Hagai 2:1-23
2 E odiechieng’ mar 21 dwe mar abiriyo, wach Jehova nobiro ne janabi Hagai+ niya:
2 “Dhi ipenj Zerubabel+ wuod Shealtiel, gavana mar Juda,+ gi Joshua+ wuod Jehozadak+ jadolo maduong’, kaachiel gi jomamoko duto kama:
3 ‘Be nitie ng’ato kuomu ma noneno odni* ka ne pod en gi duong’ne machon?+ To koro sani unene kochalo nade? Donge ok obernu ahinya ka opime gi duong’ ma ne en-go chon?’+
4 “Jehova owacho kama: ‘In Zerubabel kod Joshua wuod Jehozadak jadolo maduong’, beduru gi chuny motegno.’
“Kendo un jopiny duto, Jehova owachonu kama: ‘Beduru gi chuny motegno,+ kendo uti matek.’
“Jehova Nyasach oganda lweny owacho niya: ‘An kodu.+
5 Kik uluor.+ To paruru wach ma ne asingonu ka ne uwuok Misri,+ kendo roho mara pod nie dieru.’”*+
6 “Jehova Nyasach oganda lweny owacho ni, ‘Odong’ matin nono, to abiro yiengo polo, gi piny, kod nam.’+
7 “Jehova Nyasach oganda lweny owacho niya: ‘Abiro yiengo ogendni duto, kendo gik mabeyo ahinya mowuok e ogendni nobi;+ mi anapong’ odni gi duong’.’+
8 “Jehova Nyasach oganda lweny owacho niya, ‘An e wuon fedha, kendo an e wuon dhahabu.’
9 “Jehova Nyasach oganda lweny owacho kama: ‘Duong’ ma odni nobedgo biro loyo duong’ ma ne en-go chon.+
“Kendo Jehova Nyasach oganda lweny owacho niya: ‘Abiro kelo kuwe e odni.’”+
10 E odiechieng’ mar 24 dwe mar ochiko, e higa mar ariyo mar loch Darius, wach Jehova nobiro ne janabi Hagai+ niya:
11 “Jehova Nyasach oganda lweny wacho ni, ‘Penj jodolo gima chik wacho e wi wachni:+
12 “Ka ng’ato oting’o ring’o mowal ne Nyasaye e riak nangane, mi riak nanganeno omulo makate, kata kado, kata divai, kata mo, kata chiemo moro amora, be chiemono nobed maler?”’”
Jodolo nodwoko niya: “Ooyo!”
13 Eka Hagai ne openjogi niya: “Ka ng’ato omulo ringre gimoro motho, mi obedo ma ok ler to bang’e omulo chiemogo, be chiemo momulogo nobed ma ok ler?”+
Jodolo nodwoko niya: “Ee, gigo nobed ma ok ler.”
14 Omiyo Hagai nowacho niya: “Jehova owacho ni, ‘Mano e kaka jogi chalo, kendo mano e kaka ogandani chalo e nyima. Mano bende e kaka tijegi chalo, kendo gimoro amora ma gikelona ok ler.’
15 “‘To koro, kochakore kawuono ka dhi nyime, paruru wachni. Ka ne pok ochak ger hekalu mar Jehova,+
16 weche ne chalo nade? Donge ka ne ng’ato obiro ka mochokie cham kogeno yudo ogunde 20 noyudo mana 10 kende? Kendo ka ng’ato nobiro ka ma dag divai nitie kogeno yudo agulni 50, donge noyudo mana 20 kende?’+
17 Jehova owacho kama, ‘Ne aketho chambu duto gi yamb oro, pe, kod koth maduong’,+ to onge ng’ato ang’ata kuomu ma noduogo ira.’
18 “‘Kawuononi, ma en tarik 24 dwe mar ochiko, e odiechieng’ ma oketie mise mar hekalu mar Jehova.+ Omiyo, kochakore kawuono ka dhi nyime, paruru wachni:
19 Be sani nitie kodhi moro amora e kar keno?*+ Be mzabibu, gi ng’owo, gi komamanga, kod zeituni osenyak adier? Kochakore kawuono abiro guedhou.’”+
20 Wach Jehova ne obiro ne Hagai kendo e odiechieng’ mar 24 mar dweno+ niya:
21 “Wach ne Zerubabel gavana mar Juda ni, ‘Abiro yiengo polo gi piny.+
22 Abiro loko loch ma pinjeruodhi nigo, kendo abiro kawo teko ma gin-go e wi ogendni.+ Abiro goyo farese kod jo ma oidhogi, mi faresego duto biro tho kendo jo moidhogi biro negore giwegi gi ligangla.’”+
23 “‘E odiechiengno,’ Jehova Nyasach oganda lweny owacho, ‘Abiro kawi in jatichna Zerubabel+ wuod Shealtiel,’+ Jehova owacho, ‘kendo abiro miyo ichal gi tere makende nikech in e ma aseyieri,’ Jehova Nyasach oganda lweny osewacho.”
Weche Moler Piny
^ Kata, “hekaluni.”
^ Kata nyalo bedo, “kendo ka ne roho mara ochung’ e dieru.”
^ Magi ne gin kuonde keno ma ne okuny e lowo.
