Jeremia 19:1-15
19 Ma e gima Jehova nowachona: “Dhi ing’iew agulu ir jachue-agulni.+ Bende, inikaw jodong-oganda moko kaachiel gi jodong-jodolo moko,
2 mondo udhi e Hoho mar Wuod Hinom,+ e dho rangach miluongo ni Ranga Jochue-Agulni. Kuno e ma ibiro landoe weche ma abiro nyisi.
3 Iniwachnegi ni, ‘Winjuru wach Jehova, un ruodhi mag Juda kod jo modak Jerusalem. Ma e gima Jehova Nyasach oganda lweny, Nyasach Israel owacho:
“‘“Achiegni kelo masira kae, kendo ng’ato ka ng’ato mowinjo wachno biro bwok.*
4 Abiro timo kamano nikech ne giweya,+ mi gidwanyo kae.+ Gichiwo misengni ne nyiseche mamoko ma ne ok ging’eyo, kendo kata ruodhi mag Juda kod kweregi ne ok ong’eyo. Kendo gisepong’e gi remb jo ma onge ketho.+
5 Ne gigero kuonde moting’ore malo ne Baal mondo giwang’ie yawuotgi kaka misengni miwang’o ne Baal.+ Ne ok achikogi mondo gitim gima kamano, kendo chunya pok noparo timo gima kamano kata matin.”’+
6 “‘“Omiyo, neuru! ndalo biro,” Jehova owacho, “ma kae ok noluong kendo ni Tofeth kata Hoho mar Wuod Hinom, to ibiro luonge ni Hoho mar Nek.+
7 Kae e ma abiro kethoe chenro mag Jo-Juda gi Jo-Jerusalem, anami wasikgi kaachiel gi jo ma dwaro monjogi oneggi gi ligangla. Kendo anami winy ma fuyo e kor polo kod ondiegi mag piny ringregi mondo gicham.+
8 Abiro ketho dalani gi keth malich, mi ng’ato ang’ata mokalo bute biro bwok kendo liyo nikech masiche ma oseyude.+
9 Abiro miyo gicham ringre yawuotgi gi nyigi giwegi, kendo gibiro chamo ringre jowetegi e kinde ma wasigu biro lworo dalani ka gidino yore duto mondo gineggi.”’+
10 “Kae to ito aguluno e wang’ jo ma idhigo,
11 kiwachonegi ni, ‘Ma e gima Jehova Nyasach oganda lweny owacho: “Abiro toyo ogandani kaachiel gi dalani, mana kaka ng’ato toyo agulu mi ok nyal chak chome; gibiro yiko ji e Tofeth nyaka opong’, ma koro onge ka ma diyikie ng’ato.”’+
12 “‘Mano e gima abiro timo ne dalani,’ Jehova owacho, ‘kaachiel gi jo modak e iye, kendo abiro loke mi ochal gi Tofeth.
13 Ute man Jerusalem gi ute ruodhi mag Juda biro bedo mogak mana ka Tofeth,+ ee, udi duto ma ne iwang’oe misengni e wi tatgi ne oganda mar polo,+ ka ma ne gichiwoe misengni miolo ne nyiseche mamoko.’”+
14 Ka Jeremia noseduogo koa Tofeth ka ma Jehova ne oore mondo okorie wach, ne ochung’ e laru mar od Jehova mi owacho ne ogandano niya:
15 “Ma e gima Jehova Nyasach oganda lweny, Nyasach Israel owacho, ‘Neuru! Abiro kelo masira ma ne awacho ni adhi kelo ne dalani kod mier duto mokiewo kode, nikech wigi tek, kendo gisetamore winjo wachna.’”+
Weche Moler Piny
^ Kata, “ite biro sakni.”
