Jeremia 16:1-21
16 Wach Jehova nobirona kendo niya:
2 “Kik ikendi, kendo kik inyuol yawuoyi kata nyiri e pinyni.
3 Nimar ma e gima Jehova owacho e wi nyithindo ma inyuolo e pinyni kaachiel gi jonyuolgi:
4 ‘Tuoche malich biro negogi,+ to onge ng’at ma noywaggi kata yikogi; gibiro lokore manyiwa e wi piny.+ Ligangla kod kech biro negogi,+ kendo winy ma fuyo e kor polo kod ondiegi mag piny biro chamo ringregi.’
5 Jehova owacho niya,‘Kik idonj e ot ma itimoe nyasi mar ywago ng’at motho,Kik igo nduru kata hoyo jo mokuyo.’+
‘Nimar asegolo kuwe ma ne amiyo ogandani,’ Jehova owacho,‘Asegolo bende herana mosiko kod kechna kuomgi.+
6 Jo madongo kod jo matindo biro tho e pinyni.
Ok noyikgi,Onge ng’at ma noywaggi,Onge ng’at ma biro saro dende kata lielo wiye nikech gin.*
7 Onge ng’at ma biro chiwo chiemo ne jo ma ywago ng’atgi,Kohoyogo chunygi;Kata ng’at ma nomigi okombe mar divaiMondo giywaggo wuon-gi kata min-gi.
8 Kik idonj e ot ma ji timoe nyasiMondo ibed piny kichiemo kendo metho kodgi.’
9 “Nimar ma e gima Jehova Nyasach oganda lweny, Nyasach Israel owacho, ‘Abiro tieko mor kod ilo ma jogo nigo, ma kata dwond miaha kod wuon kisera ok bi winjore kendo.+ Gigi duto abiro timo ka pod ingima kendo kineno gi wang’i.’
10 “Ka inyiso ogandani wechegi, gibiro penji ni, ‘Ang’o momiyo Jehova dwaro kelonwa masira maduong’ni? En richo kata ketho mane ma wasetimo ne Jehova Nyasachwa?’+
11 Ibiro dwokogi kama: ‘“En nikech kwereu ne oweya,”+ Jehova owacho, “kendo ne giluwo nyiseche mamoko, mi gitiyonegi ka gikulorenegi.+ Ne giweya mi gitamore luwo chikena.+
12 To un usetimo gik maricho moloyo kata kwereu,+ ng’ato ka ng’ato kuomu luwo mana chunye mopong’ gi richo kar winjo wachna.+
13 Kuom mano, abiro riembou e pinyni, mi ateru e piny ma ok ung’eyo kata ma kwereu bende ne ok ong’eyo,+ kendo kuno ubiro lamo nyiseche mamoko odiechieng’ gotieno,+ nikech ok abi kechou.”’
14 “‘Kata kamano, ndalo biro,’ Jehova owacho, ‘ma ok ginikuong’re kendo niya: “Akuong’ora gi nying Jehova, ma nogolo Jo-Israel e piny Misri!”+
15 to gibiro kuong’ore niya: “Akuong’ora gi nying Jehova, ma nogolo Jo-Israel e piny man yo nyandwat, kendo e pinje mamoko duto ma ne okeyogie!” anaduokgi e piny ma ne amiyo kweregi.’+
16 ‘Eri, aluongo jolupo mang’eny,’ Jehova owacho,‘Kendo gibiro makogi ka rech.
Bang’ mano, abiro luongo jodwar mathoth,Ma biro lawogi e gode madongo kod matindo duto,Kendo e lwendni kod buche manie lwendni.
17 Nimar wengena neno yoregi duto.
Gik ma gitimo ok opondo ne wang’a,Richogi bende ok opondo ne wang’a.
18 To mokwongo, abiro chulogi nyadiriyo nikech kethogi kod richogi,+Nimar gisedwanyo pinya gi sanambegi makwero ma onge ngima mana ka ringre jo mothoKendo gisepong’o pokna gi gik ma sino ji.’”+
19 A Jehova, tekona kendo kar geng’ruokna,Ka ma aringoe e ndalo chandruok,+Ogendni moa e tunge piny nobi iri,Kendo gibiro wacho niya: “Puonj ma kwerewa noyudo kuom wuonegi ne gin mana miriambo,Weche manono kendo ma ok kony.”+
20 Be dhano nyalo loso nyiseche molamo,Ka nyisechego ok gin nyiseche adier?+
21 “Omiyo, anami ging’e,E kindegi abiro miyo ging’e tekona kod nyalona,Kendo gibiro ng’eyo ni nyinga en Jehova.”
Weche Moler Piny
^ Nyalo bedo ni Jo-Israel ma nong’anyo ne luwo timbe mag ogendni mamoko sa ma ne giywago ng’at motho.
