Fweny mar Johana 20:1-15
20 Eka ne aneno malaika moro ka lor piny koa e polo ka en gi ofungu mar bur matut ma onge giko*+ kod nyororo mang’ongo e lwete.
2 Nomako thuol mang’ongono,+ thuol machoncha,+ ma en Jachien+ kendo Satan,+ mi ne otueye kuom higni 1,000.
3 Eka malaikano ne owite e bur matut ma onge giko*+ mi oloro dho burno, kae to ne odine matek mondo kik ochak owuond ogendni kendo nyaka bang’ higni 1,000. Bang’ mago, ibiro gonye kuom kinde manok.+
4 Eka ne aneno kombe mag loch, kendo ne omi jo mobet e kombego teko mar ng’ado bura. Ee, ne aneno chunje* jo ma ne oneg* nikech chiwo neno e wi Yesu, kendo nikech yalo wach Nyasaye, kod jo ma ne pok olamo ondiegno kata kido mare, kendo ne ok oketnegi alama e lela wang’gi kata e lwetegi.+ Mi ne gibedo mangima, kendo ne gilocho kaka ruodhi kanyachiel gi Kristo+ kuom higni 1,000.
5 (To jo motho modong’+ ne ok obedo mangima nyaka bang’ higni 1,000.) Ma eri e chier mokwongo.+
6 Ng’at mamor kendo maler en ng’at ma nigi kare e chier mokwongo;+ tho mar ariyo+ onge gi teko kuomgi,+ to ginibed jodolo+ mag Nyasaye kod mag Kristo, kendo giniloch kaka ruodhi kanyachiel kode kuom higni 1,000.+
7 Koro mapiyo bang’ ka higni 1,000 oserumo, ibiro gony Satan oa e tuech,
8 eka enowuog mondo odhi owuond ogendni manie tunge ang’wen mag piny, Gog kod Magog, mondo ochokgi kanyachiel ne lweny. Kwan mar jogo ng’eny kaka kuoyo manie nam.
9 Kendo ne gidhi mi gikwako piny mangima, kendo ne gilworo kambi mar jo maler kod dala moher ahinyano. To mach ne olor piny koa e polo mi notiekogi giduto chuth.+
10 Eka Jachien ma ne wuondogi ne owit e ataro mar mach gi salfa,* ka ma ne osewitie ondiegcha+ kod janabi mar miriambo;+ kendo ibiro sandgi* odiechieng’ gi otieno nyaka chieng’.
11 Kendo ne aneno kom-loch maduong’ ma rachar kod Jal mobetie.+ Piny kod polo noringo mi oa e nyime,+ kendo kargi ne olal nono.
12 Mi ne aneno jo motho madongo gi matindo, kochung’ e nyim kom-lojno, kendo ne oyaw buge modol. Eka ne oyaw buk machielo modol; en bug ngima.+ Ne ong’ad ne jo motho bura koa e weche mondik ei bugego kaluwore gi timbegi.+
13 To nam nogolo jo motho manie iye, kendo tho gi Liel* nogolo jo motho manie igi, eka ne ong’adnegi bura ng’ato ka ng’ato kaluwore gi timbene.+
14 Kendo ne owit tho gi Liel* e ataro mar mach.+ Ataro mar machno+ en tho mar ariyo.+
15 E wi mano, ng’ato ang’ata ma nyinge ne ok ondik e bug ngima+ ne owit e ataro mar machno.+
Weche Moler Piny
^ Kata, “abiso.” Som Tiend Weche.
^ Kata, “abiso.” Som Tiend Weche.
^ Som Tiend Weche, kaachiel gi weche moler piny e Fwe 6:9.
^ Grik, “jo ma ne otong’ gi le.”
^ Ma en kit poda moro ma mako mach mapiyo ahinya, kendo sa ma oliel ogolo tik mager kendo marach.
^ Kata, “ibiro lornegi; ibiro tuegi.”
^ Grik, “Hades.” Som Tiend Weche.
^ Grik, “Hades.” Som Tiend Weche.
