Ne Filemon 1:1-25
1 An Paulo, jal motue e jela+ nikech Kristo Yesu, ka an gi Timotheo+ owadwa, andiko ne in Filemon jatich wadwa ma wahero,
2 kendo ne Afia nyaminwa, kod Arkipo+ jalweny wadwa, kaachiel gi kanyakla manie odi:+
3 Ng’wono mogundho kod kuwe mar Nyasaye Wuonwa kod Ruoth Yesu Kristo mondo obed kodu.
4 Kinde duto agoyo ne Nyasacha erokamano sa ma ahulo nyingi e lamo maga,+
5 kaka amedo winjo wach yieni kod hera ma iherogo Ruoth Yesu kod jo maler duto.
6 Alamoni mondo iland yie ma in-go motegno, mondo eka in bende ing’e gik mabeyo duto ma waseyudo kuom Kristo.
7 Owadwa, herani osemiya mor maduong’ kendo osehoyo chunya, nikech iseduogo chuny jo maler.
8 Mano e momiyo kata obedo ni an gi ratiro maduong’ mar wuoyo kaka jaote Kristo, kendo chiki timo gima kare,
9 to aneno ni ber moloyo ka ahombi kuom hera, nimar an Paulo, jaduong’ ma hike ng’eny, kendo ma sani otue e jela nikech Kristo Yesu.
10 Asayi kuom wach nyathina ma Onesimo,+ ma ne abedo wuon mare+ ka an e jela.
11 Chon ne ok okonyi kata matin, to sani koro okonyi ahinya, kendo an bende okonya.
12 Aduoge iri kendo, ee, jal ma en chunya awuon.
13 Daher ni adong’ kode kae mondo odhi nyime konya, kotimo kamano e loyi e kinde ma an e tuech nikech wach maber.+
14 Kata kamano, ok daher kawo okang’ moro amora ka pok iyiena, mondo gima ber mibiro timo kik bed ma ochunigo, to ma in e ma iyiero timo.+
15 Samoro mano e momiyo noringo moweyi kuom kinde machuok, mondo chieng’ moro oduog iri chuth,
16 to ok mana kaka misumba kendo,+ to kaka ng’at ma koro oloyo misumba, tiende ni owadwa moher ahinya,+ mokwongo an e ma ahere, to in e ma koro ibiro here moloyo, nikech ibiro here kaka dhano kendo kaka owadu kuom Ruoth.
17 Omiyo, ka ikwana kaka osiepni, yie irwake e yo mang’won mana kaka da itimona.
18 E wi mano, ka di po ni ne okethoni e yo moro amora, kata ka en gi gopi moro, kwan gowino e wiya.
19 An Paulo kendo andiko gi lweta awuon: Abiro chulo gowino—kata ka ok aparoni ni in jagopa nikech ngimani iwuon.
20 Ee, owadwa, akwayo ni mondo itimnae ng’wono kuom Ruoth e wachni; duog chunya kuom Kristo.
21 An gadier ni ibiro timo kaka asayino, omiyo andikoni ka ang’eyo ni ibiro timo kata mana mokalo gik ma asewachogo.
22 Kwayo machielo ma an-go en ni, iiknae kamoro ma anyalo dakie, nimar ageno ni kokalo kuom lamo magu ibiro gonya mi duoka iru kendo.+
23 Epafra,+ wadwa motueyago e jela nikech Kristo Yesu, ooronu mos,
24 Mariko, gi Aristarko,+ gi Dema,+ kod Luka,+ ma gin jotich wetena, bende otimo kamano.
25 Ng’wono mogundho mar Ruoth Yesu Kristo mondo obed kod chuny ma unyiso.
