogendni ma abiro keyogie.”+
14 Eka ne adwoke niya: “Ok kamano, Jehova Wuon Loch Duto! Pok nachamoga ring le moyud kotho kata moneg gi le wadgi,+ kendo ring’o ma ok ler pok odonjoga e dhoga chakre tinna.”+
15 Omiyo, ne owachona niya: “Onge wach, abiro yieni mondo ited makateni gi mach mar owuoch dhiang’ kar chieth dhano.”
16 Eka nowachona niya: “Wuod dhano, abiro miyo chiemo obed ma onge e Jerusalem,+ ji biro pimo chiemo ma gichamo ka giparore,+ kendo gibiro modho pi ka gidhier nono.+
17 Mano biro timore mondo kik gibed gi chiemo kod pi, kendo ng’ato ka ng’ato biro bwok kong’iyo nyawadgi, mi ginidher nikech kethogi.
Weche Moler Piny
^ Hibrania, “kuome,” tiende ni, bath Ezekiel koracham.
^ En kit ngano ma nengone ne ni piny ma ne ipidho Misri.
^ Shekel achiel ne romre gi gram 11.4. Som Apendiks B14.
^ Hin achiel ne romre gi lita 3.67. Som Apendiks B14.
