Fweny mar Johana 8:1-13
8 Ka nogonyo+ kido mar abiriyo,+ polo ne oling’ thi kuom kinde ma dirom nus sa.
2 Eka ne aneno malaike abiriyo+ ma chung’ e nyim Nyasaye, kendo ne omigi turmbete abiriyo.
3 Malaika machielo ma ne nigi gir ting’o ubani molos gi dhahabu ne ochopo, mi ne ochung’ e dho kendo mar misango,+ kae to ne omiye ubani mang’eny+ mondo ochiwgi kanyachiel gi lamo mag jo maler duto e kendo mar misango mar dhahabu+ ma ne ni e nyim kom-lojno.
4 Yiro mar ubani moa e lwet malaikano kanyachiel gi lamo+ mag jo maler noidho malo e nyim Nyasaye.
5 Eka gikanyono, malaikano nokawo gir ting’o ubanino, kae to ne opong’e gi mach moko ma ne ni e kendo mar misangono, mi ne owito majno e piny. Bang’ mano, polo ne omor, kendo dwol moko nowinjore. Bende, polo ne omil,+ kendo piny noyiengni.
6 Eka malaike abiriyo ma ne nigi turmbete abiriyoka+ ne oikore goyogi.
7 Malaika mokwongo nogoyo turmbetane. Kendo pe gi mach moruwore gi remo ne obetie, mi ne owite e piny;+ eka achiel kuom adek mar piny ne owang’, kendo achiel kuom adek mar yien duto ne owang’, kendo lum gi yien mang’ich duto ne owang’.+
8 Malaika mar ariyo nogoyo turmbetane. Kendo ne owit e nam gimoro ma chalo kaka got maduong’ ma liel gi mach.+ Eka achiel kuom adek mar nam nolokore remo;+
9 kendo achiel kuom adek mar chuech duto mangima manie nam ne otho,+ kendo achiel kuom adek mag meli duto ne okethore.
10 Malaika mar adek nogoyo turmbetane. Kendo sulwe moro maduong’ ma liel ka taya ne olwar koa e polo, mi ne olwar e wi achiel kuom adek mar aoche kendo e wi sokni mag pige.+
11 Nying sulweno iluongo ni Yath-Makech. Kendo achiel kuom adek mar pige duto ne olokore mobedo makech ka yath-makechno, kendo pigego ne onego ji mang’eny, nimar ne oselok pigego obedo makech.+
12 Malaika mar ang’wen nogoyo turmbetane. Kendo ne ogo achiel kuom adek mar chieng’,+ gi achiel kuom adek mar dwe, kod achiel kuom adek mar sulwe, mondo achiel kuom adek mag gigo obed mudho,+ kendo achiel kuom adek mar odiechieng’ kik bed gi ler, to otieno bende kamano.
13 Eka ne aneno kendo ne awinjo otenga moro ma huyo e kor polo ka wacho gi dwol maduong’ niya: “Yaye! lit, lit, lit+ ne jo ma odak e piny nikech turmbete ma pod odong’ ma malaike adek chiegni goyo!”+