Hosea 6:1-11
6 “Biuru wadog ir Jehova,Nimar osekidhowa matindo tindo,+ to obiro changowa.
Osegoyowa, to obiro boyo adhondewa.
2 Obiro duogo chunywa bang’ ndalo ariyo.
Odiechieng’ mar adek obiro chungowa malo,Kendo wabiro bedo mangima e nyime.
3 Wabiro ng’eyo Jehova, ee, wabiro timo kinda mondo wang’eye.
Wuokne oko chalo gi ru mar piny;Enobinwa mana ka koth,Mana ka koth ma yomo piny.”
4 “Yaye Efraim, atimi nade?
Yaye Juda, atimi nade?
Nimar herani chalo gi boche polo mokinyi,Kendo ka tho ma lal piyo e lum.
5 Mano e momiyo abiro tiyo gi jonabi e tong’ogi;+Abiro negogi gi weche moa e dhoga.+
Kendo bura ma abiro ng’adonu biro rieny ka ler.+
6 Nimar gima adwaro moloyo en hera mosiko to ok misengni,Kendo ng’eyo Nyasaye ber moloyo misengni miwang’o pep.+
7 To giseketho singruok mana kaka dhano.+
Gisendhoga e pinygi.
8 Gilead en taon mopong’ gi joricho,+Jo ma ohero chuero remo e mopong’e.+
9 Jodolo chalo gi jo ma obuto ne ng’ato.
Ginego ji e ndara man Shekem,+Timbegi kuodo wich.
10 Aseneno gima rach ahinya ma timore e od Israel.
Kanyo e ma Efraim chodoe;+Israel osedwanyore.+
11 To in A Juda, keyo oriti,Kinde ma abiro choko joga ka agologi e tuech.”+
