Isaya 7:1-25
7 E ndalo ma Ahaz+ wuod Jotham ma wuod Uzia ne locho e wi Juda, Rezin ruodh Siria kod Peka+ wuod Remalia ruodh Israel nobiro monjo Jerusalem. Kata kamano, ne ok olocho.*+
2 Wach ne ochopo ne jood Daudi niya: “Jo-Siria oseriwore gi Jo-Efraim.”
Eka luoro maduong’ ne omako Ahaz kod joge, mi gichako tetni mana ka yiende ma yamo yuko e bungu.
3 To Jehova nowacho ne Isaya niya: “Wuog idhi gi wuodi ma Shear-jashub*+ mondo irom ne Ahaz kama freji ma golo pi e yawo ma malo ogikie,+ but yo mochomo puoth jalwok lewni.
4 Iniwachne kama, ‘Kik iluor kendo kik iwe mirima ma wuod Remalia kod Rezin ma ruodh Siria nigo oneg chunyi, nikech gin mana osiki ariyo mag mach machiegni sim.+
5 Nikech Jo-Siria gi Efraim kaachiel gi wuod Remalia osechano tiekou ka giwacho niya:
6 “Wadhi waked gi Juda, wakidhe, kendo wakawe,* kae to waket wuod Tabeel obed ruoth kuno.”+
7 “‘Jehova Wuon Loch Duto owacho niya:
“Gima kamano ok nyalre,Kendo ok notimre ngang’!
8 Nimar wi Siria en Damaski,To wi Damaski en Rezin.
Kendo ka pok higni 65 orumo,Ibiro keth Efraim chuth mi ok nochak obed oganda.+
9 Wi Efraim en Samaria,+Kendo wi Samaria en wuod Remalia.+
Ka ionge gi yie motegno,To miseni ok nobed motegno.”’”
10 Jehova nomedo wacho ne Ahaz niya:
11 “Kwa Jehova Nyasachi mondo otimni ranyisi moro amora.+ Onyalo bedo ranyisi matut ka Liel* kata mabor ka polo.”
12 To Ahaz nodwoko kama: “Ok abi kwayo Jehova wachno, kendo ok abi teme.”
13 Eka Isaya nowacho niya: “Winjuru un jood Daudi! Usejogo ji, to koro ang’o momiyo udwaro jogo Nyasaye bende?+
14 Kuom mano, Jehova owuon biro timonu ranyisi: Neuru! Nyako moro biro mako ich kendo obiro nyuolo wuoyi,+ mi nochake ni Emanuel.*+
15 Nyathino biro chako chamo mor dhiang’ gi mor kich ka pok ong’eyo pogo ber gi rach.
16 Nimar ka pok nyathino ong’eyo pogo ber gi rach, ibiro jwang’ pinje ma ruodhi ariyo ma iluorogo lochoe.+
17 To in Ahaz, kod jogi, kaachiel gi jood wuonu, Jehova biro miyo ubed gi kinde matek. Mago nobed kinde ma pok nobedoe chakre ne Efraim pogre gi Juda,+ nimar obiro kelonu ruodh Asuria mondo oked kodu.+
18 “E ndalono, Jehova biro liyo mi lwang’ni moa mabor e aoche mag Nael e piny Misri nobi, kendo kich moa e piny Asuria bende nobi.
19 Mi ginipi e hohni, e buche mag lwendni, e wi yiende duto motimo kuthe, kaachiel gi pewe mag kwath duto.
20 “E ndalono, Jehova biro lielo yie wiyi, yie tiendi, kaachiel gi yie tiki kotiyo gi wembe mohol e pinje man but Aora.* Obiro tiyo gi ruodh Asuria.+
21 “E ndalono, ng’ato nopidh dhiang’ achiel gi rombe ariyo.
22 Kendo nikech chak nobed mang’eny e piny, ng’atno nocham mor dhiang’, kendo ng’ato ang’ata modong’ e pinyno nocham mor dhiang’ gi mor kich.
23 “E ndalono, puothe ma yande opidhie mzabibu 1,000 ma nengogi romre gi fedha 1,000 nolokre bunge motimo kuthe gi buya.
24 Jo ma biro dhi kuno noting’ atunge kod asere, nikech pinyno nopong’ gi bunge kod kuthe.
25 Kendo ubiro luor dhi but gode duto ma yande upuro gi kwer, nikech ginitim bunge kod kuthe mang’eny. Ruedhi gi rombe e ma biro kwayo kuondego.”
Weche Moler Piny
^ Kata nyalo bedo, “ne ok gilocho.”
^ Tiende ni, “Jo Manok e ma Noduogi.”
^ Kata nyalo bedo, “wamonje.”
^ Hibrania, “Sheol.” Som Tiend Weche.
^ Tiende ni, “Nyasaye ni Kodwa.”
^ Tiende ni, Yufrate.
