Fweny mar Johana 11:1-19
11 Kendo ne omiya kede moro mar pimo+ kowacho niya: “A malo kendo ipim hekalu mar Nyasaye gi kar kendo mar misango kod jo ma lemo e iye.
2 To kik ipim laru man oko mar hekalu, nimar osemiye ogendni mamoko, mi gininyon dala malerno+ gi tiendegi kuom dweche 42.+
3 Anami jonenona ariyo nyalo mar koro wach kuom odiechienge 1,260 ka girwakore gi lep gunia.”
4 Jogi gin yiend zeituni ariyo+ kod gige chungo teyni ariyo,+ kendo gichung’ e nyim Ruoth mar piny.+
5 Ka ng’ato dwaro hinyogi, mach wuok e dhogi kendo tieko wasikgi chuth. Mano e kaka inego ng’ato ang’ata ma dwaro hinyogi.
6 Jogi nigi teko mar loro polo+ mondo koth kik chue ngang’+ e ndalo ma gikoroe wach, gin gi teko mar loko pige obed remo,+ kendo mar kelo tuoche mopogore opogore e piny kaka gidwaro.
7 Ka gisetieko tijgi mar chiwo neno, ondiek ma biro koa e bur matut ma onge giko* noked kodgi e lweny kendo loyogi mi noneggi.+
8 Kendo ringregi nobed e nderni madongo mag dala maduong’no miluongo e yor ranyisi ni Sodom gi Misri, ma bende e ka ma ne onegie Ruodhgi e yath.
9 To jo moa e pinje duto, gi dhoudi, gi dhok, kod ogendni biro rango ringregi kuom odiechienge adek gi nus,+ kendo ok gibi yie mondo opiel ringregi e liel.
10 Kendo jo modak e piny nobed mamor kendo timo nyasi mag mor, mi ginior mich ne ng’ato ka ng’ato e kindgi, nimar jonabi ariyogo nosesando jo modak e piny.
11 Bang’ odiechienge adek gi nusgo, much ngima moa kuom Nyasaye ne odonjo e igi,+ mi ne gichung’ gi tiendegi, kendo luoro maduong’ nomako jo ma nonenogi.
12 Kendo ne giwinjo dwol moro maduong’ moa e polo ka wachonegi niya: “Biuru malo kae.” Eka ne giidho malo e polo gi boche, kendo wasikgi ne onenogi.
13 E sanogo, piny ne oyiengni matek, kendo achiel kuom apar mar dalano duto ne olwar; kendo yiengni mar pinyno ne onego ji 7,000, mi jo ma ne odong’ nobedo gi luoro kendo ne gimiyo Nyasach polo duong’.
14 Masira mar ariyo+ osekalo. To ne! Masira mar adek biro mapiyo.
15 Malaika mar abiriyo nogoyo turmbetane.+ Kendo dwol moko ma kok matek ne owinjore e polo ka wacho niya: “Loch mar piny koro osebedo Pinyruoth mar Ruodhwa+ kod mar Kristone,+ kendo obiro locho ka en ruoth nyaka chieng’.”+
16 Kendo jodongo piero ariyo gang’wenka+ ma nobedo e nyim Nyasaye ka gin e kombegi mag loch nopodho piny auma kendo lamo Nyasaye
17 ka giwacho niya: “A Jehova* Nyasaye, Manyalo Duto, jal ma nitie,+ kendo ma ne nitie, wagoyoni erokamano nikech koro isekawo tekoni maduong’ kendo isechako locho kaka ruoth.+
18 Eka ogendni nobedo gi mirima, to mirimbi nobiro, mi kinde ma noseket nochopo mondo ong’ad bura ne jo motho, kendo mar chiwo pok+ ne wasumbni magi ma gin jonabi,+ gi jo maler, gi jo moluoro nyingi, jo matindo gi jo madongo, kendo mar ketho jo ma ketho piny.”+
19 Kendo ne oyaw hekalu* mar Nyasaye e polo, mi sandug singruok ne onenore ei hekalune.+ Polo ne omil kendo dwol moko nowinjore. Bende, polo ne omor, piny noyiengni, kendo kodh pe maduong’ ne ochue.
Weche Moler Piny
^ Kata, “abiso.” Som Tiend Weche.
^ Som Apendiks A5.
^ Kata, “sang’tuari.” Som Tiend Weche.
