Fweny mar Johana 18:1-24
18 Bang’ mago, ne aneno malaika machielo ka lor koa e polo ka en gi teko maduong’, kendo duong’ne ne rieny ka menyo piny.
2 Kendo nokok gi dwol maduong’ kowacho niya: “Ero, osepodho! Babulon Maduong’ osepodho,+ kendo osebedo kar dak mar jochiende kod ka ma muya duto ma ok ler* gi kit winy duto ma ok ler kod makuero opondoe!+
3 Nikech kuom divai mager mar owruokne gi gombo mar terruok,* ogendni duto osemer,+ kendo ruodhi mag piny oseterore kode,+ kendo jolok ohelni madongo mag piny nomewo nikech ngimane ma malo ma onge wich-kuot.”
4 Eka ne awinjo dwol machielo koa e polo ma wacho niya: “Auru kuome, un joga,+ ka ok udwar riworu kode e richone, kendo ka ok udwar ni moko kuom masichene oyudu.+
5 Nimar richone osebiwore kanyachiel mochopo nyaka e polo,+ kendo Nyasaye oseparo timbene ma ok kare.+
6 Chule kaluwore gi kaka notimo ne jomamoko,+ ee, chule nyadiriyo nikech gik mosetimogo;+ okombe+ ma norupogo ne jomamoko, ruwnego nyadiriyo.+
7 Mana kaka ne omiyore duong’ owuon kodak e ngima ma malo, e okang’ ma kamano bende, miye sand kod kuyo. Nikech osiko kowacho e chunye niya: ‘Alocho kaka ruoth ma dhako, kendo ok an chi liel, kendo ok abi yudo kuyo ngang’.’+
8 Mano e momiyo masichene nobi e odiechieng’ achiel: tho gi kuyo gi kech, kendo ibiro wang’e gi mach mi tieke chuth,+ nikech Jehova* Nyasaye ma nong’adone burano en jal ma ratego.+
9 “Kendo ruodhi mag piny ma noterore* kode ka gidak kode e ngimane ma malo kendo ma onge wich-kuot, biro ywage ka gigoyo korgi, ka gi kuyo sa ma gineno yiro ma wuok ka miwang’ee.
10 Ginichung’ gi ka mabor matin nikech giluoro sandne, mi giniwach niya: ‘Yaye, lit manade, lit manade, in dala maduong’no,+ Babulon dala motegno, nikech kuom sa achiel, bura moseng’adni osetimore!’
11 “Bende, jolok ohelni madongo mag piny ywage ka gikuyo nikech koro onge ng’at ma ding’iew mwandu mogundho ma gisekelo,
12 mwandugi mogundho mag dhahabu, gi fedha, gi kite ma nengogi tek, gi kite mag lulu, gi lep kitani mabeyo, gi lewni ma rangigi rajamna, gi lewni ma reprep, gi lewni ma kwar; gi gimoro amora molos gi bepe ma nigi suya mamit; gi kit gik moko duto molos gi leke liech, gi bepe ma nengogi tek, gi mula, gi chuma, kod kite mag mablo;
13 bende, dalasini, gi yien ma nigi suya mag India, gi ubani, gi mo ma nigi suya mamit, gi ubani ma rachar, gi divai, gi mor zeituni, gi mogo mayom, gi ngano, gi jamni, gi rombe, gi farese, gi geche, gi wasumbni, to kata mana ngima ji.
14 Ee, olemo mabeyo ma chunyi ne gombo oseweyi, kendo chiemo mabeyo duto kod gik ma lombo wang’ oseringo moweyi, kendo giselal nono.
15 “Jolok ohelni ma ne uso gigo, ma nomewo nikech en, biro chung’ gi ka mabor nikech giluoro sandne kendo gibiro kuyo kendo ywage
16 ka giwacho niya: ‘Yaye, lit manade, lit manade, in dala maduong’no, mirwakori gi law kitani maber, gi law ma rangine rajamna, kod law ma kwar, kendo in mibidhori gi gige dhahabu, gi kite ma nengogi tek, kod kite mag lulu,+
17 nikech kuom sa achiel, mwandu mang’eny kamano osekethore chuth!’
“Kendo jotelo duto mag meli, gi jo ma wuotho gi meli, gi jokwang’ meli, kod ji duto ma tiyo e nam ne ochung’ gi ka mabor
18 kendo ne gikok matek sa ma ging’iyo yiro ma wuok ka miwang’ee, ka gipenjore niya: ‘En dala mane ma chal gi dala maduong’no?’
19 Ne gikiro buru e wigi ka gikok, kendo ne giywak ka gikuyo ka giwacho niya: ‘Yaye, lit manade, lit manade, dala maduong’no, ka ma ji duto ma ne nigi meli mag nam nobedo momewo kuom mwandune, nimar kuom sa achiel, osekethe chuth!’+
20 “Moruru un polo,+ bende, un jo maler,+ gi joote, gi jonabi, nikech bura ma Nyasaye oseng’ado e lou ne dhakono!”+
21 Eka malaika moro ma ratego noting’o kidi moro maduong’ malo ma chal gi kidi mar pong’, mi ne owite e nam kowacho niya: “Aruya kamano e kaka ibiro wit Babulon dala maduong’no piny, mi ok nobedie kendo ngang’.+
22 Dwond jo ma wer gi nyatiti, gi jower, gi jogo asili, gi jogo turmbeta, ok nochak obedie kuomi ngang’. Bende, onge jatheth mar gimoro amora mibiro yud kuomi kendo, kata koko moro amora mar kidi mar pong’ ok nochak owinjre kuomi ngang’.
23 Onge ler mar taya ma nochak orieny kuomi ngang’, kendo onge dwol moro amora mar wuon kisera kod mar miaha ma nowinj kuomi kendo ngang’; jolok ohelni magi ne gin jo ohala madongo e piny, bende, ne iwuondo ogendni duto gi timbeni mag juok.+
24 Ee, kuome ne oyudie remb jonabi gi mag jo maler+ kod mag ji duto ma ne oneg e piny.”+
Weche Moler Piny
^ Kata nyalo bedo, “muya; yamo.”
^ E dho Grik en porneia. Som Tiend Weche.
^ Som Apendiks A5.
^ Som Tiend Weche.
