Jeremia 23:1-40
23 “Yaye nobed malit ne jokwath ma jwang’o kendo keyo rombe manie legena!” Jehova owacho.+
2 Omiyo, ma e gima Jehova Nyasach Israel owacho e wi jokwath ma kwayo joga: “Usekeyo rombena; usiko ukeyogi akeya, kendo pok uritogi maber.”+
“Koro abiro kumou nikech gik maricho ma usetimo,” Jehova owacho.
3 “Eka abiro choko rombena modong’ ka agologi e pinje duto ma ne akeyogie,+ mi anaduokgi e lege maggi,+ kendo gibiro nyuolore mi gibed mang’eny.+
4 Abiro ketonegi jokwath ma biro ritogi maber.+ Onge gima biro miyogi luoro, kata bwogogi, kendo onge kata achiel kuomgi ma biro lal,” Jehova owacho.
5 “Neuru! Ndalo biro,” Jehova owacho, “ma anachung ne Daudi bad yath makare.*+ Obiro locho+ gi rieko, kong’ado bura kare, kendo korito tim makare e piny.+
6 E ndalone, ibiro res Juda,+ kendo Israel biro dak gi kuwe.+ Kendo nying ma ibiro luongego nobed: Wan Jo Makare Nikech Jehova.”+
7 “Kata kamano, ndalo biro,” Jehova owacho, “ma ok ginikuong’re kendo niya: ‘Akuong’ora gi nying Jehova, ma nogolo Jo-Israel e piny Misri!’+
8 to gibiro kuong’ore ni, ‘Akuong’ora gi nying Jehova, ma nogolo kendo duoko nyikwa Israel e pinygi, kogologi e piny ma ni yo nyandwat kod pinje mamoko duto ma ne okeyogie,’ kendo ginidag e pinygi.”+
9 Kuom wach jonabi:
Chunya ool.
Chokena duto tetni.
Achalo gi ng’at momer,Kendo ka ng’at ma divai omero,Mana nikech Jehova kendo nikech wechene maler.
10 Nimar piny opong’ gi jochode;+Kuong’no osemiyo piny okuyo+Kendo kuonde ma ne lum ng’ichie, koro osetwo.+
Yoregi richo, kendo gitiyo gi tekogi e yo marach.
11 “Janabi gi jadolo dwanyore.+
Gitimo richo kata mana e i oda,”+ Jehova owacho.
12 “Yore ma giluwo nobed ma poth kendo motimo mudho;+Ibiro dhirgi mi gilwar piny.
Nimar abiro kelonegi masiraE higa mar ng’ado bura,” Jehova owacho.
13 “Aseneno kuom jonabi mag Samaria+ gik ma osina.
Gikoro wechegi e nying Baal,Kendo giwito joga ma Jo-Israel.
14 Kendo aseneno gik maricho ahinya kuom jonabi mag Jerusalem.
Giterore,+ kendo giwuotho e miriambo;+Gijiwo jo ma timo richo,Kendo gidagi weyo timbegi maricho.
Gichalona mana gi Sodom,+To jo modak e iye chal gi Gomora.”+
15 Kuom mano, ma e gima Jehova Nyasach oganda lweny owacho kuom jonabigo:
“Abiro miyogi yath makech mondo gichamKod pi sum mondo gimodhi.+
Nimar jonabi mag Jerusalem oselando weche ma kwedo Nyasaye e piny duto.”
16 Ma e gima Jehova Nyasach oganda lweny owacho:
“Kik uchik itu ne jonabi ma koronu weche.+
Gimiyo ugeno gik ma ok bi timore.
Fweny ma gineno gin gik ma giparo apara,+To ok moa e dho Jehova.+
17 Pile giwacho ne jo mochaya ni,‘Jehova owacho niya: “Unubed gi kuwe.”’+
Kendo ne ng’ato ang’ata ma wiye tek ni,‘Onge masira ma nobi kuomi.’+
18 Nimar en ng’ano mosebedo e buch JehovaMondo one kendo winjo wachne?
Ng’ano mosechiko ite ne wachne mondo owinje malong’o?
19 Neuru! Jehova osemiyo mirimbe okutho matek mana ka ahiti;Mana ka kalausi mager, obiro kutho e wi jo maricho.+
20 Mirimb Jehova ok bi kuweNyaka chop otim gik ma chunye oseng’ado.
E ndalo mag giko, unuwinj tiend wachni malong’o.
