Isaya 22:1-25
22 Ma e gima nowach e wi Hoho mar Fweny:*+
En ang’o ma otimou momiyo uduto uidho e wi tat udi?
2 Ne ipong’ gi chochni,Dala ma ne ohero koko, taon ma ne sungore.
Jogi ne ok neg gi ligangla,Kata tho e lweny.+
3 Ruodhi duto ma ne locho gi agoko oseringo kanyachiel.+
Ne omakgi ka pok oywa atung’.
Ji duto ma ne oyud ne omak,+Kata obedo ni ne giseringo mabor.
4 Mano e momiyo ne awacho niya: “Weuru ng’iya,Kik utem hoyo chunya.
Abiro ywak malit,+Nikech oseketh joga.*+
5 Nimar en odiechieng chochni, luoro, kendo ma iloyowae,+Odiechiengno oa kuom Jehova Wuon Loch Duto kendo Nyasach oganda lweny,E Hoho mar Fweny.
Imuko ohinga+Kendo ywak winjore e gode.
6 Elam+ osekawo ofuko mar aserniKaachiel gi geche lweny kod farese,To Kir+ iko okumba.
7 Hohni magi mabeyoBiro pong’ gi geche lweny,Kendo farese biro riedo e dho rangau,
8 Ibiro gol rageng’ ma Juda ogeng’orego.*
“Chieng’no unuchom wang’u kuom gigeu mag lweny mokan e ot miluongo ni Od Bungu,+
9 kendo unune kuonde momukore e ohinga manie Dala Daudi.+ Mi unuchik pi e yawo ma mwalo.+
10 Ubiro kwano udi man Jerusalem, kendo ubiro muko moko kuomgi mondo ulosgo ohinga obed motegno.
11 Ubiro kunyo yawo e kind ohinga ma oko kod ohinga ma iye, mondo pi soko machon odonjie. Kata kamano, ok unupar Jachuechne Maduong’, kendo ok ubi dewo Jal ma nolose chon gi lala.
12 Chieng’no Jehova Wuon Loch Duto, kendo Nyasach oganda lweny,Biro luongou mondo uywagi, ugo nduru,+Uliel yie wiu, kendo urwak lep gunia.
13 Kata kamano, un to ubiro mana timo nyasi kumorUbiro nego dhok kod rombe,Kuchamo ring’o kendo kumadho divai.+
Unuwach ni, ‘Wachiemuru kendo wamethuru nimar kiny wanatho.’”+
14 Eka Jehova Nyasach oganda lweny ne ohulona wachni e ita: “Richoni ok nopwodh nyaka chop utho,”+ Jehova Wuon Loch Duto kendo Nyasach oganda lweny osewacho.
15 Ma e gima Jehova Wuon Loch Duto kendo Nyasach oganda lweny owacho: “Dhi ir Shebna,+ jal mochung’ ne od ruoth, mondo inyise niya,
16 ‘Ere gima itimo kae, koso ere wadu man kae momiyo isekunyo liendi?’ Shebna osekunyo liende e ka ma oting’ore malo; osekunyo lwanda mondo obed kama ringrene biro yueyoe.
17 ‘Winji! Jehova biro goyi piny matek, yaye in dhano, obiro maki matek.
18 Obiro doli, motueyi matek, kae to oboli mana kaka ibolo opira e pap. Ibiro tho kuno, kendo gecheni mag lweny ma ne isungorigo biro siko kuno. In e misemiyo od ruodhi wich-kuot.
19 Abiro goli e tiji, kendo anaduoki piny.
20 “‘Chieng’no abiro luongo jatichna Eliakim+ wuod Hilkia,
21 abiro rwakone lawi, kendo anatuene msibi mar akor.+ Abiro miye teko ma in-go. En e ma nobed wuon jo modak Jerusalem, kendo wuon dhood Juda.
22 Abiro keto ofungu mar od Daudi+ e goke. Onge ng’at ma biro loro gima oyawo; kata ma biro yawo gima oloro.
23 Anagure matek mana kaka msumal. Enobed kaka kom-loch ma nigi duong’ e od wuon-gi.
24 Duong’ duto mar od wuon-gi ibiro lier kuome. Kendo nyithindgi kod nyikwagi biro gene mana kaka agulni, bakunde, gi dapige mong’aw e msumal.
25 “Jehova Nyasach oganda lweny owacho niya: ‘Chieng’no, ibiro wuodh msumal mogur matek,+ ibiro ng’ade mi olwar, kendo gik moko duto ma ne oliero kuome biro lwar piny mi gikethre, nimar Jehova owuon e mowacho kamano.’”
Weche Moler Piny
^ Nenore ni iwuoyo kuom Jerusalem.
^ Kata “oseketh nyar joga.” Nyalo bedo ni wendni ne iwero sa ma ikecho ng’ato.
^ Kata, “Ibiro gol gima rito Juda.”
