Jeremia 26:1-24
26 Ka ne Jehoyakim+ wuod Josia ruodh Juda ochako locho, wach Jehova nobirona niya:
2 “Ma e gima Jehova owacho, ‘Dhi ichung’ e laru mar od Jehova mondo iwuo gi ji duto modak e mier mag Juda ma biro lamo e od Jehova. Ininyisgi weche duto ma asechiki; kik iwe ma ok inyisogi kata wach achiel.
3 Samoro di po ka giwinjo wechego mi ng’ato ka ng’ato oweyo timne marach, kamano analok pacha kuom masira ma adwaro kelonegi nikech timbegigo.+
4 Iniwachnegi niya: “Ma e gima Jehova owacho, ‘Kudagi winjo kendo luwo chik ma asemiyou,
5 kendo ka udhi nyime tamoru winjo weche ma asebedo ka aorogo jotichna ma jonabi nyadinwoya,+
6 abiro timo ne odni gima ne atimo ne Shilo,+ kendo anami ogendni duto mag piny one dalani ka dala mokuong’.’”’”+
7 Jodolo gi jonabi kaachiel gi ji duto nowinjo ka Jeremia wacho wechego e od Jehova.+
8 To ka ne Jeremia osetieko wacho weche ma Jehova nochike ni odhi owach ne ji duto, jodolo gi jonabi kaachiel gi ji duto nomake mi giwachone niya: “Nyaka to itho.
9 Ang’o momiyo isekoro e nying Jehova kiwacho ni, ‘Odni biro chalo gi Shilo, kendo ibiro keth dalani mi odong’ gunda’?” Eka ji duto ne ochokore molworo Jeremia e od Jehova.
10 Ka ne jotend Juda owinjo wechego, ne giwuok e od ruoth mi gidhi e od Jehova, kendo ne gibet e dho rangach manyien mar od Jehova.+
11 Kendo jodolo gi jonabi nonyiso jotelogo kod ji duto niya: “Ng’ani owinjore otho,+ nimar osekoro weche maricho e wi dalani mana kaka usewinjo gi itu uwegi.”+
12 Eka Jeremia ne onyiso jotelogo kod ji duto niya: “Jehova e ma noora mondo akor weche ma usewinjogo duto e wi odni kod dalani.+
13 Kuom mano, lokuru yoreu gi timbeu, kendo uwinj dwond Jehova Nyasachu, mi Jehova nolok pache kuom masira mosewacho ni obiro kelonu.+
14 To an to an e lwetu, timnauru gimoro amora muparo ni bernu kendo ni kare.
15 To nyaka ung’e ni ka unega, unubed gi buch remo, un, gi dalani, kod ji duto modak e iye. Nimar Jehova e moseora mondo awachnu wechego duto.”
16 Eka jotelogo gi ji duto nowacho ne jodolo gi jonabi niya: “Ok owinjore ong’ad ne ng’atni buch tho, nimar osewuoyo kodwa e nying Jehova Nyasachwa.”
17 E wi mano, jodongo moko mag gweng’ ne ochung’ monyiso jo ma ne ochokorego duto niya:
18 “E ndalo loch Hezekia+ ruodh Juda, janabi Mika+ ma Ja-Moresheth, ne koro wach ne Jo-Juda duto ni, ‘Ma e gima Jehova Nyasach oganda lweny owacho:
“Ibiro pur Sayun ka puodho,Ibiro keth Jerusalem modong’ pidhe,+Kendo got mogerie hekalu biro chalo gi kuonde moting’ore malo e i bungu.”’+
19 “Be Hezekia ruodh Juda kod Jo-Juda ne onege? Donge ruoth ne oluoro Jehova mi okwayo Jehova ng’wono, kendo Jehova nowinje mi oloko pache kuom masira ma nosewacho ni odhi kelonegi?+ Wan to wachiegni kelo masira maduong’ni kuomwa wawegi.
20 “Ne nitie ng’at machielo ma bende ne koro e nying Jehova. Ne iluonge ni Urija ma wuod Shemaya Ja-Kiriath-jearim,+ en bende nokoro weche maricho e wi dalani kod pinyni mana kaka Jeremia.
21 Ka ne Ruoth Jehoyakim,+ gi joge ma roteke, kaachiel gi jotende owinjo wechenego, ruoth ne dwaro nege.+ Urija nowinjo kamano, ne obedo maluor mi oringo odhi Misri.
22 To ruoth Jehoyakim ne ooro Elnathan+ wuod Akbor kod chwo mamoko mondo gidhi Misri.
23 Ne gigolo Urija e piny Misri mi gikele ir Ruoth Jehoyakim, monege gi ligangla,+ kendo ne owit ringrene ka ma ne iyikoe ji ajia.”
24 To Ahikam+ wuod Shafan+ nodok ne Jeremia, mi ne ok ochiwe e lwet ji mondo onege.+
