Fweny mar Johana 17:1-18
17 Achiel kuom malaike abiriyo ma ne nigi bakunde abiriyogo+ nobiro mi owachona niya: “Bi ane, adwaro nyisi bura moseng’ad ne dhako ma jachode maduong’, mobet e wi pige mang’eny,+
2 ma ruodhi mag piny ne terorego,*+ kendo jo modak e piny ne omer gi divai mar terruokne.”*+
3 Eka roho nomaka kendo malaikano notera nyaka e thim. Ne aneno dhako moro kobet e wi ondiek makwar mopong’ gi nyinge mag yanyo Nyasaye. Ondiegno ne nigi wiye abiriyo gi tunge apar.
4 Dhakono ne orwakore gi nanga ma rangine rajamna+ kod makwar, kendo ne obidhore gi dhahabu gi kite ma nengogi tek kod kite mag lulu,+ to e lwete ne en gi okombe mar dhahabu ma nopong’ gi gik modwanyore kod gik mochido mag terruokne.*
5 E lela wang’e ne ondikie nying moro ma kore ok ong’ere, niya: “Babulon Maduong’, min jochode+ kod gik modwanyore mag piny.”+
6 Kendo ne aneno ka dhakono omer gi remb jo maler kendo gi remb joneno mag Yesu.+
To ka ne anene, ne awuoro ahinya.
7 Omiyo, malaikano nopenja kama: “Ang’o momiyo iwuoro kamano? Adwaro nyisi wach mopondo e wi dhakono,+ kod ondiek moting’eno ma nigi wiye abiriyo kod tunge apar:+
8 Ondiek ma ia nenono ne nitie, to koro oonge, to pod ochiegni biro koa e bur matut ma onge giko,*+ kae to obiro dhi nyaka e kethruokne. Eka jo modak e piny—ma nyinggi pok ondik e buk modol mar ngima+ nyaka a chakruok mar piny—biro wuoro ka gineno kaka ondiegno ne nitie, to koro oonge, to pod obiro betie.
9 “Mano en gima dwaro paro mariek: Wiye abiriyogo+ gin gode abiriyo ma dhakono obet e wigi.
10 Kendo nitiere ruodhi abiriyo: Abich osepodho, achiel nitie, kendo machielo pok ochopo; to ka ochopo, obiro betie kuom kinde manok.
11 To ondiek ma ne nitie to kendo ongeno,+ en bende e ma en ruoth mar aboro, kata kamano, obiro betie kowuok kuom abiriyogo, eka obiro dhi nyaka e kethruokne.
12 “Tunge apar ma ia nenogo gin ruodhi apar ma pok oyudo pinyruoth, kata kamano, giyudo teko mar locho kaka ruodhi kuom sa achiel kanyachiel gi ondiegno.
13 Gin gi paro achiel, kuom mano, gimiyo ondiegno tekogi kod nyalogi mar locho.
14 Gibiro kedo gi Nyarombo,+ kata kamano, nikech Nyarombono en Jaloch manie wi joloch kendo Ruoth manie wi ruodhi,+ obiro loyogi.+ To jo ma ni kode ma ne oluong, kendo ma ne oyier, mosechung’ motegno, bende biro locho.”+
15 Ne owachona kama: “Pige ma ia neno ma dhako ma jachodeno obetie gin pinje, gi ji, gi ogendni, kod dhok mopogore opogore.+
16 To tunge apar+ ma ia nenogo kod ondiegno+ biro sin gi dhakono,+ kendo ginikethe mi giweye duk, eka ginicham ringrene kendo gibiro wang’e gi mach mi gitieke chuth.+
17 Nimar Nyasaye noketo ei chunygi mondo gitim kaluwore gi pache,+ ee, mondo gitim pachgi achielno, ka gimiyo ondiegno loch mar pinyruodhgi,+ nyaka chop ka ma weche ma Nyasaye osewacho timre.
18 To dhako+ ma ia nenono en dala maduong’ ma nigi pinyruoth manie wi ruodhi mag piny.”
Weche Moler Piny
^ Som Tiend Weche.
^ E dho Grik en porneia. Som Tiend Weche.
^ E dho Grik en porneia. Som Tiend Weche.
^ Kata, “abiso.” Som Tiend Weche.
