Jeremia 12:1-17
12 A Jehova, in ng’at makare+ sa ma akeloni ywakna,Sa ma awuoyo kodi e wi wach ng’ado bura makare.
To ang’o momiyo yore mag joricho dhi maber,+Kendo ang’o momiyo jo andhoga chunygi ng’ich?
2 Ne ipidhogi, kendo tiendgi osemoko e lowo.
Gisedongo mi ginyago olemo.
Giluongi gi dhogi, to chunygi* ni mabor kodi.+
3 An to ing’eya maber, A Jehova,+ ing’iya;Isenono chunya miyudo ni chunya omakore kodi.*+
Ketgi tenge ka rombe mitero e yeng’o,Ketgi tenge ne odiechieng nek.
4 Piny nodhi nyime two nyaka karang’oKendo alode kod yien biro ner nyaka karang’o?+
Richo mag jo modak e piny,Osemiyo le kod winy olal nono.
Nimar gisewacho niya: “Ok onyal neno gima biro yudowa.”
5 Ka ringo gi jotielo e ma jonyi,Ere kaka dipiem gi farese?+
Sani chunyi ng’ich nikech idak e piny mokuwe,Ibiro timo nang’o e piny motimo bunge manie bath Jordan?
6 Nimar kata mana oweteni, jood wuoru,Osendhogi.+
Gisegoyo koko bang’i.
Kik igen-gi,Kata ka giwachoni weche mabeyo.
7 “Asejwang’o oda;+ aseweyo pokna.+
Asechiwo jaherana ma ahero ahinya e lwet wasike.+
8 Pokna osebedona ka sibuor manie bungu.
Oserutona.
Omiyo, asin kode.
9 Pokna chalo gi winyo ma rangine ng’eny, kendo ma chamo le mamoko;Winy ma chamo ring’o olwore mondo omonje.+
Biuru, chokreuru kanyachiel, un le duto mag bungu,Biuru uchiem.+
10 Jokwath mang’eny oseketho puotha mar mzabibu;+Gisenyono piny ma ne omiya.+
Giseketho pinya machon ne ber ma giloke gunda.
11 Osedong’ nono.
Osetwo.*
Osedong’ gunda e nyima.+
Pinyno duto osejwang’,To onge ng’at ma dewo mano.+
12 Jonek osebiro ka giluwo nderni duto moyugno manie thim,Nimar ligangla mar Jehova tieko ji koa tung’ pinyno nyaka tung’ pinyno.+
Onge ng’ato ang’ata ma nigi kuwe.
13 Gipidho ngano, to gikayo kuthe.+
Gitiyo matek to onge ohala ma giyudo.
Gik ma gibiro nyago biro kuodo wigiNikech mirima mager mar Jehova.”
14 Ma e gima Jehova wacho ne ogendni maricho mokiewo koda, kendo mamulo pok ma ne omiyo Jo-Israel mondo obed margi:+ “Abiro pudhogi e pinygi,+ kendo abiro pudho Jo-Juda manie kindgi.
15 To bang’ ka asepudhogi, abiro kechogi mi anaduok ng’ato ka ng’ato e pinye kendo e lope owuon.”
16 “To ka ogendnigo opuonjore yore mag joga, kendo gikuong’ore gi nyinga ni, ‘Akuong’ora gi nying Jehova!’ mana kaka ne gipuonjo joga kuong’ore gi nying Baal, eka giniyud kargi e kind joga.
17 To ka gidagi winjo wach, abiro pudho ogandano mi anakethe,” Jehova owacho.+
Weche Moler Piny
^ Kata, “pachgi ma iye.” Hibrania, “nyarogno.”
^ Kata, “miyudo ni wan e winjruok achiel.”
^ Kata nyalo bedo, “Oywagore.”
