Jeremia 24:1-10
-
Olemb ng’owo mabeyo gi maricho (1-10)
24 Jehova ne onyisa okepni ariyo ma ne nigi olemb ng’owo, ma noket e nyim hekalu mar Jehova. Mano ne otimore bang’ ka Nebukadnezar* ruodh Babulon nosetero Jekonia*+ wuod Jehoyakim+ ruodh Juda e tuech, gi jotend Juda, gi jo molony e tij lwedo, kaachiel gi jotheth.* Ne ogologi Jerusalem mi oterogi Babulon.+
2 Okapu achiel ne nigi olemb ng’owo mabeyo ahinya, ma chal ka ng’owo mokwongo nyak. To okapu machielo ne nigi olemb ng’owo maricho ahinya, ma ng’ato ok nyal chamo.
3 Eka Jehova ne openja niya: “Ineno ang’o Jeremia?” Ne adwoke niya: “Aneno olemb ng’owo. Moko beyo ahinya, to moko richo ahinya ma ok nyal cham.”+
4 To wach Jehova nobirona niya:
5 “Ma e gima Jehova Nyasach Israel owacho, ‘Abiro kwano Jo-Juda ma ne atero e tuech e piny Jo-Kaldea ka ng’owo mabeyogi.
6 Wang’a biro ritogi pile, kendo anaduokgi e pinyni.+ Abiro gerogi to ok anamukgi; abiro pidhogi, to ok anapudhgi.+
7 Anamigi chuny mar ng’eyo ni an Jehova.+ Ginibed joga, to anabed Nyasachgi,+ nimar giniduog ira gi chunygi duto.+
8 “‘To Jehova osewacho kama e wi olemb ng’owo maricho ma ok nyal cham:+ “Mano e kaka abiro kwano Zedekia+ ruodh Juda, jotende, kod Jo-Jerusalem duto modong’ kae, kaachiel gi jo modak e piny Misri.+
9 Abiro kelo kuomgi masira malich ma nobwog pinjeruodhi duto manie piny.+ Ibiro yanygi, lokgi ngero, jargi, kendo ibiro kuong’gi+ kuonde duto ma abiro keyogie.+
10 Abiro oronegi ligangla,+ kech, kod tuoche+ nyaka chop gilal chuth e piny ma namiyogi kod kweregi.”’”
Weche Moler Piny
^ Iluonge bende ni Nebukadereza.
^ Iluonge bende ni Jehoiakin kata Konia.
^ Kata nyalo bedo, “kaachiel gi jo ma ne gero ohingni mag jorito.”
