Jeremia 22:1-30
22 Ma e gima Jehova owacho: “Dhi e od ruodh Juda mondo inyise wachni.
2 Iniwachne ni, ‘Winj wach Jehova, A ruodh Juda mobet e kom-loch mar Daudi, in kaachiel gi jotichni gi jogi ma donjo gi dho rangeyegi.
3 Ma e gima Jehova owacho: “Ng’aduru bura kare, kendo urit tim makare. Resuru ng’at ma imayo. Kik usand jadak moro amora, kata nyathi kich, kata chi liel.+ Bende, kik uchuer remb ng’at ma onge ketho kae.+
4 Nimar ka uwinjo wachni eka ruodhi ma obedo e kom-loch mar Daudi+ biro kadho e dho rangeye mag dalani, ka giidho geche lweny kod farese, gin kod jotichgi kaachiel gi joggi.”’+
5 “‘To ka utamoru winjo wechena, akuong’ora ni ibiro keth odni,’+ Jehova owacho.
6 “Nimar ma e gima Jehova owacho e wi od ruodh Juda,‘Ichalona gi Gilead,Kendo gi wi Got Lebanon.
To analoki thim;Onge ng’ato ang’ata ma biro dak e miecheni.+
7 Abiro oro ji mondo okethi,Ng’ato ka ng’ato nobi gi gigene mag lweny.+
Gibiro tong’o yiendeni mabeyo duto mag sidaMi gilwargi e mach.+
8 “‘Ogendni biro kadho but dalani ka gipenjore niya: “Ang’o momiyo Jehova notimo gima chal kama ne dala maduong’ni?”+
9 To ibiro dwokgi kama: “Nikech ne giweyo singruok ma ne gitimo gi Jehova Nyasachgi mi gichako kulore ne nyiseche mamoko kendo tiyonegi.”’+
10 Kik uyuag ng’at mosetho,Kendo kik uwinjne lit.
Kar mano, ywaguru ng’at ma itero e tuech,Nimar ok obi duogo thurgi kendo.
11 “Nimar ma e gima Jehova owacho e wi Shalum*+ wuod Josia ruodh Juda ma locho kar Josia+ wuon-gi, kendo ma osea e pinyni: ‘Ok obi duogo kendo.
12 Nikech obiro tho e piny ka ma otere e tuech, kendo ok none pinyni kendo.’+
13 Yaye, nobed malit ne ng’at ma ok ger ode gi tim makareKendo ma ok ger od gorofa gi bura makare,Ma miyo jowetene tiyone kayiem nono,To ok ochulgi osara;+
14 Ng’at ma wacho ni, ‘Abiro gero ot maduong’Ma udine ma malo lach.
Abiro ketone diriseMi aketne yiend sida kendo wire gi rangi makwar.’
15 Be iparo ni ibiro dhi nyime locho mana nikech itiyo gi yiend sida mang’eny moloyo jomamoko?
Wuonu bende ne chiemo kendo metho,To ne ong’ado bura kare, kendo notimo gik makare,+Omiyo, weche ne odhine maber.
16 Ne oyalo buch jo ma sandore kod jochan e yo makare,Mi gik moko ne odhine maber.
‘Donge mano e ma nyiso ni ng’ato ong’eya?’ Jehova owacho.
17 ‘To in kinde duto iketo chunyi e wuondo ji,Ichuero remb jo ma onge ketho,Ikwelo kendo ihero mibadhi.’
18 “Omiyo, ma e gima Jehova wacho e wi Jehoyakim+ wuod Josia ruodh Juda,‘Ok gibi yuage kama:
“Yaye owadwa! Yaye nyaminwa!”
Ok gibi yuage niya:
“Yaye ruodhwa! Yaye ruodhwa!”
19 Ibiro yike mana ka punda,+Ibiro ywaye mi wite oko,E dho rangeye mag Jerusalem.’+
20 Dhi iywag e Got Lebanon,Kog ka in Bashan,Ywag matek e piny Abarim,+Nikech oselo joherani.+
21 Ne awuoyo kodi e ndalo ma weche ne dhini maber.
To ne idwoka niya: ‘Ok abi winji.’+
Mano osebedo timni chakre tinni,Nimar ok isewinjo dwonda.+
22 Yamo e ma biro kwayo jokwadhi duto,+Kendo joherani nodhi e tuech.
Ibiro yudo wich-kuot kod achaya nikech masiche duto moyudi.
23 Yaye, un jo ma odak Lebanon,+Modak e kind yiende mag sida,+Mano kaka ubiro ywak ka rem otugore,Rem ma chalo gi mar dhako ma muoch kayo!”+
24 “Jehova owacho ne Konia*+ wuod Jehoyakim+ ruodh Juda ni, ‘Akuong’ora ni kata dabed ni in e tere manie lweta ma korachwich, pod dawuodhi oko!
25 Abiro chiwi e lwet jo ma iluoro ma dwaro negi, e lwet Nebukadnezar* ruodh Babulon, kendo e lwet Jo-Kaldea.+
26 Abiro witi kaachiel gi minu e piny moro nono, mi initho kuno.
27 Kendo ok ginichak gidogi e piny ma ne gihero.+
28 Donge Konia en mana ng’at ma ocha ka agulu motore,Agulu ma ng’ato ang’ata ok dwar, koso?
Ang’o momiyo owite kaachiel gi nyikwayeE piny ma ok ging’eyo?’+
29 Yaye piny, piny, piny, winj wach Jehova.
30 Ma e gima Jehova owacho:
‘Ndik piny ni ng’atni ne onge nyithindo,Ng’at ma ngimane ok bi dhi maber,Nimar onge nyakware kata achielMa biro bet e kom-loch mar Daudi mondo olochi e piny Juda.’”+
Weche Moler Piny
^ Iluonge bende ni Jehoahaz.
^ Iluonge bende ni Jehoiakin kata Jekonia.
^ Iluonge bende ni Nebukadereza.
