Jeremia 32:1-44
32 Wach Jehova ma nobiro ne Jeremia e higa mar 10 mar loch Zedekia ruodh Juda. Mano bende e higa mar 18 mar loch Nebukadnezar.*+
2 E kindeno, noyudo jolwenj ruodh Babulon monjo Jerusalem, bende, noyudo janabi Jeremia otue e Laru mar Jarit+ manie od ruodh Juda.
3 Nimar ka ne Zedekia ruodh Juda otueyo Jeremia kanyo,+ ne openje ni, “Ang’o momiyo ikoro wachni? Iwacho ni, ‘Ma e gima Jehova wacho: “Abiro chiwo dalani e lwet ruodh Babulon, kendo enokawe.+
4 Kendo Zedekia ruodh Juda ok bi tony e lwet Jo-Kaldea, nimar ibiro make mi tere e nyim ruodh Babulon, mi enonene kendo enowuo kode wang’ gi wang’.”’+
5 ‘Obiro tero Zedekia e Babulon, kendo enobed kuno nyaka chieng’ ma abiro pare,’ Jehova owacho. ‘Kata obedo ni ikedo gi Jo-Kaldea, ok inilogi.’”+
6 Jeremia nowacho niya: “Wach Jehova osebirona ni,
7 ‘Hanamel wuod owadgi wuonu ma Shalum nobi iri kendo nowachni niya: “Ng’iew puotha man Anathoth,+ nikech in e ma in gi ratiro mokwongo mar waro puodhono.”’”+
8 Kamano, Hanamel wuod owadgi wuonwa nobiro ira e Laru mar Jarit, mana kaka Jehova nosewacho, mowachona niya: “Ng’iew puotha man Anathoth e piny Benjamin, nikech in gi ratiro mokwongo mar ware mondo obed mari. Ng’iewe obed mari.” Eka ne afwenyo ni mano ne en wach Jehova.
9 Omiyo, ne ang’iewo puodho ma ni Anathoth kuom Hanamel wuod owadgi wuonwa. Ne achule pesa+ ma romo shekel* abiriyo kod ng’injo apar mag fedha.
10 Ne andiko winjruok ma ne wasetimono e barua,+ mi atueyo baruano, kae to ne aluongo joneno,+ mi ne apimo pesago e rapim.
11 Eka ne akawo barup puodho ma noyudo asetueyo kaluwore gi chik, kaachiel gi barua ma ne ok otue,
12 mi amiyo Baruk+ wuod Neria+ ma wuod Maseia barua ma ne ang’iewogo puodhono. Ne amiye e nyim Hanamel wuod owadgi wuonwa, e nyim joneno ma ne ondiko nyingegi e baruano, kendo e nyim Jo-Yahudi duto ma ne obet e Laru mar Jarit.+
13 Eka ne achiko Baruk e nyim jogo niya:
14 “Ma e gima Jehova Nyasach oganda lweny, Nyasach Israel owacho, ‘Kaw barupe ariyogi, ma osetue kod ma ok otue kendo ikan-gi e agulu mondo kik gikethre.’
15 Nimar ma e gima Jehova Nyasach oganda lweny, Nyasach Israel owacho, ‘Ute, gi puothe, gi puothe mzabibu ibiro ng’iew kendo e pinyni.’”+
16 Ka ne asemiyo Baruk wuod Neria barup ng’iewo puodho, ne akwayo Jehova e lamo niya:
17 “A Jehova Wuon Loch Duto, nichueyo polo gi piny gi tekoni maduong’,+ kendo gi badi moriere. Onge gima lich ma nyalo tami timo.
18 Inyiso hera madier ne ji gana gi gana, to ikumo nyikwayo nikech ketho mag kweregi,+ in Nyasaye madier, Jal ma nigi teko kod duong’, ma nyinge en Jehova Nyasach oganda lweny.
19 Ichano gik malich miwuoro, kendo itimo gik madongo,+ wengeni neno yore dhano duto+ mondo ichul ng’ato ka ng’ato kaluwore gi yorene kod timbene.+
20 Ne itimo ranyisi kod honni e piny Misri, ma ji paro nyaka chil kawuono. Omiyo, nyingi ong’ere e piny Israel kendo e kind ogendni+ duto nyaka kawuononi.
21 Kendo ne igolo Israel jogi e piny Misri kitiyo gi ranyisi, honni, badi matek, badi moriere, kod gik ma nomiyo ji luoro ahinya.+
22 “Bang’e, ne imiyogi piny ma ne isingo ne kweregi,+ piny mopong’ gi chak kod mor kich.+
23 To ka ne gidonjo e piny ma gidakieni, ne ok giwinjo dwondi kata luwo chikeni. Ne ok gitimo gimoro amora ma ne isechikogi. Mano e momiyo ne ikelo masirani kuomgi.+
24 Ne ane kaka ji osebiro monjo dalani+ mi giloso pidhe molwore. Kendo ligangla,+ kech, kod tuoche+ nomi dalani opodh e lwet Jo-Kaldea ma kedo kode. Gik ma ne iwacho osetimore, kendo ineno mano ka timore.
