Hagai 1:1-15
1 E odiechieng’ mokwongo mar dwe mar auchiel, e higa mar ariyo mar loch Darius, Jehova Nyasaye nooro janabi Hagai*+ mondo odhi onyis gavana mar Juda ma niluongo ni Zerubabel+ wuod Shealtiel, gi Joshua wuod Jehozadak ma ne jadolo maduong’ niya:
2 “Jehova Nyasach oganda lweny owacho kama, ‘Ogandani wacho ni, “Kinde pok ochopo mar gero od* Jehova kendo.”’”+
3 Wach Jehova nochako obiro ne Hagai+ niya:
4 “Be ma en kinde monego udag e uteu ma ugero gi bepe mabeyo, to odni omukore kama?+
5 Jehova Nyasach oganda lweny wacho kama, ‘Nonuru timbeu.*
6 Uchuoyo kodhi mang’eny to ukayo cham matin.+ Uchiemo to ok uyieng’. Umetho to ok romu. Urwakoru to pod koyo chamou achama. Jatich tiyo kendo chamo osara to oketo osacheno e ofuko ma otuch.’”
7 “Jehova Nyasach oganda lweny wacho kama, ‘Nonuru timbeu.’*
8 “Jehova owacho kama: ‘Dhiuru e gode ukel yien,+ mondo ugerna ot+ ma mora kendo ma kelona duong’.’”+
9 “Jehova Nyasach oganda lweny owacho niya: ‘Ugeno yudo gik mathoth to uyudo mana matin, kendo ka ukelo gimoro e miechu to akudhe mabor.+ Uparo ni ang’o momiyo atimo kamano? En nikech un gi uteu mabeyo ma utimoe gigeu, to oda odong’ gunda.+
10 Mano e momiyo polo ok olnu tho e lum, kendo piny ok nyagnu gimoro.
11 Ne akelo oro moketho piny, gi gode, gi cham, gi divai manyien, gi mo, kendo gimoro amora ma twi e piny nobedo manok. Sani koro un kaachiel gi jambu uchandoru, kendo tije duto mutimo bedo mana kayiem nono.’”
12 Eka Zerubabel+ wuod Shealtiel,+ gi Joshua wuod Jehozadak+ jadolo maduong’, kaachiel gi jomamoko duto ne owinjo wach Jehova Nyasaye kod weche ma janabi Hagai ne owachonegi, nimar Jehova Nyasachgi e ma ne oore. Kendo ji nochako luoro Jehova.
13 Eka Hagai jaote mar Jehova ne onyiso ji ote ma Jehova ne omiye niya: “Jehova Nyasaye owacho ni en kodu.”+
14 Bang’ mano, Jehova ne ojiwo chuny+ Zerubabel wuod Shealtiel ma ne en gavana mar Juda,+ kod chuny Joshua+ wuod Jehozadak jadolo maduong’, kaachiel gi jomamoko duto, mi ne gibiro mi gichako gero od Jehova Nyasachgi.+
15 Ne gichako tijno e odiechieng’ mar 24 dwe mar auchiel, e higa mar ariyo mar loch Darius.+
Weche Moler Piny
^ Tiende ni, “Ng’at Monyuol Ndalo Sawo.”
^ Kata, “hekalu.”
^ Kata, “Keturu chunyu kuom yoreu.”
^ Kata, “Keturu chunyu kuom yoreu.”