Fweny mar Johana 9:1-21
9 Malaika mar abich nogoyo turmbetane.+ Eka ne aneno sulwe moro ma noselwar e piny koa e polo, kendo ne omiye ofungu mar dho bur matut ma onge giko.*+
2 Noyawo dho bur matutno* kendo yiro nowuok e dho burno kaka yiro ma wuok e kendo mar mach maduong’, mi yirono nomiyo chieng’ kanyachiel gi muya obedo mudho.+
3 Kendo det-bonyo nowuok ei irono mi gibiro e piny,+ kendo ne omigi teko mana kaka teko ma thomoni mag piny bende nigo.
4 Ne onyisgi ni kik gikel hinyruok ne lum mag piny, kata ne yath moro amora mang’ich, to mana ne jo ma onge gi alama mar Nyasaye e lela wengegi.+
5 To ne omi det-bonyogo teko mar sando jogo kuom dweche abich, to ok mar negogi, kendo sand ma ne gikelo ne chal gi sand mar thomoni+ sa ma okayo ng’ato.
6 E ndalogo, ji nomany tho to ok giniyude ngang’, kendo ginigomb mondo githo, to tho noringgi aringa.
7 Kendo det-bonyogo ne chal gi farese moseik ne lweny;+ bende, e wigi ne nitie osimbo mag dhahabu, to lela wengegi ne chal gi lela wang’ dhano,
8 to yie wigi ne chal gi yie wi mon. Kendo lekegi ne chal gi leke sibuoche,+
9 kendo ne girwakore gi rageng’ mag akor ma chal gi molos gi chuma. To koko ma ne wuok e buombegi ne chal gi koko mar farese ma ywayo geche ka gidhi e lweny.+
10 Bende, gin gi yiwgi kod gik ma kecho mana kaka thomoni, kendo e yiwgi kanyo nitie teko mar hinyo dhano kuom dweche abich.+
11 Gin gi ruoth ma locho e wigi, ma en malaika mar bur matut ma onge giko.*+ E dho Hibrania, nyinge en Abadon,* to e dho Grik nyinge en Apoluon.*
12 Masira mokwongo osekalo. To ne! Pod nitie masiche ariyo+ ma biro bang’e.
13 Malaika mar auchiel+ nogoyo turmbetane.+ Kendo ne awinjo dwol achiel moa e tunge manie kendo mar misango molos gi dhahabu+ manie nyim Nyasaye
14 kowacho ne malaika mar auchiel ma ne nigi turmbetano kama: “Gony ane malaike ang’wen motue e aora maduong’ mar Yufrate.”+
15 Eka ne ogony malaike ang’wen-go ma noseik ne sano, gi odiechieng’no, gi dweno, kod higano, mondo gineg achiel kuom adek mar ji duto.
16 Kwan mar ogendni mag lweny moidho farese ne gin 20,000 nyadi 10,000;* ne awinjo kwan margi.
17 To ma e kaka ne aneno farese miwuoyo kuomgi e fwenyno kod jo ma ne oidhogi: Ne girwakore gi rageng’ mag akor ma kwar ka mach, kendo ma rambulu, kod ma ratong’, kendo wiye faresego ne chal gi wiye sibuoche,+ kendo mach gi yiro kod salfa* ne wuok e dhogi.
18 Kokalo kuom mach gi yiro kod salfa* ma ne wuok e dhogi, masiche adekgo ne onego achiel kuom adek mar ji duto.
19 Nimar teko ma faresego nigo ni e dhogi kendo e yiwgi; yiwgigo chalo gi thuonde kendo gin gi wiye, bende, mago e ma gikelogo hinyruok.
20 To jo modong’ ma masichego ne ok onego ne ok oloko chunygi gia e gik ma ne gitimo gi lwetegi. Ne ok giweyo lamo jochiende, gi sanamu mag dhahabu, gi fedha, gi mula, gi kite, kod bepe, ma gin gik ma ok nyal neno, kata winjo, kata wuotho.+
21 Bende, ne ok giloko chunygi gia e timbegi mag nek, kata mag juok, kata mag terruok,* kata mag kuo.
Weche Moler Piny
^ Kata, “abiso.” Som Tiend Weche.
^ Kata, “abiso.” Som Tiend Weche.
^ Kata, “abiso.” Som Tiend Weche.
^ Tiende ni, “Jakel kethruok.”
^ Tiende ni, “Kethruok.”
^ Tiende ni, 200,000,000.
^ Ma en kit poda moro ma mako mach mapiyo ahinya, kendo sa ma oliel ogolo tik mager kendo marach.
^ Ma en kit poda moro ma mako mach mapiyo ahinya, kendo sa ma oliel ogolo tik mager kendo marach.
^ E dho Grik en porneia. Som Tiend Weche.