21 Ne ok aoro jonabigo, to ne girikni biro.
Ne ok awuoyo kodgi, to ne gikoro wach.+
22 To ka dine gichung’ e bucha,Dine gimiyo joga owinjo wechenaKendo dine gimiyo gilokre mi giweyo yoregi kod timbegi maricho.”+
23 “Be an mana Nyasaye ka an machiegni kodu,” Jehova owacho, “to ka an mabor kodu ok an Nyasaye?”
24 “Be ng’ato dipond kamoro ma ok anyal nenee?”+ Jehova owacho.
“Donge an e ma apong’o piny gi polo?”+ Jehova owacho.
25 “Asewinjo ka jonabi ma koro miriambo gi nyinga wacho ni, ‘Ne aleko wach moro! Ne aleko wach moro!’+
26 Jonabi ma koro weche miriambogo biro dhi nyime nyaka karang’o? Gin jonabi ma koro mana weche ma giparo e chunygi.+
27 Gidwaro ni wi joga owil gi nyinga nikech lek ma ng’ato ka ng’ato pimo ne nyawadgi, mana kaka wi kweregi nowil gi nyinga nikech Baal.+
28 Janabi moseleko onego ohul lekno, to ng’at ma nigi wach moa kuoma, onego ohul wachno gadier.”
“Koso yugi gi cham chalre?” Jehova owacho.
29 Jehova owacho ni, “Donge wachna chalo gi mach,+ kendo gi nyundo ma baro lwanda matindo tindo, koso?”+
30 “Kuom mano, amon gi jonabi ma kwalo wechena kuom jonabi wetegi,” Jehova owacho.+
31 “Amon gi jonabi ma tiyo gi lewgi e wacho ni, ‘Nyasaye osewacho!’” Jehova owacho.+
32 “Amon gi jonabi ma wuondo ji gi lekgi,” Jehova owacho, “ma hulo lekgi mag miriambo, nimar giwito joga gi miriambo kod sungruokgi.”+
“Ne ok aorogi kata chikogi. Omiyo, ok ginikony ogandani kata matin,”+ Jehova owacho.
33 “To ka ng’ato kuom joga, kata kuom jonabi, kata jodolo openji ni, ‘Ere ting’ mapek* moa kuom Jehova?’ inidwokgi ni, ‘“Un e ting’ mapek, kendo abiro witou oko,”+ Jehova owacho.’
34 To jonabi kata jodolo kata ng’ato ang’ata ma owacho ni, ‘Ma en ting’ mapek* mar Jehova!’ Abiro kumo ng’atno kaachiel gi joode.
35 Ma e gima ng’ato ka ng’ato kuomu wacho ne nyawadgi kendo ne owadgi, ‘Ere dwoko ma Jehova osechiwo? Ere gima Jehova owacho?’
36 Kik uchak uhul ting’ mapek* mar Jehova, nimar ting’no en wach mar ng’ato ka ng’ato owuon, kendo useloko weche mag Jehova Nyasachwa mangima, Nyasach oganda lweny.
37 “Ma e gima ibiro penjo jonabi, ‘Dwoko mane ma Jehova osemiyou? Kendo Jehova osewachonu ang’o?
38 Kendo kuwacho ni, “Ting’ mapek* mar Jehova!” ma e gima Jehova owacho: “Nikech usewacho ni, ‘Wachni e ting’ mapek mar Jehova,’ bang’ ka nasewachonu ni, ‘Ok onego uwach niya: “Ting’ mapek* mar Jehova!”’
39 neuru! abiro ting’ou mi awitu ua e wang’a, un kaachiel gi dala ma namiyou gi kwereu.
40 Abiro miyou wich-kuot mochwere, gi achaya ma wi ji ok nowilgo nyaka chieng’.”’”+
Weche Moler Piny
^ Kata, “nyakwaro makare.”
^ Kata, “wach mapek.” E dho Hibrania, wachni nigi tiende ariyo: “ote mapek moa kuom Nyasaye” kata “ting’ ma turo ji.”
^ Kata, “ote mapek.”
^ Kata, “ote mapek.”
^ Kata, “ote mapek.”
^ Kata, “ote mapek.”
