Fweny mar Johana 16:1-21
16 Kendo ne awinjo dwol moro maduong’ koa e hekaluno+ ka wacho ne malaike abiriyogo niya: “Dhiuru uol bakunde abiriyo mag mirimb Nyasayego e wi piny.”+
2 Malaika mokwongo nowuok modhi kendo noolo bakul mare e wi piny.+ Mi adhola marach ma ok chang+ nomako jo ma ne nigi alama mar ondiegno+ kendo ma ne lamo kido mare.+
3 Malaika mar ariyo noolo bakul mare ei nam.+ Mi nam nobedo remo+ ma chal gi mar ng’at motho, kendo gik moko duto mangima ne otho, ee, gik ma ne nie nam.+
4 Malaika mar adek noolo bakul mare e aore gi sokni mag pi.+ Mi ne gibedo remo.+
5 Ne awinjo malaika ma nigi teko e wi pige ka wacho kama: “In Jal ma nitie kendo ma ne nitie,+ Jal ma makore gi joge,+ in ng’at makare, nikech isekelo buchegi,+
6 nimar jogo ne ochuero remb jo maler kod mag jonabi,+ kendo isemiyogi remo mondo gimadhi;+ to mano e gima owinjore kodgi.”+
7 Eka ne awinjo ka kendo mar misango wacho kama: “Ee, in Jehova* Nyasaye Manyalo Duto,+ bucheni ming’ado gin madier kendo makare.”+
8 Malaika mar ang’wen noolo bakul mare e chieng’,+ mi ne omi chieng’ teko mar rewo ji gi mach.
9 Eka mach magerno norewo ji, to ne giyanyo nying Nyasaye ma en jal ma nigi teko e wi masichego, kendo ne ok giloko chunygi gia e richo mondo gimiye duong’.
10 Malaika mar abich noolo bakul mare e kom-loch mar ondiegno. Eka pinyruodhe nobedo mudho,+ kendo ne gichako kayo lewgi nikech rem ma ne gin-go,
11 to ne giwacho weche ma gichayogo Nyasach polo nikech rem ma ne gin-go kod adhondegi, kendo ne ok giloko chunygi giwe timbegi.
12 Malaika mar auchiel noolo bakul mare kuom aora maduong’ mar Yufrate,+ mi pigene ne oduono,+ mondo yo oikre ne ruodhi+ moa yo wuok chieng’.
13 Eka ne aneno weche adek mokudh gi muya ma ok ler* ma ne nenore kaka ogwende, ka wuok e dho thuol mang’ongocha,+ kendo giwuok e dho ondiegno, kendo giwuok e dho janabi mar miriambo.
14 To adier, gin weche mokudh gi much jochiende, kendo gitimo ranyisi madongo,+ kendo gidhi ir ruodhi mag piny mangima mondo gichokgi ne lweny+ mar odiechieng’ maduong’ mar Nyasaye Manyalo Duto.+
15 “Neuru! Abiro kaka jakuo.+ Ng’at mamor en ng’at ma siko ka oneno+ kendo ma siko ka en gi lepe ma oko, mondo kik owuoth ka en duk mi ji ne wich-kuotne.”+
16 Kendo ne gichokogi kanyachiel ka ma iluongo gi dho Hibrania ni Har-Magedon.*+
17 Malaika mar abiriyo noolo bakul mare e kor muya. Eka dwol moro maduong’ noa e hekaluno,+ e kom-lojno, ka wacho niya: “Osetimore!”
18 Polo ne omil, dwol moko nowinjore, kendo polo ne omor. Bende, piny noyiengni matek ma pok oyiengniga nyaka a chakruok mar dhano e piny.+ Ne en yiengni marachie moloyo.
19 Dala maduong’+ ne obarore e kidienje adek, kendo mier mag ogendni ne opodho; mi Nyasaye noparo Babulon Maduong’+ mondo omiye okombe mar divai moting’o mirimbe mager.+
20 Bende, chulni duto noringo, kendo gode ne olal nono.+
21 Eka kite mag pe madongo dongo ma moro ka moro pekne ne nyalo romo talanta* achiel ne olwar kuom ji koa e polo,+ kendo ji ne onyiso Nyasaye achaya nikech masira mar peno,+ nimar masirano ne duong’ mokadho.
Weche Moler Piny
^ Som Apendiks A5.
^ Grik, “jochiende.”
^ E dho Grik en Har Magedon, to tiend wachni e dho Hibrania en, “Got mar Megido.”
^ Talanta mar Grik ne romre gi kilo 20.4. Som Apendiks B14.
