Fweny mar Johana 10:1-11
10 Kendo ne aneno malaika machielo ma ratego ka lor koa e polo ka obidhe* gi boche polo, kendo lihudu* ne ni e wiye, kendo lela wang’e ne chal gi chieng’,+ to tiendene ne chal gi sirni mag mach,
2 to e lwete ne nitie buk moro matin modol ma noseyar. Kendo tiende korachwich nonyono nam to ma koracham ne onyono piny,
3 kendo ne okok gi dwol maduong’ mana kaka dwond sibuor ma ruto.+ To ka nokok, mor polo abiriyo+ nowuoyo.
4 Koro ka mor polo abiriyogo nosewuoyo, noyudo ka achiegni ndiko; kata kamano ne awinjo dwol moro koa e polo+ ka wachona niya: “Tue gik ma mor polo abiriyogo osewacho, kendo kik indikgi piny.”
5 Malaika ma ne aneno konyono nam kod piny noting’o bade korachwich malo e polo,
6 kendo ne okuong’ore gi nying Jal ma dak nyaka chieng’,+ ma nochueyo polo gi gik manie iye, kod piny gi gik manie iye, kod nam gi gik manie iye,+ kowacho niya: “Onge deko kendo.
7 To e ndalogo ma malaika mar abiriyo+ chiegni goyo turmbetane,+ kuom adier, wach maler moum+ ma Nyasaye nolando kaka wach maber ne wasumbnine owuon ma gin jonabi+ biro chopo chuth.”
8 Eka ne awinjo dwolcha koa e polo+ kowuoyo koda kendo niya: “Dhi mondo ikaw bug adola ma oseyarno, manie lwet malaika mochung’ konyono nam kod piny.”+
9 Ne adhi ir malaikano kendo ne akwaye mondo omiya bug adola matinno. Nowachona niya: “Kawe kendo ichame,+ to obiro miyo iyi obed makech, to e dhogi enobedni mamit kaka mor kich.”
10 Ne akawo bug adola matinno e lwet malaikano mi ne achame,+ to e dhoga ne omit kaka mor kich,+ to ka ne asechame, ne omiyo iya obedo makech.
11 Eka ne giwachona niya: “Nyaka to ikor wach kendo e wi ogendni, gi pinje, gi dhok, kendo e wi ruodhi mang’eny.”