Jeremia 28:1-17
-
Jeremia gi Hanania janabi mar miriambo (1-17)
28 E higano, tiende ni e dwe mar abich mar higa mar ang’wen mar loch Zedekia+ ruodh Juda, Hanania janabi ma wuod Azur Ja-Gibeon,+ ne owachona wechegi e nyim jodolo kaachiel gi ji duto ma ne nie od Jehova:
2 “Ma e gima Jehova Nyasach oganda lweny, Nyasach Israel owacho, ‘Abiro turo jok mar ruodh Babulon.+
3 Ka pok higni ariyo orumo, abiro duoko sende duto mag od Jehova ma Nebukadnezar ruodh Babulon nokawo motero Babulon.’”+
4 “‘Kendo abiro duoko Jekonia+ wuod Jehoyakim+ ruodh Juda, kaachiel gi Jo-Juda duto ma ne oter e tuech e piny Babulon,+ nimar abiro turo jok mar ruodh Babulon,’ Jehova owacho.”
5 Eka Jeremia janabi ne odwoko Hanania janabi e nyim jodolo kaachiel gi ji duto ma ne oyudo ochung’ e od Jehova.
6 Jeremia ne owacho niya: Amin!* Mad Jehova otim mana kamano! Nyalo bedo maber ka Jehova omiyo weche duto mikorogo ochopo kare, mi oduoko sende duto mag od Jehova kaachiel gi ji duto ma noter e tuech Babulon!
7 Kata kamano, asayi in Hanania, kaachiel gi ji duto ni uwinj weche ma abiro wachonu.
8 Jonabi ma chon ma ne okwongonwa ne okoro ni lwenje, masiche, kod tuoche malich, ne dhi biro kuom ogendni kod pinjeruodhi madongo.
9 To ka janabi moro okoro ni kuwe dhi betie kendo otimore mana kamano, eka kuom adier, wabiro ng’eyo ni mano janabi ma Jehova ooro.”
10 Gikanyono, janabi Hanania ne ogolo jok e ng’ut Jeremia mi oture.+
11 Kendo Hanania ne owacho e nyim ji duto niya: “Ma e gima Jehova owacho, ‘Abiro turo jok ma Ruoth Nebukadnezar oseketo e ng’ut ogendni mana kaka osetur jokni. Abiro timo kamano ka pok higni ariyo orumo.’”+ Kae to janabi Jeremia ne oa.
12 To bang’ ka Hanania ne oseturo jok ma ne nie ng’ut janabi Jeremia, Jehova ne owacho ne Jeremia niya:
13 “Dhi inyis Hanania ni, ‘Ma e gima Jehova owacho: “Iseturo jok molos gi yien,+ to ibiro loso jok mar nyinyo kargi.”
14 Nimar ma e gima Jehova Nyasach oganda lweny, Nyasach Israel owacho: “Abiro keto jok molos gi nyinyo e ng’ut ogendnigi duto mondo giti ne Nebukadnezar ruodh Babulon, adier, gibiro tiyone.+ Bende, abiro miye le duto mag bungu.”’”+
15 Eka janabi Jeremia ne owacho ne janabi Hanania+ kama: “Yaye Hanania, asayi, winji! Jehova ne ok oori, to isemiyo jogi ogeno mana miriambo.+
16 Omiyo, ma e gima Jehova owacho, ‘Abiro goli e wang’ pinyni. Kendo ibiro tho ka higani pok orumo, nikech isemiyo jogi ong’anyo ne Jehova.’”+
17 Kamano, janabi Hanania ne otho dwe mar abiriyo e higano.
Weche Moler Piny
^ Kata, “Obed kamano.”