Barua mar Jakobo 1:1-27
1 An Jakobo,+ misumba Nyasaye kod Ruoth Yesu Kristo, andikonu un dhoudi 12 mokere kuonde mopogore opogore:
Amosou!
2 Owetena, kwanuru ni en mana mor lilo sa muromo gi tembe mopogore opogore,+
3 ka ung’eyo ni sa mutimo kamano, yieu ma koro osekalo e temno nyago kido mar sinani.+
4 To weuru mondo kido mar sinani ochop tichne chuth, eka ubed moromo chutho kendo malong’o e weche duto, ma ok urem e yo moro amora.+
5 Omiyo, ka nitiere ng’ato e kindu mochando rieko, osik kokwayo Nyasaye,+ nimar Nyasaye chiwo rieko ne ji duto e yo mogundho ma ok omany ketho kuom ng’ato,+ kendo enomiyego.+
6 To osik ka okwayo ka en gi yie+ ma ok oriw gi kiawa kata matin,+ nimar ng’at ma riwo gi kiawa chal gi apaka manie nam ma yamo tago kendo tero koni gi koni.
7 Kuom adier, ng’atno ok onego ogen yudo gimoro amora kuom Jehova;*
8 en ng’at ma bagni e paro ariyo+ kendo ma ok ochung’ motegno e yorene duto.
9 To owadwa manie ngima ma piny obed mamor nikech oseting’e malo,+
10 bende, owadwa ma jamwandu mondo obed mamor nikech oseduoke piny,+ nimar mana kaka maua manie pap, jamwandu biro lal nono.
11 Mana kaka chieng’ wuok gi liet mager kendo miyo yien gi lum ner, kendo miyo maua mosethiewo kuomgi lwar mi bergi ma oko lal nono, kamano bende e kaka jamwandu biro lal nono e yorene moluworego.+
12 Ng’at mamor en ng’at ma nano e tem,+ nikech ka Nyasaye oseyie kode, ng’atno biro yudo osimbo mar ngima+ ma Jehova* nosingo ne jo ma dhi nyime here.+
13 Kitemo ng’ato, kik owach niya: “Nyasaye tema.” Nimar ok nyal tem Nyasaye gi gik maricho, to en owuon bende ok otem ng’ato.
14 To ng’ato ka ng’ato itemo ka iywaye kendo ka iyondhe gi gombone owuon.+
15 Eka ka gomboneno osetegno,* onyuolo richo; kae to richono kelo tho.+
16 Owetena ma ahero, kik wuondu.
17 Mich mabeyo duto gi chiwo malong’o duto a malo.+ Gilor piny ka giwuok kuom Wuoro ma wuon gik ma rieny e polo,+ jal ma ok lokre kata ma ok sud kaka tipo.+
18 Dwache ne en ni mondo onyuolwa kokalo kuom wachne mar adiera,+ mondo wabi wabed nyak mokwongo mag chuechne.+
19 Un owetena ma ahero, ng’euru wachni: Ng’ato ka ng’ato nyaka bed ng’at ma winjo wach piyo, ma ok rikni e wuoyo,+ kendo ma iye ok wang’ piyo,+
20 nikech mirimb dhano ok chop gima kare e wang’ Nyasaye.+
21 Kuom mano, goluru chilo duto kod gimoro amora marach* kuomu,+ kendo urwak wach ma ichuoyo e iu, ma en gima nyalo resou, ka utimo kamano e yor muolo.
22 Kata kamano, kik ubed jo ma winjo awinja wach kende, to utim kaka wach Nyasaye dwaro,+ ma ok uwuondoru uwegi gi paro mag miriambo.
23 Nimar ng’at ma winjo awinja wach to ok otim+ chalo gi ng’at ma ng’iyo wang’e e kio.
24 Ong’iyore, kae to owuok kanyo, to mapiyo wiye wil gi kaka ochalo.
25 To ng’at ma nono i chik kendo osiko ei chikno,+ ma en chik malong’o chuth ma miyo ji bedo thuolo, ok obed kaka ng’at ma winjo kae to wiye wil, to obedo ng’at ma timo kaluwore gi kaka idwaro; kendo obiro bedo mamor kuom time.+
26 Ka ng’ato paro ni en jalam Nyasaye, to ok orit lewe,*+ owuondo chunye owuon kendo lamo mare en kayiem nono.
27 Lamo maler kendo ma ok ochido e wang’ Nyasachwa kendo Wuoro en ma: ni warit nyithi kiye+ kod mond liete+ e chandruokgi,+ kendo waritre wawegi mondo kik wabed gi mbala moro amora moa e pinyni.+
Weche Moler Piny
^ Som Apendiks A5.
^ Som Apendiks A5.
^ Grik, “osemako ich.”
^ Kata nyalo bedo, “timbe maricho mogundho.”
^ Kata, “ok otue lewe.”