25 Kata kamano, A Jehova Wuon Loch Duto, ne inyisa ni adhi ang’iew puodho kendo aluong joneno kata obedo ni dalani dhi podho e lwet Jo-Kaldea.”
26 Eka wach Jehova ne obiro ne Jeremia niya:
27 “An Jehova, Nyasach ji duto. Be nitie gima nyalo tama timo?
28 Omiyo, ma e gima Jehova owacho, ‘Achiwo dalani e lwet Jo-Kaldea kendo e lwet Nebukadnezar* ruoth Babulon mondo okawe.+
29 Jo-Kaldea ma kedo gi dalani nodonj e iye, mi giniwang’ dalani+ kaachiel gi ute ma ji osebedo ka chiwoe misengni ne Baal e wi tatgi, kendo chiwo misengni miolo ne nyiseche manono mondo giwang’go iya.’+
30 “‘Nimar Jo-Israel gi Jo-Juda osebedo ka timo mana gik maricho e wang’a chakre tin-gi.+ Jo-Israel siko ka wang’o iya gi gik ma giloso gi lwetegi,’ Jehova owacho.
31 ‘Dalani osebedo ka miya mirima kod ich-wang’ chakre ne gere.+ Mano e momiyo nyaka kethe,*+
32 nikech gik maricho ma Jo-Israel gi Jo-Juda osetimo. Ruodhigi,+ jotendgi,+ jodolo maggi, jonabigi,+ kaachiel gi Jo-Juda kod jo ma odak Jerusalem duto osewang’o iya.
33 Ne gisiko gilokona ng’egi, to ok wang’gi;+ kendo kata obedo ni ne atemo puonjogi nyadinwoya, ne gitamore winja.+
34 Kendo ne giketo sanambegi makwero e ot miluongo gi nyinga, mondo gidwanye.+
35 Bende, gisemiyo Juda otimo richo nikech gisegero kuonde moting’ore malo ne Baal e Hoho mar Wuod Hinom*+ mondo giwang’ yawuotgi gi nyigi ne Molek.+ Ne ok achikogi mondo gitim gima kamano,+ kendo chunya pok noparo timo gima rach kamano.’
36 “Omiyo, ma e gima Jehova Nyasach Israel owacho e wi dala ma uwacho ni ligangla, kech kod tuoche e ma biro miyo ochiwe e lwet ruodh Babulon,
37 ‘Abiro chokogi ka agologi e pinje duto ma ne akeyogie ka iya owang’ kendo ka an gi mirima mager.+ Abiro duokogi kae kendo gibiro dak gi kuwe.+
38 Kendo anabed Nyasachgi, to ginibed joga.+
39 Anamigi chuny achiel+ gi yo achiel mondo giluora kinde duto, mondo weche odhinegi maber, gin kaachiel gi nyithindgi.+
40 Kendo anatim kodgi singruok ma nyaka chieng’+ ni ok nawe timonegi gik mabeyo.+ Anami giluora gi chunygi duto mondo kik gilokre mi giweya.+
41 Anatimnegi maber ka chunya mor+ kendo anagurgi motegno e pinyni.+ Anatim kamano gi chunya duto kendo gi tekona duto.’”
42 “Nimar ma e gima Jehova owacho, ‘Mana kaka asekelo masira kuom jogi, e kaka abiro timonegi gik mabeyo duto ma asingonegi.+
43 Kendo ji biro ng’iewo puothe e pinyni+ kata obedo ni uwacho ni, ‘En piny mojwang’ ka ma dhano kata le ok odakie, kendo osechiwe e lwet Jo-Kaldea.”’
44 “Ji biro ng’iewo puothe, ibiro ndik barupe mag ng’iewo puothe mi tuegi e nyim joneno. Mano notimre e piny Benjamin,+ e alwora mag Jerusalem, e mier mag Juda,+ e mier manie gode, e mier manie pap,+ kendo e mier ma ni yo milambo, nikech abiro golo joggi e tuech,’+ Jehova owacho.”
Weche Moler Piny
^ Iluonge bende ni Nebukadereza.
^ Shekel achiel ne romre gi gram 11.4. Som Apendiks B14.
^ Iluonge bende ni Nebukadereza.
^ Mano e momiyo nyaka gole e wang’a.
^ Som Tiend Weche, “Gehena.”
